ທະນາຄານໂລກຊີ້ເສດຖະກິດລາວຈະຂະຫຍາຍຕົວບໍ່ຫຼຸດ 7% ຕໍ່ປີ

ໃນວັນທີ 24 ພຶດສະພານີ້ ທະນາຄານໂລກປະຈໍາລາວ ໄດ້ຖະແຫຼ່ງກ່ຽວກັບຜົົນການປະເມີນການເຕີບໂຕເສດຖະກິດ ແລະຂອບຮ່ວມມືລະຫວ່າງທະນາຄານໂລກ ແລະ ສປປ ລາວ.

ທ່ານ ແຊລລີ ເບີນນິງແຮມ ຫົວໜ້າທະນາຄານໂລກປະຈໍາລາວ ກ່າວ່າ: ເສດຖະກິດຂອງລາວໄດ້ມີການເຕີບໂຕຢ່າງແຂງແຮງໃນໄລຍະຜ່ານມາ, ຊຶ່ງຖືວ່າເປັນຜົນສໍາເລັດອີກບາດກ່າວໜຶ່ງ. ຂະນະດຽວກັນນີ້ ການປະຕິຮູບໂດຍການປັບປຸງວຽກງານສວຍສາອາກອນ ແລະ ຄຸ້ມຄອງທາງດ້ານລາຍຈ່າຍພາກລັດ ຈະສາມາດສ້າງຄວາມເຂັ້ມແຂງ ແລະຮັກສາອັດຕາການເຕີບໂຕດັ່ງກ່າວນັ້ນໃຫ້ຍືນຍົງ, ທັງຈະເປັນຜົນດີຕໍ່ການປັບປຸງບໍລິຫານລັດໃນດ້ານ ສາທາລະນະສຸກ, ການສຶກສາ, ຄຸນນະພາບຊີວິດ ແລະສ້າງໂອກາດໃນການມີວຽກເຮັດງານທໍາໃຫ້ປະຊາຊົນເພີ່ມຂຶ້ນ.

ທ່ານໃຫ້ຮູ້ອີກວ່າ: ປີ 2017-2019 ຄາດວ່າເສດຖະກິດຂອງ ສປປ ລາວ ຈະມີການເຕີບໂຕສະເລ່ຍປະມານ 7% ຕໍ່ປີ ເຊິ່ງສູງກວ່າປະເທດອື່ນໆທີ່ຢູ່ໃນພາກພື້ນດຽວກັນ. ອັດຕາການເຕີບໂຕດັ່ງກ່າວ ເຫັນວ່າຕໍ່າກວ່າອັດຕາການເຕີບໂຕສະເລ່ຍໃນໄລຍະຜ່ານມາ ແຕ່ກໍຖືວ່າຍັງສູງຍ້ອນບັນດາໂຄງການພະລັງງານໄຟຟ້າທີ່ໄດ້ຂຶ້ນແຜນໄວ້ແລ້ວ, ພ້ອມທັງການຟື້ນຕົວຂອງຂະແໜງກະສິກໍາ ແລະອຸດສາຫະກໍາປຸງແຕ່ງ ແລະກາລະໂອກາດຈາກເງື່ອນໄຂທີ່ມີການເຊື່ອມໂຍງກັນໃນພາກພື້ນຫຼາຍຂຶ້ນ. ການຂະຫຍາຍຕົວຂອງຂະແໜງພະລັງງານໄຟຟ້າຄາດວ່າຈະເຮັດໃຫ້ການສົ່ງອອກພະລັງງານໄຟຟ້າເພີ່ມຂຶ້ນ, ສ່ວນຂະແໜງອື່ນ ເປັນຕົ້ນ: ຂະແໜງທ່ອງທ່ຽວ, ການຄ້າ ແລະການບໍລິການທາງດ້ານເງິນແມ່ນຄາດວ່າຈະໄດ້ຮັບຜົນປະໂຫຍດຈາກ ການເຊື່ອມໂຍງພາກພື້ນ ແລະລະບົບການສື່ສານທີ່ດີຂຶ້ນກວ່າເກົ່າ. ແນວໃດກໍຕາມກະແສການລົງທຶນທີ່ເຂົ້າມາໃນປະເທດອາດຈະໄດ້ຮັບຜົນກະທົບຈາກສະພາບຄວາມບໍ່ແນ່ນອນຢູ່ໃນພາກພື້ນ. ການຂາດດູນງົບປະມານຄາດວ່າຈະຢູ່ໃນລະດັບ 6,2% ຂອງລວມຍອດຜະລິດຕະພັນພາຍໃນ (GDP) ໃນປີ 2016 ເຊິ່ງຄາດວ່າຈະເຮັດໃຫ້ໜີ້ສິນພາກລັດສູງຂຶ້ນເຖິງ 68% ຂອງ GDP ດັ່ງນັ້ນ ການປັບປຸງທາງດ້ານການເກັບລາຍຮັບ ແລະເພີ່ມປະສິດທິຜົນທາງດ້ານລາຍຈ່າຍ ຄຽງຄູ່ກັບການປັບປຸງນະໂຍບາຍເງິນຕາ ແລະອັດຕາແລກປ່ຽນ ພ້ອມທັງສ້າງຄວາມເຂັ້ມແຂງທາງດ້ານການຄຸ້ມຄອງຂະແໜງການເງິນຂອງທະນາຄານແຫ່ງ ສປປ ລາວຈະຊ່ວຍຮັກສາສະຖຽນລະພາບເສດຖະກິດມະຫາພາກໄດ້.