4 ແນວຄິດສ້າງທຸລະກິດທີ່ໝັ້ນຄົງ

     1. ເລີ່ມຕົ້ນລົງທຶນຕັ້ງແຕ່ອາຍຸຍັງນ້ອຍ : ອາຍຸນ້ອຍຮ້ອຍລ້ານໃນໄວ 30 ປາຍປີ ເກີດຂຶ້ນຫລວງຫລາຍ ເພາະພວກເຂົາຮູ້ຈັກລົງທຶນກິດຈະການນ້ອຍໆສ່ວນໂຕຕັ້ງແຕ່ຮຽນຈົບໃໝ່ ຈະສ້າງລາຍຮັບໄດ້ຫລາຍໜ້ອຍປານໃດກໍຕ້ອງຮູ້ຈັກເຮັດ ເພາະພວກເຂົາອາຍຸຍັງນ້ອຍ ເມື່ອລົ້ມກໍມີໂອກາດເລີ່ມຕົ້ນໃໝ່ໄດ້ສະເໝີ. ເພາະໃນໂລກນີ້ຫາໜ້ອຍບໍລິສັດທີ່ມີຄວາມໝັ້ນຄົງເກີນ 50 ປີ ຈຶ່ງຈະມີ, ແຕ່ເມື່ອເຖິງຮຸ່ນຂອງເຮົາກໍອາດບໍ່ເປັນໄປດັ່ງທີ່ຄິດ ເພາະໂລກປ່ຽນແປງຢູ່ຕະຫລອດ ເຕັກໂນໂລຊີໃໝ່, ການແຂ່ງຂັນໃໝ່ທີ່ຈະເຮັດ ໃຫ້ທຸລະກິດເກົ່າ ເຊິ່ງປັບໂຕຍາກ ບໍ່ສາມາດກ້າວຂ້າມຜ່ານເສັ້ນແຫ່ງການປ່ຽນແປງໄປໄດ້, ແຕ່ຖ້າເປັນທຸລະກິດສ່ວນໂຕຂອງທ່ານເອງ ທ່ານເລືອກໄດ້ວ່າສິ່ງໃດແມ່ນອະນາຄົດ ຍິ່ງເປັນທຸລະກິດຂະໜາດນ້ອຍແລ້ວ ການປັບໂຕຍິ່ງງ່າຍ ມີໂອກາດລອດພົ້ນຈາກການປ່ຽນແປງໃນອະນາຄົດໄດ້ອີກ.

     2. ເລີ່ມຈາກຈຸດນ້ອຍໆ ເພື່ອຄວາມໝັ້ນຄົງໃນອະນາຄົດ : ຊີວິດຈະໝັ້ນຄົງຮັ່ງມີໄດ້ເກີດຈາກການທີ່ເຮົາໄດ້ວຽກທີ່ມີເງິນເດືອນສູງ, ແຕ່ເກີດຈາກສະແຫວງຫາຊ່ອງທາງສ້າງລາຍຮັບອື່ນໆຫລາຍກ່ວາ 1 ຊ່ອງທາງ ຫລາຍຄົນເຊື່ອວ່າຈະລົງທຶນທັງເທື່ອຕ້ອງເຮັດໃຫ້ດີໄປເລີຍ ເປັນຄວາມຄິດທີ່ຖືກສ່ວນໜຶ່ງ, ແຕ່ມີຄວາມສ່ຽງຫລາຍເກີນໄປ ເພາະປັດໄຈທີ່ຈະເຮັດໃຫ້ທຸລະກິດຂອງທ່ານປະສົບຄວາມສຳເລັດນັ້ນມີຫລວງຫລາຍ ຕັ້ງແຕ່ທຳເລທີ່ຕັ້ງ, ສິນຄ້າ ໄປຈົນເຖິງລະບົບການບໍລິຫານພາຍໃນ ນັ້ນແມ່ນສິ່ງທີ່ທ່ານຄວນຮຽນຮູ້ຈາກການເຮັດທຸລະກິດຂະໜາດນ້ອຍກ່ອນທີ່ຈະໄປເຮັດທຸລະກິດຂະໜາດໃຫຍ່ໃຫ້ປະສົບຜົນສຳເລັດ. ດັ່ງນັ້ນ ການລົງທຶນທຸລະກິດຂະໜາດນ້ອຍທີ່ທ່ານສາມາດຫາເວລາເຮັດໄປພ້ອມໆກັບວຽກປະຈຳທີ່ເຮັດຢູ່ເປັນສິ່ງທີ່ຄົນຮຸ່ນໃໝ່ ຄວນຫາຊ່ອງທາງເຮັດໃຫ້ຫລາຍທີ່ສຸດ ອາດຈະບໍ່ໄດ້ຢູ່ໃນຮູບແບບຂອງຮ້ານຄ້າ, ການຮັບວຽກເສີມກໍຖືວ່າເປັນທຸລະກິດສ່ວນໂຕຂອງທ່ານໄດ້ຄືກັນ ເຊິ່ງຈະເຫັນປະໂຫຍດຫລາຍທີ່ສຸດຕອນທີ່ທ່ານຖືກເຊົາຈ້າງ.

     3. ລົງທຶນໃນທຸລະກິດທີ່ລູກຫລານໄດ້ສານຕໍ່ : ການສ້າງຄວາມໝັ້ນຄົງທີ່ດີທີ່ສຸດຂອງຊີວິດຄືການເຮັດໃຫ້ຄອບຄົວມີຄວາມໝັ້ນຄົງ ບໍ່ສ້າງບັນຫາໃຫ້ກັບຄອບຄົວຂອງໂຕເອງ, ແຕ່ຈະດີທີ່ສຸດຫາກເຮົາລົງທຶນເຮັດທຸລະກິດທີ່ສາມາດສົ່ງຕໍ່ໃຫ້ກັບລູກຫລານໄດ້ ເຜື່ອມື້ໜຶ່ງເຮົາບໍ່ຢູ່ແລ້ວ ຄົນຂ້າງຫລັງກໍຍັງສາມາດດຳເນີນການຕໍ່ໄປໄດ້ດ້ວຍໂຕເອງ. ດັ່ງນັ້ນ, ທຸລະກິດທີ່ເຮົາຄວນລົງທຶນ ຄວນເປັນທຸລະກິດທີ່ຮຽນຮູ້ງ່າຍ ບໍ່ແມ່ນມີແຕ່ໂຕເຮົາທີ່ເຮັດໄດ້ ເຊັ່ນ : ທຸລະກິດຄ້າຂາຍ, ທຸລະກິດຂາຍສົ່ງ ສາມາດຝຶກຝົນຮຽນຮູ້ໄດ້ງ່າຍ,​ ແຕ່ຖ້າແມ່ນທຸລະກິດວຽກທີ່ຕ້ອງໃຊ້ແຮງ ແລະ ທັກສະສະເພາະດ້ານ, ໃຊ້ຄວາມມັກສ່ວນບຸກຄົນກໍຈະມີຄວາມສ່ຽງທີ່ທຸລະກິດນັ້ນຈະຈົບພຽງຄົນໜຶ່ງຮຸ່ນ.

4. ຂະຫຍາຍການລົງທຶນສະເໝີ:  ເມື່ອມື້ໜຶ່ງທ່ານມີທຸລະກິດຂອງໂຕເອງທີ່ມີຄວາມໝັ້ນຄົງແລ້ວ ກ້າວຕໍ່ໄປບໍ່ແມ່ນການຢຸດນິ້ງແລ້ວລໍຖ້າຮັບເງິນ, ແຕ່ຄວນລົງທຶນຕື່ມອາດຈະຢູ່ໃນຮູບແບບຂອງສິນຄ້າໃໝ່, ຂະຫຍາຍສາຂາ ຫລື ເລີ່ມທຸລະກິດໃໝ່, ແຕ່ສ່ວນຫລາຍແລ້ວ ເຮົາຈະຂະຫຍາຍທຸລະກິດດ້ວຍການແຕກຂະແໜງສິນຄ້າ ແລະ ສາຂາຫລາຍກ່ວາການເລີ່ມທຸລະກິດໃໝ່ ດ້ວຍເຫດຜົນດັ່ງນີ້ :

     ການເຮັດທຸລະກິດໃໝ່ຈະເຮັດໃຫ້ເຮົາເສຍເວລາໄປລົງທຶນຮຽນຮູ້ສິ່ງໃໝ່ ເຊິ່ງອາດຈະໃຊ້ເວລາບໍ່ໜ້ອຍກ່ວາ 2 ປີກ່ວາຈະເຂົ້າທີ່ ເຊິ່ງບໍ່ຮູ້ວ່າຈະປະສົບຄວາມສຳເລັດຫລື ບໍ່ເວັ້ນແຕ່ວ່າທ່ານຈະເຫັນວ່າທຸລະກິດນັ້ນມີອະນາຄົດທີ່ດີແທ້ໆແລ້ວ ກົງກັບຄວາມຮູ້ຄວາມສາມາດຂອງທ່ານນຳອີກ.

     ຖ້າຫາກທ່ານເລີ່ມຄິດຫາສິນຄ້າໃໝ່ໆເຂົ້າມາຢູ່ໃນທຸລະກິດຂອງທ່ານ ຈະຊ່ວຍເພີ່ມລາຍຮັບໄດ້ງ່າຍຢ່າງຈະແຈ້ງ ສົມມຸດວ່າທ່ານເປີດຮ້ານກາເຟ ລອງຄິດສູດໃໝ່ໃຫ້ເປັນລາຍການທຳມະຊາດ, ແຕ່ຫາກບໍ່ໝັ້ນໃຈວ່າລາຍການນັ້ນຈະເປັນສັນຍະລັກໄດ້ ໃຫ້ເຮັດເປັນລາຍການພິເສດ ຫລື ລາຍການປະຈຳລະດູການ ໃຫ້ລູກຄ້າລອງກ່ອນ ຄືກັບການຕະຫລາດຂອງເຄື່ອງດື່ມທີ່ມີລົດຊາດປະຈຳລະດູການອອກມາເປັນເອກະລັກສະເພາະ ເຊິ່ງບາງລົດຊາດກໍຜ່ານ, ບາງລົດຊາດກໍຂໍຊີມແຕ່ເທື່ອດຽວ ຫາກມີສຽງຕອບ ຮັບດີ ເຮົາກໍຈະໄດ້ຊີມລົດຊາດນັ້ນ ທຸກປີ ຫລື ຈະເອົາລາຍການນັ້ນມາ ນຳສະເໜີຂາຍໃນຊື່ລາຍການໃໝ່ ເຊິ່ງທ່ານເອງກໍໃຊ້ວິທີການດຽວກັບຮ້ານກາເຟຂອງທ່ານໄດ້ຄືກັນ. ໃນກໍລະນີທີ່ທ່ານຂະຫຍາຍສາຂາຕ້ອງເບິ່ງເງິນທຶນຂອງທ່ານນັ້ນຫລາຍພໍ ຈະເຮັດໃຫ້ທຸລະກິດໃໝ່ນັ້ນຢູ່ໄດ້ເກີນປີ ໂດຍບໍ່ໃຊ້ເງິນຈາກຮ້ານເກົ່າມາຊ່ວຍຫລືບໍ່ ຖ້າໄດ້ຈຶ່ງຄ່ອຍລົງທຶນ ເຖິງຈະລຳບາກໃນໄລຍະທຳອິດ ແຕ່ຢ່າງໜ້ອຍດ້ວຍປະສົບການທີ່ທ່ານມີຈະຊ່ວຍແກ້ບັນຫາໄດ້ບໍ່ຍາກປານໃດ.

    ສິ່ງທີ່ຕ້ອງຮຽນຮູ້ເພີ່ມຕື່ມກໍແມ່ນພຶດຕິກຳຜູ້ບໍລິໂພກຂອງແຕ່ລະທ້ອງຖິ່ນນັ້ນບໍ່ຄືກັນ ຢ່າລືມສຳຫລວດຄວາມຕ້ອງການຂອງລູກຄ້າກ່ອນເປີດ ຈະຊ່ວຍຫລຸດຄວາມສ່ຽງໃນທຸລະກິດຂອງທ່ານທີ່ຈະເກັບກ່ຽວໄປເຖິງມື້ກະສຽນໄດ້.