ບັນຫາສັງຄົມອອນລາຍໃນຍຸກໂລກແຕກ
ໂດຍ: ທິດກ່ຳ
ໃນສັງຄົມເຮົາຍຸກປັດຈຸບັນ ບໍ່ວ່າຢູ່ປະເທດໃດສື່ອອນລາຍໄດ້ແທງເຂົ້າໝາກຫົວໃຈຂອງຄົນເຮົາທົ່ວທັງໂລກ, ສິ່ງ ທີ່ໜ້າໜັກໃຈກວ່າໝູ່ໃນອະນາຄົດຕໍ່ໜ້າຢ້ານວ່າເກີດພະຍາດໃດໜຶ່ງຍ້ອນຄົນສ່ວນຫລາຍ ໃຜກໍມີແຕ່ພາກັນກົ້ມເປັນໃຫຍ່.
ອັນສຳຄັນທີ່ສຸດສື່ອອນ ລາຍມັນກາຍເປັນຫູແກ້ວຕາທີບ ທັງວ່ອງໄວທັນໃຈ, ຢາກເຫັນຫຍັງກໍໄດ້ເຫັນ, ຢາກເບິ່ງ ຫຍັງກໍໄດ້ເບິ່ງ, ມີທັງອັນດີ, ອັນຮ້າຍ, ທັງໂສກເສົ້າ ແລະ ມ່ວນຊື່ນເຮຮາ.
ນອກຈາກນັ້ນ, ຖ້າຕ້ອງການຢາກຮູ້ເລື່ອງໃດ, ຢາກເບິ່ງເລື່ອງຫຍັງ ກໍກົດເຂົ້າໄປຊອກຫາກໍຈະໄດ້ຮັບການ ຕອບສະໜອງຢ່າງທັນໃຈ ແລະ ເພິ່ງພໍໃຈ, ສະຫລຸບແລ້ວ ໃນໂທລະທັດໜ່ວຍໜຶ່ງໆກໍ ປຽບເໝືອນອາຈານຜູ້ຍິ່ງ ໃຫຍ່ທີ່ສາມາດເຮັດໃຫ້ເຮົາມີຄວາມຮູ້ ແລະ ເກີດຄວາມສັດທາມີຄວາມຮູ້ສຶກທີ່ຫລາກຫລາຍຂໍແຕ່ວ່າພວກເຮົາຊ່າງ ເຮັດຊ່າງທຳ, ຊ່າງຊອກຊ່າງຫາ ແລະ ເກີດສັດທາກັບສິ່ງເຫລົ່ານັ້ນ.
ໃນຍຸກປັດຈຸບັນ, ເຂົາເອີ້ນວ່າຍຸກໂລກແຕກຍຸກຂໍ້ມູນຂ່າວສານທີ່ວ່ອງໄວທັນ ສະໄໝໄຮ້ທຽມທານ, ສັງຄົມເຮົາມີຄວາມຈະເລີນກ້າວໜ້າພັດທະນາໄປຫລາຍເທົ່າໃດເຕັກໂນໂລຊີ ກໍຍິ່ງລ້ຳຍຸກ, ບັນດາຂໍ້ມູນຂ່າວສານກໍຍິ່ງຫລາກຫລາຍສີສັນນີ້ລະຄື ວິວັດທະນາການຂອງສັງຄົມມະນຸດເປັນຜູ້ສ້າງປະຫວັດສາດ ແລະ ສ້າງໂລກ.
ໃນອະນາຄົດຕໍ່ໜ້າເຮົາ ຄິດວ່າໂລກຂອງເຮົາຈະເລີນໄປໄກເທົ່າໃດ, ໃນດ້ານເຕັກໂລຊີ ຫລື ບັນດາປາກົດການ, ນັບທັງຄວາມຕ້ອງ ການຂອງມະນຸດເຮົາ ກໍຍິ່ງຫລາກຫລາຍເຊື່ອມໂຍງກາຍເປັນຍຸກຫູແກ້ວຕາທິບ, ຍຸກມ້າປົ່ງເຂົາເສົາອອກ ດອກ, ມະນຸດເຮົາຍິ່ງສາມາດດຳດິນບິນບົນ ແລະ ເຫາະເຫີນເດີນອາກາດປານມ້າມະນີກາບຕ້ອງການ ຢູ່ໃສໄປມາທາງໃດ ກໍວ່ອງໄວປານຈະຫລວດ, ເຊິ່ງມັນກໍບໍ່ແຕກຕ່າງຫຍັງ ກັບເທບນິຍາຍໄດ້ກາຍມາເປັນຄວາມຈິງໃນຍຸກ ສະໄໝນີ້.
ແນວໃດກໍດີ, ຕາມເຮົາຄິດ ເຖິງວ່າສັງຄົມອອນລາຍມັນກັບກາຍມາເປັນສື່ ໃນຍຸກໃໝ່ທັນສະໄໝ ຫລື ວ່າ ໃນໂທລະສັບໜ່ວຍ ໜຶ່ງໆ ມັນມີຂໍ້ມູນເປັນແສນເປັນລ້ານ ແລະ ສາມາດເຮັດໄດ້ ທຸກຢ່າງທີ່ເຮົາຕ້ອງການແຕ່ ສິ່ງຕາມມາອາດຈະເຮັດໃຫ້ ເຮົາພາດພັງໄຂ່ວເຂວໃນບາງກໍລະນີ ກໍຍ້ອນການບໍລິ ໂພກສື່ອອນລາຍ.
ເຫດຜົນກໍມີຢູ່ວ່າ ໃນ ແຫລ່ງຂ່າວຂໍ້ມູນທີ່ມີໃນສື່ ອອນລາຍນັ້ນມັນມີທັງອັນດີ ແລະ ອັນຮ້າຍ, ອາດເປັນມີດ ສອງຄົມ, ຂໍ້ມູນທີ່ດີມີປະ ໂຫຍດລັກສະນະສ້າງສັນ ໃຫ້ຄວາມຮູ້ນັ້ນ ມັນກໍມາຈາກ ແຫລ່ງຂ່າວທີ່ມີຄວາມແນ່ນອນຈາກສຳນັກຂ່າວທາງ ການ, ມີການລົງທະບຽນ ທີ່ຖືກຕ້ອງຕາມລະບຽບກົດໝາຍ.
ສ່ວນແຫລ່ງຂ່າວຄາວ ທີ່ມາຈາກບຸກຄົນພວກເຮົາກໍຕ້ອງມີວິຈາລະນາຍານ ຫລື ວິເຄາະຮິ່ນຕອງຢ່າງຄັກແນ່ກ່ອນທີ່ຈະໄປຕົກຫລຸມໃຫ້ ຄົນບໍ່ດີຫລອກລວງຕົວະຍົວະໃຫ້ເປັນຄົນຫ່າງເຫີນ ຈາກຄວາມຈິງ.
ສິ່ງທີ່ໜ້າເປັນຫວ່ງໃນ ສື່ສັງຄົມອອນລາຍຍຸກ ປັດຈຸບັນ ແມ່ນບັນດາປາກົດການຫຍໍ້ທໍ້ ເຊັ່ນ: ບັນຫາການຄ້າມະນຸດ, ການຕົວະຍົວະຫລອກລວງຕົ້ມຕຸນ, ການໂຄສະນາຊວນເຊື່ອ, ໃສ່ຮ້າຍປ້າຍສີໃຊ້ຄຳເວົ້າຫຍາບຄາຍຕໍ່ບຸກຄົນອື່ນຂອງບຸກຄົນ ແລະ ກຸ່ມຄົນທີ່ຢູ່ນອກປະເທດໄດ້ສຸມໃສ່ເວົ້າວ່າ ໃສ່ຮ້າຍປ້າຍສີການນຳພາຂອງພັກ ແລະ ລັດຖະບານ ເຮົາ ມັນນັບມື້ຮຸນແຮງ ແລະ ປາກົດຕົວແຈ້ງອອກນັບມື້ ເປີດເຜີຍ.
ເຖິງຢ່າງໃດກໍດີ, ພວກເຮົາໃນຖານະເປັນຄົນລາວ, ເຊື້ອຊາດລາວ, ຮັກຜືນແຜ່ນ ດິນລາວ ມີພາສາປາກ ເວົ້າເປັນຂອງຕົນເອງ, ມີວັດທະນະທຳທີ່ເປັນເອກະລັກສະເພາະຂອງແຕ່ລະຊົນເຜົ່າ, ມີອະລິຍະທຳທີ່ສຸຂຸມເຢືອກເຢັນໂດດເດັ່ນໃນຂົງເຂດອາຊີອາຄະເນແຫ່ງນີ້ ຂໍຈົ່ງພ້ອມກັນອານຸລັກຮັກສາ, ມີຄວາມສາມັກຄີເປັນປຶກແຜ່ນ ແລະ ພ້ອມກັນນຳໃຊ້ ສື່ອອນລາຍໃນຍຸກໂລກແຕກ ໃຫ້ຜົນປະໂຫຍດສູງສຸດສຳ ລັບພວກເຮົາ.
