ຂໍຊ່ວຍທີມກ່ອນ ! ມາຕ້າ ເຜີຍຍັງບໍ່ສົນ ເລື່ອງຕໍ່ສັນຍາໃໝ່ກັບ ແມນຢູ
ຂວນ ມາຕ້າ ມິດຟິລ ແມນເຊັສເຕີ ຢູໄນເຕັດ ອອກມາເວົ້າເຖິງອະນາຄົດຂອງຕົນເອງ ໂດຍບອກວ່າ: ຕອນນີ້ໃຫ້ຄວາມສົນໃຈເລື່ອງຊ່ວຍຕົ້ນສັງກັດເທົ່ານັ້ນ, ສ່ວນເລື່ອງຕໍ່ສັນຍາຍັງບໍ່ຢູ່ໃນຫົວ ເຖິງວ່າລາວຈະໝົດສັນຍາກັບທີມໃນຊ່ວງໜ້າຮ້ອນນີ້ແລ້ວກໍຕາມ.
ຂວນ ມາຕ້າ ກອງກາງຄົນດັງຂອງ ແມນເຊັສເຕີ ຢູໄນເຕັດ ຍອດສະໂມສອນແຫ່ງວົງການ ພຣີເມຍລີກ ອັງກິດ ເປີດເຜີຍວ່າ: ຕົນຍັງບໍ່ສົນໃຈກ່ຽວກັບເລື່ອງການຕໍ່ສັນຍາຂອງຕົນເອງ ເພາະຢາກໃຫ້ຄວາມສຳຄັນຕໍ່ການຊ່ວຍທີມພຽງຢ່າງດຽວເທົ່ານັ້ນ.
ນັກເຕະໄວ 30 ປີ ຈະໝົດສັນຍາກັບ ແມນເຊັສເຕີ ຢູໄນເຕັດ ໃນວັນທີ 30 ມິຖຸນານີ້ ເຊິ່ງຄວາມຈິງແລ້ວ ແມນເຊັສເຕີ ຢູໄນເຕັດ ກໍເຈລະຈາເລື່ອງສັນຍາສະບັບໃໝ່ກັບລາວມາໂດຍຕະຫລອດ ແຕ່ຍັງຄາບັນຫາໃຫຍ່ຈາກການທີ່ ມາຕ້າ ຢາກໄດ້ສັນຍາທີ່ມີໄລຍະເວລາຢ່າງໜ້ອຍ 2 ປີ. ຂະນະທີ່ ຍອດທີມແຫ່ງຖິ່ນ ໂອລ ແທຣັບຟອດ ມີນະໂຍບາຍຈະໃຫ້ສັນຍາສະບັບໃໝ່ກັບນັກເຕະໄວ 30 ປີຂຶ້ນໄປພຽງປີດຽວເທົ່ານັ້ນ.
ຈາກການທີ່ລາວເຫລືອສັນຍາກັບ ແມນເຊັສເຕີ ຢູໄນເຕັດ ພຽງບໍ່ເທົ່າໃດເດືອນ ເຮັດໃຫ້ ມາຕ້າ ສາມາດເຈລະຈາເລື່ອງຍ້າຍທີມແບບບໍ່ມີຄ່າຕົວລ່ວງໜ້າກັບທີມຈາກຕ່າງແດນໄດ້ທັນທີ ເຊິ່ງໄລຍະຜ່ານມາມີຂ່າວລືວ່າ: ບາເຊໂລນາ ໃຫ້ຄວາມສົນໃຈທີ່ຈະດຶງລາວໄປຮ່ວມທີມ.
