ສະຫລອງ​ປີ​ໃໝ່​ຕ້ອງ​ໃສ່​ໃຈ​ວັດທະນະທຳ

ແຕ່ລະຊາດແຕ່ລະເຜ່ົາພັນລ້ວນແຕ່ມີການນຸ່ງຖືປະຈຳຂອງຕົນເອງ. ຊາດລາວເຮົາກໍເຊັ່ນດຽວກັນ, ມີການນຸ່ງຖືທີ່ເປັນເອກະລັກສະເພາະຂອງຕົນມາແຕ່ບູຮານນະການກາຍເປັນປະເພນີອັນດີງາມທີ່ຕົກທອດມາຫລາຍຍຸກຫລາຍສະໄໝ, ແຕ່ປັດຈຸບັນນີ້ປະເພນີອັນດີງາມນັ້ນ ນັບມື້ເຫັນໜ້ອຍລົງ, ໂດຍສະເພາະແມ່ນຖັນແຖວຊາວໜຸ່ມໄວຫນຸ່ມ, ຂະນະທີ່ອີກບໍ່ເທົ່າໃດວັນກໍຈະເປັນງານເທດສະການບຸນປີໃໝ່ລາວ ເຊິ່ງເປັນຮີດຄອງປະເພນີອັນດີງາມທີ່ໄດ້ສືບທອດກັນມາແຕ່ດົນນານ, ແຕ່ຂະນະດຽວກັນໃນໂອກາດດັ່ງກ່າວຍັງເຫັນການນຸ່ງຖືຂອງໄວໜຸ່ມບໍ່ທັນເໝາະສົມເທົ່າທີ່ຄວນເປັນຕົ້ນແມ່ຍິງນຸ່ງໂສ້ງຂາສັ້ນເຂົ້າໄປສົງພະພຸດທະຮູບຕາມວັດວາອາຣາມຕ່າງໆ ແລະ ຮ້າຍແຮງໄປກວ່ານັ້ນຍັງມີການນຸ່ງຖືໃນ ລັກສະນະໂປ້ເປືອຍ ແລ້ວມາເຕັ້ນຕາມຖະໜົນຫົນທາງອື່ນໆ, ອັນເປັນສິ່ງທີ່ບໍ່ເໝາະ ແລະ ຜິດກັບວັດທະນະທຳ ອັນດີງາມຂອງຊາດເຮົາ.

ບຸນສົງການປີໃໝ່ລາວ, ແມ່ນບຸນປະເພນີປະຈຳຊາດຂອງລາວ, ເຊິ່ງມີຫຼາຍຊື່ເອີ້ນ ຕ່າງກັນເຊັ່ນ: ບຸນປີໃໝ່, ບຸນ ຫົດນໍ້າ, ບຸນເດືອນຫ້າ, ກຸດສົງການ, ເຊິ່ງມີຂຶ້ນໃນລະຫວ່າງກາງເດືອນ ເມສາຂອງທຸກໆ ປີຢ່າງໜ້ອຍກໍຈະມີການ ສະຫລອງກັນເປັນເວລາ 3 ວັນຄື: ວັນສັງຂານລວງ, ວັນເນົາ ແລະ ວັນສັງຂານຂຶ້ນ ຫລື ເອີ້ນກັນວ່າວັນຂຶ້ນປີໃໝ່ ລາວນັ້ນເອງຕາມພຸດທະສັງຄະລາດ. ບຸນນີ້ເປັນບຸນທີ່ມ່ວນທີ່ສຸດ. ເພື່ອຈະໄດ້ຫົດສົງອວຍໄຊໃຫ້ພອນ ເຊິ່ງກັນ ແລະ ກັນ. ດ້ວຍຢົດນໍ້າທີ່ໃສສະອາດ, ນ້ຳອົບນໍ້າຫອມ, ອັນເປັນສີລິມຸງຄຸນຫົດສົງຜູ້ເປັນພໍ່ເປັນແມ່ເຖົ້າແກ່ອາວຸໂສ, ຄູບາອາຈານ ອວຍພອນໄຊເຊິ່ງກັນ ແລະ ມີພິທີບາສີສູ່ຂວັນ, ເສຍເຄາະກຳ ແລະ ເຮັດບຸນທານ ຕ່າງໆ, ເພື່ອຮັບໂຊກໃນປີ ໃໝ່ພ້ອມນັ້ນ ກໍມີພິທີຕົບພະທາດ ຊາຍຢູ່ຕາມວັດວາອາຮາມ, ຢູ່ຕາມຫາດຊາຍແຄມນ້ຳ ແລະ ອື່ນໆ. ເຊິ່ງກິດຈະກຳຕ່າງໆ ເຫຼົ່ານີ້ລ້ວນແຕ່ເປັນ ການບຳເພັນກຸສົນໄປເຖິງດວງວິນຍານພໍ່ແມ່, ຄູບາອາຈານ ຫຼື ຜູ້ມີພະຄຸນອື່ນໆ.

ໃນກອງປະຊຸມສຳມະນາຫົວຂໍ້ “ສະເຫຼີມສະຫຼອງປະເພນີບຸນປີໃໝ່ລາວ ພສ 2562” ເມື່ອບໍ່ດົນມານີ້, ໄດ້ຍົກໃຫ້ເຫັນວ່າ: ຍັງມີຫຼາຍບັນຫາທ້າທາຍຕໍ່ກັບຂົງເຂດວຽກງານວັດທະນະທຳ, ຕໍ່ການອະນຸຮັກສາຮີດຄອງປະເພນີ, ວັດທະນະທຳອັນດີງາມຂອງຊາດ, ແຕ່ຄຽງຄູ່ກັນນີ້ ກະແສນິຍົມໃໝ່ກິດຈະກຳການສ້າງສັນ,ການບັນເທີງ ຈຳນວນໜຶ່ງມີລັກສະນະຊອດກະຈາ, ນັບມື້ແຜ່ລາມເຂົ້າສູ້ຖັນແຖວຊາວໜຸ່ມເຍົາວະຊົນ, ເປັນຕົ້ນພຶດຕິກຳການຄົບງັນ, ສ້າງສັນ, ມ່ວນຊື່ນ, ກິນດື່ມເຮຮາຂາດນ້ຳໃຈປະຢັດມັດທະຍັດເຮັດໃຫ້ມູນເຊື້ອອັນດີງາມຖືກກະທົບຫຼົງລືມ.

ໃນກອງປະຊຸມຍັງຍົກ ໃຫ້ເຫັນວ່າ: ປັດຈຸບັນສື່ຕ່າງໆ ໄດ້ມາເຂົ້າມີບົດບາດ ແລະ ອິດທິພົນໃນສັງຄົມລາວຢ່າງບໍ່ມີພົມແດນເຊັ່ນ: ອິນເຕີເນັດ, ອີເມວ, ເຟດສະບຸກ, ສື່ອອນລາຍອື່ນໆ ເຮັດ ໃຫ້ຊາວໜຸ່ມທັງຫລາຍທີ່ຢູ່ໃນໄວສຶກສາຮຽນຮູ້ໄດ້   ຮັບຜົນກະທົບຈາກສື່ເຫລ່ົາ ນັ້ນຢ່າງຫລີກລ່ຽງບໍ່ໄດ້ຖ້າພວກເຮົາ ບໍ່ຮູ້ເລືອກເຟັ້ນ, ຈະນຳມາເຊິ່ງຄວາມເສຍຫາຍ ຕ່າງໆເຊັ່ນ:  ຖືກຫລອກລວງ ໄປໃນທາງບໍ່ດີດັ່ງນັ້ນ ຊາວໝຸ່ມໄວໝຸ່ມເຮົາຕ້ອງຮູ້ເລືອກເຟັ້ນໃນການບໍລິໂພກສື່ ແລະ ຂໍ້ມູນຂ່າວສານທີ່ເປັນປະໂຫຍດ ແລະ ບໍ່ຄວນຮຽນແບບແຟຊັນຕ່າງໆ ທີ່ບໍ່ເໝາະສົມກັບວັດທະນະທຳເຮົາເຊັ່ນ: ຜູ້ຍິງຊັກລາຍ, ຜູ້ ຊາຍບ່ອງຫູນຸ່ງນ້ອຍນຸ່ງເຂີນອັນເປັນການຍົວະຍວນໄປໃນທາງບໍ່ດີ ແລະ ອັນດີງາມຂອງຊາດເຮົາ./.