ອາການເສັ້ນເລືອດໃນສະໝອງແຕກໃນເດັກ

    ເສັ້ນເລືອດໃນສະໝອງແຕກ ເປັນພະຍາດທີ່ພົບໃນໄວຜູ້ໃຫຍ່, ແຕ່ກໍສາມາດເກີດຂຶ້ນໄດ້ໃນເດັກນ້ອຍຄືກັນ ຜູ້ປົກຄອງຄວນສັງເກດອາການຫາກພົບວ່າເດັກນ້ອຍເຈັບຫົວຫລາຍ, ວິນຫົວປວດຮາກ, ແຂນຂາອ່ອນແຮງ ຢ່າຖືເບົາ ຄວນສັງເກດອາການ ແລະ ພາໄປພົບແພດ ເພື່ອຮັບການບົ່ງມະຕິ ແລະ ປິ່ນປົວໂດຍໄວ.

     ເສັ້ນເລືອດໃນສະໝອງແຕກເກີດຈາກຄວາມດັນເລືອດສູງ ເປັນອາການທີ່ສະໝອງຂາດເລືອດ ເນື່ອງຈາກຫລອດເລືອດຕີບຕັນ, ອັດຕັນຈົນຫລອດເລືອດແຕກ ສົ່ງຜົນໃຫ້ເນື້ອເຍື່ອໃນສະໝອງຖືກທຳລາຍ ຈົນເຮັດໃຫ້ການເຮັດວຽກຂອງສະໝອງຢຸດສະງັກ ທັງນີ້ບໍ່ມີສັນຍານເຕືອນ, ແຕ່ອາດພົບອາການເຈັບຫົວເປັນໄລຍະໆ ແລ້ວຫາຍໄປ ເຊິ່ງຄວາມຮຸນແຮງຂອງເລືອດທີ່ອອກໃນສະໝອງຂຶ້ນຢູ່ກັບຕຳແໜ່ງຂອງຄວາມຜິດປົກກະຕິທີ່ພົບ ຫາກເປັນຄວາມຜິດປົກກະຕິຂອງສະໝອງຢູ່ທາງເທິງ ຈະມີອາການເຈັບຫົວ, ແຂນຂາອ່ອນແຮງ ຫລື ມີອາການຊັອກ ຖ້າເຈັບບໍລິເວນງ່ອນດ້ານຫລັງ ເຊິ່ງເປັນບໍລິເວນທີ່ໃກ້ກັນກ້ານສະໝອງ ຈະມີອາການເຈັບຫົວ, ຮາກ ແລະ ໝົດສະຕິ ສົ່ງຜົນໃຫ້ເສຍຊີວິດໄດ້. ເສັ້ນເລືອດສະໝອງແຕກສ່ວນຫລາຍມັກຈະເກີດຂຶ້ນກັບໄວຜູ້ໃຫຍ່ ແລະ ສາມາດເກີດຂຶ້ນໄດ້ໃນເດັກນ້ອຍຄືກັນ, ແຕ່ມີໂອກາດພົບໄດ້ໜ້ອຍກ່ວາ ອາການທີ່ພົບກໍມີຄວາມແຕກຕ່າງຈາກຜູ້ໃຫຍ່ ເນື່ອງຈາກອາດມີເສັ້ນເລືອດຜິດປົກກະຕິ ຫລື ອາການເລືອດອອກໃນສະໝອງຈາກການທີ່ເສັ້ນເລືອດຈະເລີນເຕີບໃຫຍ່ຜິດປົກກະຕິ.

     ອາການເສັ້ນເລືອດໃນສະໝອງແຕກໃນເດັກ ເກີດຈາກຄວາມຜິດປົກກະຕິ 3 ລະບົບ ໄດ້ແກ່ :

     1. ເສັ້ນເລືອດຜິດປົກກະຕິໃນສະໝອງແລ້ວແຕກເອງ ເຊິ່ງສາມາດພົບໄດ້ໜ້ອຍ.

     2. ອາການທີ່ມີຄວາມຜິດປົກກະຕິຂອງການກ້າມຂອງເລືອດ ຫລື ກຸ່ມພະຍາດທາງກຳມະພັນ, ຮີໂມຟີເລຍ ຫລື ອາການເລືອດໄຫລບໍ່ຢຸດ ເຮັດໃຫ້ມີອາການເລືອດອອກງ່າຍ ແລະ  ຢຸດຍາກ.

     3. ອາການທີ່ສະໝອງໄດ້ຮັບການກະທົບກະເທືອນຈົນເສັ້ນເລືອດໃນສະໝອງຈີກຂາດ ເຊັ່ນ : ໂຍນ, ຊິກ, ຈັບສັ່ນ, ສັ່ນແຮງໆ ອາດເຮັດໃຫ້ເກີດອາການເລືອດອອກໃນສະໝອງໄດ້.

     ສຳລັບວິທີສັງເກດອາການໃນເບື້ອງຕົ້ນ ສາມາດສັງເກດອາການໄດ້ຈາກບໍລິເວນຫົວຂອງເດັກ ຖ້າຂະໝ່ອມບວມໃຄ່, ຮ້ອງໄຫ້ຫລາຍກ່ວາປົກກະຕິ, ກິນນົມໜ້ອຍ, ເຈັບຫົວ, ເຊື່ອງຊຶງ, ປຸ້ນທ້ອງປວດຮາກ ຫລື ຮາກອອກ ຄວນໃຫ້ກິນຢາແກ້ປວດ ແລະ ໃຫ້ນອນພັກຜ່ອນ ໂດຍໝັ່ນສັງເກດອາການເປັນໄລຍະໆ ຖ້າເດັກຍັງມີອາການເຈັບຫົວຄວນຟ້າວພາໄປພົບແພດເພື່ອບົ່ງມະຕິຕໍ່ໄປ, ແຕ່ຫາກເປັນກຸ່ມເດັກທີ່ເປັນພະຍາດຮໍໂມຟິເລຍ ຖ້າມີອາການເຈັບຫົວ ຫລື ໄດ້ຮັບການກະທົບກະແທກພຽງເລັກນ້ອຍ ຄວນຮີບຟ້າວພາໄປພົບແພດໂດຍໄວ.