ປີນີ້ລາວມີແຜນປູກໄມ້ 20 ພັນເຮັກຕາ
ກົມປ່າໄມ້, ກະຊວງກະສິກຳ ແລະ ປ່າໄມ້ ໃຫ້ຮູ້ວ່າ: ປີນີ້ກະຊວງກະສິກຳ ແລະ ປ່າໄມ້ຕັ້ງເປົ້າປູກໄມ້ໃຫ້ໄດ້ 20 ພັນເຮັກຕາໃນທົ່ວປະເທດ. ສ່ວນການ ຟື້ນຟູປ່າໃຫ້ບັນລຸຫລາຍກວ່າ 4,5 ແສນເຮັກຕາ, ເກັບແກ່ນໃຫ້ໄດ້ 27 ພັນກິໂລ ແລະ ກ້າເບ້ຍໄມ້ໃຫ້ໄດ້ຢ່າງໜ້ອຍ 15 ລ້ານເບ້ຍ.
ກົມດັ່ງກ່າວ ໃຫ້ຮູ້ວ່າ: ສຳລັບພັນໄມ້ທີ່ປູກແມ່ນຈະເລັ່ງໃສ່ໄມ້ພື້ນເມືອງ ເຊັ່ນ: ໄມ້ດູ່, ຂະຍຸງ, ໄມ້ແຕ້ ແລະ ອື່ນໆ, ນອກນັ້ນແມ່ນໄມ້ອຸດສາຫະກຳ, ໄມ້ປະເພດຮັກສາສິ່ງແວດລ້ອມ, ແຫລ່ງນ້ຳ ແລະ ໄມ້ປະດັບອື່ນໆ ທີ່ສາມາດປູກໄດ້ຕາມສຳນັກງານອົງການ ແລະ ຖະໜົນຫົນທາງ.
ສ່ວນການກະກຽມໃຫ້ແກ່ຂະບວນການປູກໄມ້ໃນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ (1 ມິຖຸນາ) ໃຫ້ເປັນຂະບວນກວ້າງຂວາງ ແລະ ມີບັນຍາກາດຟົດຟື້ນນີ້, ມາຮອດປັດຈຸບັນເຫັນວ່າມີຄວາມພ້ອມໂດຍພື້ນຖານແລ້ວ, ໂດຍສະເພາະການກະກຽມເບ້ຍໄມ້ ແລະ ສະຖານທີ່ປູກ, ຊຶ່ງໄດ້ມອບໝາຍໃຫ້ຂະແໜງການກ່ຽວຂ້ອງແຕ່ລະທ້ອງຖິ່ນເອົາໃຈໃສ່ຈັດຕັ້ງປະຕິບັດໃຫ້ມີປະສິດທິຜົນ, ເພື່ອເຮັດໃຫ້ການປູກໄມ້ປີນີ້ບັນລຸຕາມຄາດໝາຍທີ່ວາງໄວ້.ພ້ອມທັງເຊີນຊວນທຸກພາກສ່ວນສັງຄົມ, ຕະຫລອດຮອດປະຊາຊົນບັນດາເຜົ່າໃນທົ່ວປະເທດ ຈົ່ງໄດ້ເຂົ້າຮ່ວມຂະບວນການປູກໄມ້ປີນີ້ໃຫ້ມີຂະບວນຟົດຟື້ນ, ໂດຍສາມາດປູກໃນສະຖານທີ່ມີຄວາມເໝາະສົມ ເຊັ່ນ: ແຄມຮົ້ວ, ສ່ວນ, ເດີ່ນເຮືອນ ແລະ ບ່ອນອື່ນໆ, ເພື່ອປະກອບສ່ວນເຂົ້າໃນການປົກປັກຮັກສາສະພາບແວດລ້ອມໃຫ້ສົດຊື່ນ, ທັງເປັນການຮັກສາແຫລ່ງນ້ຳ ແລະ ອັນສໍາຄັນເຮັດໃຫ້ປະເທດເຮົາມີເນື້ອທີ່ປົກຫຸ້ມຂອງປ່າໄມ້ຮອດປີ 2020 ຫລາຍກວ່າ 70% ຂອງເນື້ອທີ່ທົ່ວປະເທດ.
