ສະຫລອງບຸນປີໃໝ່ຢ່າງສະຫງົບປອດໄພໄດ້ຄວາມສາມັກຄີ
ໂດຍ: ທິດກ່ຳ
ຍັງອີກບໍ່ພໍເທົ່າໃດວັນກໍ ຈະຮອດບຸນປີໃໝ່ລາວອັນ ເປັນບຸນປະເພນີປະຈຳຊາດ ທີ່ສືບທອດກັນມາແຕ່ບັນພະບູຫລຸດ. ບຸນປີໃໝ່ລາວເຮົາ ຫລື ບຸນກຸດສົງການສົ່ງທ້າຍປີ ເກົ່າຕ້ອນຮັບປີໃໝ່ ປະຈຳປີ ພສ 2562 ນີ້ພໍດີກັບວັນທີ 14-15-16 ເດືອນເມສາ (4) ປີ 2019 ຕາມປະຕິທຶນ ສາກົນ ແລະ ກົງກັບມື້ຂຶ້ນ 10-11-12 ຄ່ຳຂອງເດືອນ 5 ລາວ ພສ 2562.
ສຳລັບປີນີ້ເຮົາເຫັນວ່າ ມັນມີຄວາມໝາຍ ແລະ ຄວາມສຳຄັນຍ້ອນວ່າເປັນ ປີທ່ອງທ່ຽວລາວ-ຈີນ ແຂກຕ່າງດ້າວທ້າວຕ່າງແດນ ໂດຍສະເພາະແມ່ນນັກທ່ອງທ່ຽວຈາກປະເທດຈີນກໍອາດຈະໄດ້ເຂົ້າມາທ່ຽວລາວເຮົາຢ່າງຫລວງຫລາຍ ເຊິ່ງຕາມຄາດກະໄວ້ຕ້ອງໃຫ້ໄດ້ໜຶ່ງລ້ານຄົນ.
ແນວໃດກໍດີ, ຕາມເຮົາວ່າຈຸດພິເສດຂອງບຸນປີໃໝ່ ລາວເຮົານອກຈາກເຮັດບຸນສິນກິນທານຕາມຮິດຄອງປະເພນີແລ້ວ ຍັງມີການຫົດ ສົງນ້ຳ, ມີການຫລິ້ນການກິນມ່ວນຊື່ນທີ່ຫລາກຫລາຍສີສັນ, ຖ້າຈະກ່າວເຖິງເນື້ອໃນສະເພາະໃນສິ່ງທີ່ດີໆ ທີ່ໄດ້ສືບທອດກັນມານັ້ນກໍສຸດທີ່ ຈົບງາມ, ມີເອກະລັກ ແລະ ມີຄວາມໝາຍທາງດ້ານຊີວິດ, ວັດທະນະທຳ ແລະ ຮີດຄອງ ປະເພນີອັນດີງາມຂອງຊາດ ເປັນຕົ້ນຢູ່ ຕາມວັດວາອາຮາມກໍມີການປະດັບປະດາຕົບແຕ່ງ, ຕັ້ງກອງບຸນສະ ຫລອງມີການໄຫວ້ພະຮັບສິນ, ເອົາພະພຸດທະຮູບ ແລະ ພະສົງລົງຫົດສົງ ແລະ ກິ ຈະກຳອື່ນໆ.
ສ່ວນຢູ່ທາງຄອບຄົວ ບ້ານເຮືອນຜູ້ມີສັດທາຫລາຍກໍມີການເຮັດບຸນເຮືອນ, ທຳພິທີບາສີສູ່ຂວັນສົມມັດສົມ ມາພໍ່ແມ່, ເຖົ້າແກ່, ຜູ້ອາຍຸສູງ ໃນວົງຕະກູນຫລືຢູ່ຄອບຄົວ ເຮືອນຊານ, ຢູ່ຕາມສຳນັກ ງານອົງການ ກໍມີການຈັດ ຕັ້ງ ອວຍພອນ, ສະຫລຸບວຽກງານ, ມີພິທີບາສີສູ່ຂວັນ, ຫົດສົງກັນດ້ວຍບັນຍາກາດມ່ວນຊື່ນຄຶກຄື້ນ.
ສິ່ງທີ່ກ່າວມາທັງໝົດ ນີ້ແມ່ນບັນດາປັດໄຈ ແລະ ເນື້ອໃນອັນດີງາມຍອດຍິ່ງ ຂອງບຸນປີໃໝ່ລາວທີ່ມີເອກະ ລັກປະຈຳຊາດ. ແຕ່ອີກສິ່ງໜຶ່ງທີ່ຂາດບໍ່ໄດ້ນັ້ນແມ່ນ ການພົບປະສັງສັນ, ການຫລິ້ນກິນຊຸມແຊວມ່ວນຊື່ນ ຕາມເງື່ອນໄຂ ແລະ ປັດໄຈ ທາງດ້ານເສດຖະກິດຂອງ ແຕ່ລະຄົນ, ແຕ່ລະຄອບຄົວຂອງທ້ອງຖິ່ນ ແລະ ສັງຄົມ.
ດ້ວຍສາເຫດ ທີ່ກ່າວມາ ນີ້, ຈຶ່ງກໍ່ໃຫ້ເກີດມີການກິນ- ການດື່ມ, ຜູ້ດື່ມຫລາຍກິນໜ້ອຍ, ຜູ້ກິນໜ້ອຍດື່ມຫລາຍ ຈົນໃຫ້ມີຜົນກະທົບຕາມມາ ເປັນຕົ້ນດື່ມເຫລົ້າເມົາແລ້ວ ຂັບລົດ, ເກີດອຸປະຕິເຫດໃນ ທາງຖະໜົນ, ບາງກໍລະນີ ເກີດມີການຜິດຖຽງກັນ, ເອົານ້ຳເປີະເປື້ອນຫົດສົງກັນ, ເອົານ້ຳໃສ່ຖົງຢາງດຶກ ແກວ່ງ ໃສ່ກັນ ຫລື ບາງຄົນມ່ວນຊື່ນຂຶ້ນໃຈຫລາຍກໍເອົານ້ຳສີ, ນ້ຳກ້ອນດຶກແກວ່ງໃສ່ລົດ ທີ່ພວມແລ່ນຈົນເຮັດໃຫ້ ແວ່ນລົດແຕກແລ້ວກໍເກີດ ມີອາລົມຈິດເວົ້າວ່າຜິດຖຽງກັນ.
ນີ້ຄືສິ່ງທີ່ໄດ້ເຫັນໃນ ແຕ່ລະປີຜ່ານມາ ແລະ ພວກເຮົາຄວນຫລີກເວັ້ນໃນໄລຍະສະຫລອງປີໃໝ່, ຈາກສາເຫດ ແລະ ປາກົດການທັງໝົດທີ່ກ່າວມາຂ້າງເທິງນີ້ໃນແຕ່ລະປີສິ່ງທີ່ປະຕິເສດບໍ່ໄດ້ກໍຄືຕ້ອງມີຄົນເຈັບ, ຄົນຕາຍ, ຜູ້ເຈັບໜ້ອຍເຈັບຫລາຍ ສຸດທ້າຍມາແທນທີ່ພວກເຮົາຈະໄດ້ບຸນກໍເລີຍໄດ້ບາບ, ນີ້ຄືປາກົດການຫຍໍ້ທໍ້ທີ່ມັກຈະ ເກີດຂຶ້ນໃນໄລຍະບຸນປີ ໃໝ່ໃນແຕ່ລະປີຂອງສັງຄົມບ້ານ ເມືອງເຮົາໃນປັດຈຸບັນ.
ເຖິງຢ່າງໃດກໍດີ, ຕາມທິດກ່ຳວ່າເພື່ອຕ້ານ ແລະ ສະກັດກັ້ນທັງຈຳກັດບັນດາປາ ກົດການຫຍໍ້ທໍ້ຕ່າງໆ ທີ່ອາດ ຈະເກີດຂຶ້ນໃຫ້ມີໜ້ອຍທີ່ສຸດ ຫລື ກ້າວໄປ ເຖິງບ່ອນ ວ່າບໍ່ມີ, ທາງການເຮົາກໍໄດ້ ມີຄຳສັ່ງແນະນຳຕັກເຕືອນ ແລະ ວາງຂໍ້ເກືອດຫ້າມຕ່າງໆ ໃຫ້ທຸກພາກສ່ວນ, ທຸກຄົນປະຕິບັດຢ່າງເຂັ້ມງວດເຊັ່ນ: ຢູ່ນະຄອນຫລວງວຽງຈັນ ເຮົາກໍໄດ້ອອກ 4 ຂໍ້ຫ້າມຄື: ຫ້າມດື່ມສິ່ງມືນເມົາແລ້ວຂັບລົດ, ຫ້າມໃຊ້ ນ້ຳເປື້ອນ, ນ້ຳສີ, ນ້ຳຄັນຄາຍ, ນ້ຳກ້ອນແກວ່ງໃສ່ກັນ, ຫ້າມຕັນການສັນຈອນ ຫລື ລັດລົດຫົດນ້ຳຕາມເສັ້ນທາງ ແລະ ຫ້າມເປີດສຽງເພງດັງລົບກວນບຸກຄົນອື່ນ. ກໍຂໍໃຫ້ປີ ໃໝ່ປີນີ້ຈົ່ງກາຍເປັນປີສະຫງົບປອດໄພໄດ້ຄວາມສາມັກຄີຈາກຄົນລາວຜູ້ຮັກຫອມກັນທົ່ວທັງປະເທດ./.
