ເປີດນໍາໃຊ້ສໍານັກງານກົມສ່ວຍສາອາກອນຫລັງໃໝ່ດ້ວຍມູນຄ່າສູງເຖິງ 32,5 ລ້ານໂດລາສະຫະລັດ
ພິທີມອບ-ຮັບ ແລະ ເປີດນຳໃຊ້ອາຄານສໍານັກງານກົມສ່ວຍສາອາກອນຫລັງໃໝ່ຕັ້ງຢູ່ບ້ານໂພນໄຊ, ເມືອງໄຊເສດຖານະຄອນຫລວງວຽງຈັນ ໄດ້ມີຂຶ້ນວັນທີ 4 ເມສານີ້, ໂດຍການໃຫ້ກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ມີທ່ານ ຊິນ ຊັງ ຊູນ ເອກອັກຄະລັດຖະທູດແຫ່ງ ສ.ເກົາຫລີ ປະຈຳລາວ ເຂົ້າຮ່ວມ.
ອາຄານດັ່ງກ່າວໄດ້ກໍ່ສ້າງມາແຕ່ປີ 2016 ສູງ 6 ຊັ້ນ, ລວມມີມູນຄ່າກໍ່ສ້າງທັງໝົດ 32,5 ລ້ານໂດລາສະຫະລັດ ດ້ວຍເງິນກູ້ຜ່ອນຜັນຈາກກອງທຶນພັດທະນາເສດຖະກິດ ແລະ ການຮ່ວມມື (Economic Development and Cooperation Funds) (EDCF) ຂອງລັດຖະບານ ສ.ເກົາຫລີ ແລະ ບ້ວງເງິນສົມທົບຂອງລັດຖະບານເຮົາ 4 ລ້ານໂດລາສະຫະລັດ, ໂດຍແມ່ນບໍລິສັດ ແອລຈີ ຊີເອັນເອັສ (LG CNS) ເປັນຜູ້ຮັບເໝົາໂຄງການກໍ່ສ້າງ, ຫົວໜ້າກົມສ່ວຍສາອາກອນ ໃຫ້ຮູ້ວ່າ: ອາຄານຫລັງນີ້, ນອນໃນໂຄງການພັດທະນາລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນສູ່ຄວາມທັນສະໄໝ ເວົ້າສະເພາະແມ່ນວຽກງານຫັນການຄຸ້ມຄອງການເກັບລາຍຮັບສ່ວຍສາອາກອນໃຫ້ມີປະສິດທິພາບ, ມີຄວາມໂປ່ງໃສ, ທັນເວລາ,ສອດຄ່ອງລະບຽບກົດໝາຍ ແລະ ອໍານວຍຄວາມສະດວກໃຫ້ຜູ້ປະຕິບັດພັນທະອາກອນດີຂຶ້ນ ເຊັ່ນ: ວຽກງານພັດທະນາ ແລະ ສ້າງລະບົບຂໍ້ມູນຂ່າວສານຄຸ້ມຄອງການເກັບລາຍຮັບສ່ວຍສາອາກອນແບບຄົບຊຸດ, ພັດທະນາຊຸດຄຳສັ່ງ ການແຈ້ງມອບລາຍຮັບ, ການກວດສອບຫລັງການແຈ້ງ, ການປະເມີນແຫລ່ງລາຍຮັບ, ການກຳນົດເລກປະຈຳຕົວຜູ້ເສຍອາກອນ, ການເຊື່ອມຕໍ່ລະບົບຕ່າງໆຂອງກະຊວງການເງິນ ແລະ ຂະແໜງການອື່ນໆທີ່ກ່ຽວຂ້ອງກັບການເກັບລາຍຮັບສ່ວຍສາອາກອນ ແລະ ການບໍລິການຂອງທະນາຄານເພື່ອອຳນວຍຄວາມສະດວກໃນການເສຍອາກອນຜ່ານລະບົບເອເລັກໂຕຣນິກໃນທົ່ວປະເທດໄດ້.
