ສປປ ເກົາຫລີ ຂໍໃຫ້ຖອດລັດຖະມົນຕີຕ່າງປະເທດ ອາເມລິກາອອກຈາກຄະນະເຈລະຈານິວເຄຼຍ
ເຈົ້າໜ້າທີ່ ສປປ ເກົາຫລີ ລະດັບສູງ ຮຽກຮ້ອງໃນວັນທີ 18 ເມສາ ໃຫ້ຖອດທ່ານ ໄມ ປອມເປໂອ ລັດຖະມົນຕີຕ່າງປະເທດອາເມລິກາ ອອກຈາກການເຈລະຈານິວເຄຼຍທີ່ຢຸດສະງັກ ລະຫວ່າງ ສປປ ເກົາຫລີ ກັບ ອາເມລິກາ ໂດຍກ່າວຫາວ່າ: ທ່ານເປັນສາເຫດເຮັດໃຫ້ການເຈລະຈາລົ້ມ.
ສຳນັກຂ່າວ KCNA ຂອງທາງການ ສປປ ເກົາຫລີ ລາຍງານອ້າງທ່ານ ວອນ ຈົງກອນ ອະທິບໍດີກົມອາເມລິກາ ກະຊວງການຕ່າງປະເທດ ສປປ ເກົາຫລີ ກ່າວວ່າ: ທ່ານຢ້ານວ່າຖ້າທ່ານ ປອມເປໂອ ຍັງເຂົ້າຮ່ວມການເຈລະຈາອີກ ຈະເຮັດໃຫ້ໂຕະເຈລະຈາລົ້ມອີກຄັ້ງ ແລະ ຈະມີບັນຫາຫຍຸ້ງຍາກອີກ. ເຈົ້າໜ້າທີ່ ສປປ ເກົາຫລີ ກ່າວວ່າ: ໃນກໍລະນີຮື້ຟື້ນການເຈລະຈາຂຶ້ນອີກຄັ້ງ ທ່ານຂໍວ່າຄູ່ເຈລະຈາຈະບໍ່ແມ່ນທ່ານ ປອມເປໂອ ໂດຍຂໍໃຫ້ເປັນບຸກຄົນທີ່ມີຄວາມຮອບຄອບ ແລະ ມີວຸດທິພາວະໃນການສື່ສານກັນ. ທ່ານ ວອນ ເຕືອນວ່າ: ຖ້າອາເມລິກາຍັງບໍ່ແກ້ໄຂບັນຫາຕົ້ນເຫດ ຈະເຮັດໃຫ້ ສປປ ເກົາຫລີ ເຂົ້າສູ່ການຄອບຄອງອາວຸດນິວເຄຼຍ ແລະ ບໍ່ມີໃຜທີ່ຈະຄາດເດົາສະຖານະການຢູ່ແຫລມເກົາຫລີໄດ້. ເຖິງຢ່າງໃດກໍຕາມ, ທ່ານ ວອນ ບອກວ່າ: ໂຊກດີທີ່ທ່ານ ກິມ ຈ໋ອງອຸນ ຜູ້ນຳ ສປປ ເກົາຫລີ ແລະ ປະທານາທິບໍດີ ໂດນັລ ທຣຳ ຂອງອາເມລິກາ ເປັນຄູ່ເຈລະຈາທີ່ດີ ເຖິງວ່າການເຈລະຈານິວເຄຼຍຍັງຢຸດສະງັກກໍຕາມ.
