ໂຍທາອອກມາຊີ້ແຈງສາເຫດທາງແພງ ແຕ່ຄຸນນະພາບຕ່ຳ

ໂດຍ: ທ່ຽງທຳ

ສະບາຍດີ, ເພື່ອນຜູ້ອ່ານ  ທີ່ຮັກແພງ, ໃນຜ່ານມານີ້ ຫລາຍຄົນຈະໜາຫູກັບຫາງສຽງຈົ່ມວ່າ ວິພາກວິຈານກັນໃນເລື່ອງຄຸນນະພາບຂອງການກໍ່ສ້າງຖະໜົນຫົນທາງ ຢູ່ບ້ານເຮົາບ່ອນໃດກໍມີມູນຄ່າຢ່າງມະຫາສານແຕ່ຄຸນນະພາບພັດບໍ່ສົມນ້ຳສົມຕ່ອນ,  ລູກພໍ່ນາໜາເຕົ່າໄປເຮັດວຽກ ຮັບເໝົາກໍ່ສ້າງຂົວທາງ ແລະ ຊົນລະປະທານມາບໍ່ຮອດ 2 ໂຄງການກໍກາຍເປັນເສດຖີ.

ຄົນຮັ່ງຄົນລວຍແລ້ວ,  ແຕ່ ເບື້ອງລັດນັບມື້ນັບທຸກລົງ,   ເພາະຈະຫາເງິນມາໃຊ້ໜີ້ ຫລື ສ້ອມແປງໂຄງການທີ່ຂາດຄຸນນະພາບດັ່ງກ່າວ ກໍບໍ່ມີມື້ຊີ້ນສຸດ, ແຕ່ແລ້ວບັນດາໂຄງການເລົ່ານັ້ນ ກໍຍັງສືບຕໍ່ດຳເນີນໄປຢ່າງບໍ່ມີໃຜ ເອົາໂທດໃຜ,  ຈົນເຖິງຂັ້ນເກີດ ມີໂຄງການບໍ່ມີຕົນໂຕກໍສາ ມາດມາຖອນ ເງິນງົບປະທານໄປແບ່ງກັນໃຊ້ຈ່າຍຢ່າງ ຟູມເຟືອຍ.

ເອົາລະເວົ້າມາກໍຫລາຍ, ແຕ່ກໍຍັງໄຄແດ່, ລັດຖະບານຊຸດນີ້ເພິ່ນໄດ້ເຂັ້ມງວດກວດ ຂັນເພື່ອສະກັດກັ້ນສິ່ງຫຍໍ້ທໍ້    ດັ່ງກ່າວ ແລະ ຜ່ານມາມໍ່ໆນີ້,   ລັດຖະບານກໍສາມາດເກັບກູ້ ເງິນຄືນມາໄດ້ຈາກໂຄງການທີ່ມີລາຄາແພງເກີນເຫດມາ  ໄດ້ນັບເປັນ 5-6 ພັນຕື້ກີບ.

ຕໍ່ບັນຫານີ້. ກົມຂົນທາງກະຊວງໂຍທາທິການ ແລະ ຂົນສົ່ງໄດ້ອອກມາຊີ້ແຈງຕໍ່ກອງປະຊຸມຂະແໜງການ ຂອງຕົນໃນທົ່ວປະເທດທີ່ຈັດຂຶ້ນເມື່ອທ້າຍເດືອນມີນາ ຜ່ານມານີ້ວ່າ: ຍ້ອນຫຍັງໂຄງການກໍ່ສ້າງຂົວທາງຈິ່ງ ມີລາຄາສູງເກີນເຫດແຕ່ຄຸນ ນະຕ່ຳ, ສາເຫດຕົ້ນຕໍແມ່ນມາຈາກໂຄງການລົງທຶນ ກ່ອນ, ໂດຍບໍ່ໄດ້ຜ່ານການປະມູນ, ການສຳຫລວດອອກ ແບບ, ເຊິ່ງທັງໝົດແມ່ນຜູ້ ລົງທຶນ ເປັນຜູ້ຈັດຕັ້ງເຮັດ ເອງທັງໝົດ ໂດຍມີການສົມຮູ້ຮ່ວມຄິດກັບຜູ້ເປັນເຈົ້າຂອງ ໂຄງການຈຳນວນໜຶ່ງ, ຕະຫລອດຮອດບໍລິສັດທີ່ປຶກ ສາ ແລະ ຜູ້ຄວບຄຸມເຕັກນິກ ການກໍ່ສ້າງກໍ ແມ່ນຜູ້ຮັບເໝົາ ເລືອກເອງ,ຈ້າງເອງ ແລະ ການກວດກາຄຸນນະພາບ ການກໍ່ສ້າງກໍເຮັດແບບມະ  ລຸມມະລວຍຜີບ້ານພ້ອມຜີປ່າແລ້ວກໍ “Ok” ຫລື ບາງ ໂຄງການທີ່ແຂວງສະເໜີ ມາສ່ວນຫລາຍກໍບໍ່ໄດ້ຜ່ານ ການສຳຫລວດ-ອອກແບບລະອຽດ, ທັງເຮັດທັງອອກ ແບບໄປພ້ອມ, ບໍ່ໄດ້ຜ່ານ ການກວດກາຄິດໄລ່ຫົວ ໜ່ວຍລາຄາຢ່າງລະອຽດຖີ່ຖ້ວນໃນລັກສະນະຂາດ ຄວາມຮັບຜິດຊອບເອງຜູ້ ເປັນເຈົ້າຂອງ ແລະ ອື່ນໆ.

ດັ່ງນັ້ນໃນກອງປະຊຸມ  ຂອງຂະແໜງໂຍທາທິການ ແລະ ຂົນສົ່ງຄັ້ງນີ້ ເພິ່ນໃຫ້ສັນ ຍາວ່າ: ຈະເພີ່ມທະວີແກ້ໄຂ ບັນດາຈຸດອ່ອນຂໍ້ຄົງທັງໝົດໃຫ້ໄປນຳປີເກົ່າ ແລະ ປີໃໝ່ ຈະເຮັດແຕ່ແນວໃໝ່ແນວດີ ທັງນັ້ນໃຫ້ສົມກັບວ່າເປັນຜູ້ ຮັກຊາດ ແລະ ຜູ້ພັດທະນາ ຢ່າງແທ້ຈິງ./.