ລາວ-ຈີນ ສືບຕໍ່ຮ່ວມມືວຽກງານກາແດງ
ໃນວັນທີ 28 ມີນານີ້, ທ່ານ ຄໍາຮຸ່ງ ເຮືອງວົງສີ ປະທານອົງການກາແດງລາວ ໄດ້ຕ້ອນການເຂົ້າພົບປະ ຂອງທ່ານ ຫາຍຈິ່ງ ຫວັງ ຮອງປະທານສະພາກາແດງ ສປ ຈີນ ພ້ອມດ້ວຍຄະນະ ໃນໂອກາດມາຢ້ຽມຢາມ ແລະ ເຮັດວຽກຮ່ວມກັບອົງ ການກາແດງລາວ ລະຫວ່າງ ວັນທີ 26-29 ມີນານີ້. ໂດຍ ສອງຝ່າຍໄດ້ປຶກສາຫາລືການຮ່ວມມື ແລະ ຮ່ວມລົງ ເຊັນບົດບັນທຶກຄວາມ ເຂົ້າໃຈກ່ຽວກັບການເພີ່ມທະ ວີການພົວພັນຮ່ວມມືໃນອະນາຄົດ. ໃນໂອກາດດຽວ ກັນນີ້, ສະພາກາງແດງ ສປ ຈີນ ຍັງໄດ້ມອບເງິນໃຫ້ແກ່ອົງການກາແດງລາວເພື່ອສືບຕໍ່ຊ່ວຍເຫຼືອປະຊາຊົນ ຜູ້ປະສົບໄພພິບັດມູນຄ່າ 1 ແສນໂດລາສະຫະລັດ.
ການຮ່ວມມືຂອງອົງການກາແດງລາວ ແລະ ສະພາກາແດງ ສປ ຈີນ ໄດ້ມີ ຂຶ້ນນັບແຕ່ປີ 2015 ເປັນຕົ້ນມາ, ສອງຝ່າຍໄດ້ເລີ່ມ ເຂົ້າຮ່ວມກອງປະຊຸມໃນລະດັບພາກພື້ນ ແລະ ສາກົນ, ເຊິ່ງເປັນໂອກາດໃຫ້ ທັງສອງອົງການໄດ້ເລີ່ມມີ ການຮ່ວມມື ແລະ ໃຫ້ການສະໜັບສະໜູນຊ່ວຍເຫຼືອ ເຊິ່ງກັນ ແລະ ກັນເຊັ່ນ: ກາແດງຈີນໄດ້ມອບລົດອໍາບູລັງໃຫ້ກາແດງລາວ 5 ຄັນ, ສະໜັບສະໜູນງົບປະມານເພື່ອຈັດຕັ້ງປະຕິບັດໂຄງການຫຼຸດຜ່ອນຄວາມສ່ຽງໄພພິບັດ ເຊື່ອມສານວຽກງານສົ່ງເສີມສຸຂະພາບ ເຊິ່ງໄດ້ຈັດຕັ້ງປະຕິບັດຢູ່ 3 ແຂວງຄື: ແຂວງ ວຽງຈັນມີ 5 ເມືອງ (ຊະນະຄາມ, ແກ້ວອຸດົມ, ໂພນໂຮງ, ເມືອງໝືນ ແລະ ເມືອງ ເຟືອງ), ນະຄອນຫຼວງວຽງຈັນ ແລະ ຫຼວງພະບາງຜ່ານການຈັດຕັ້ງປະຕິບັດໂຄງການດັ່ງກ່າວ ມີປະຊາຊົນ ໄດ້ຮັບຜົນປະໂຫຍດຫຼາຍກວ່າ 72 ພັນຄົນ.
