ເອເຣຣາ ຕົກລົງຢູ່ກັບ ປາຣີ 3 ປີ
ເດິ ທາມ ສື່ຍັກໃຫຍ່ ລາຍງານວ່າ: ອັນເດຣ ເອເຣຣາ ມິດຟິລຄົນສຳຄັນ ແມນເຊັສເຕີ ຢູໄນເຕັດ ກຽມໄປຫລິ້ນໃຫ້ ປາຣີ ແຊງແຊກແມງ ຫລັງນັກເຕະຕົກລົງຍ້າຍໄປຢູ່ກັບທີມ ດ້ວຍສັນຍາ 3 ປີ ພ້ອມຮັບເງິນເຂົ້າກະເປົາຫລາຍກວ່າໄດ້ຮັບຈາກ ແມນຢູ ເກືອບ 3 ເທົ່າ.
ອັນເດ ເອເຣຣາ ກອງກາງຊາວສະເປນ ກຽມຍົກມືລາ ແມນເຊັສເຕີ ຢູໄນເຕັດ ໃນຊ່ວງໜ້າຮ້ອນນີ້ ຫລັງນັກເຕະຕົກລົງຍ້າຍໄປຫລິ້ນກັບ ປາຣີ ແຊງແຊກແມງ ມະຫາອຳນາດລີກ ເອິງ ຝຣັ່ງ ດ້ວຍສັນຍາ 3 ປີ ພ້ອມຮັບຄ່າເມື່ອຍ 200.000 ປອນຕໍ່ອາທິດ.
ດາວເຕະເລືອດສະເປນ ຕົກເປັນຂ່າວກ່ຽວກັບການເກັບເຄື່ອງອອກຈາກຖິ່ນໂອລ ແທຣັບຟອດ ມາຕະຫລອດໄລຍະຫລາຍອາທິດຜ່ານມາ ຫລັງຈາກບໍ່ສາມາດຫາຂໍ້ຕົກລົງເລື່ອງການຂະຫຍາຍສັນຍາສະບັບໃໝ່ກັບ ແມນເຊັສເຕີ ຢູໄນເຕັດ ໄດ້ ແລະ ຫລ້າສຸດ ເອເຣຣາ ໄດ້ໃຫ້ສຳພາດວ່າ: ຕົນກັບຕົ້ນສັງກັດຄິດບໍ່ຄືກັນ ເຮັດໃຫ້ສະຖານະການເລື່ອງຕໍ່ສັນຍາຍິ່ງຍາກເປັນທະວີຄູນ.
ຫລ້າສຸດ ເດິ ທາມ ໄດ້ເປີດເຜີຍເລື່ອງສຳຄັນວ່າ: ຕອນນີ້ ເອເຣຣາ ກຽມຢຸດໄລຍະເວລາ 5 ປີກັບ ແມນເຊັສເຕີ ຢູໄນເຕັດ ຫລັງຈາກທີ່ນັກເຕະໄດ້ຕົກລົງເງື່ອນໄຂສ່ວນຕົວກັບ ຜູ້ນຳຝູງລີກສູງສຸດເມືອງນ້ຳຫອມຮຽບຮ້ອຍແລ້ວ ໂດຍຈະຢູ່ຫລິ້ນກັບ ເປແອສເຊ ໄປຈົນຮອດປີ 2022.
ກອງກາງຊາວສະເປນ ໄວ 29 ປີ ເຊິ່ງຈະໝົດສັນຍາກັບທີມຫລັງຈົບລະດູການນີ້ ໄດ້ຮັບຄ່າເມື່ອຍຈາກ ແມນເຊັສເຕີ ຢູໄນເຕັດ ຈຳນວນ 80.000 ປອນຕໍ່ອາທິດ ຈະໄດ້ຮັບຄ່າເມື່ອຍຈາກທີມຂອງຜູ້ຈັດການທີມ ໂທມັສ ທູເຄິລ ປະມານ 200.000 ປອນຕໍ່ອາທິດ.
ທັງນີ້ ດາວເຕະຊາວສະເປນ ຍ້າຍຈາກ ແອດເລຕິກ ບິລເບົາ ມາຫລິ້ນກັບ ແມນເຊັສເຕີ ຢູໄນເຕັດ ດ້ວຍຄ່າຕົວ 29 ລ້ານປອນ ໃນປີ 2014 ແລະ ລົງສະນາມໃຫ້ກັບ ເຣັດ ເດວິລ ໄປແລ້ວ 187 ເກມ ພ້ອມຍິງໄດ້ 20 ປະຕູ.
