ມາດຕະການຄວບຄຸມມົນລະພິດຢູ່ບາງປະເທດ
ໂດຍ: ວິເສດສະແຫວງສຶກສາ
ເລື່ອງໝອກຄວັນເປັນ ພິດນີ້ ຄົນລາວເຮົາສ່ວນໃຫຍ່ ຍັງເຫັນວ່າ ເປັນເລື່ອງໄກຕົວ ແຕ່ໃນທີ່ສຸດ ມັນກໍໄດ້ກາຍເປັນໄພໃກ້ຕົວແລ້ວໃນທ້ອງເດືອນ ມີນາປີນີ້ເອງ. ແຕ່ສາເຫດຕົ້ນຕໍຂອງໝອກຄວັນທີ່ປົກຄຸມ ນ່ານຟ້ານະຄອນຫລວງຂອງພວກເຮົານັ້ນແມ່ນເກີດມາ ຈາກໄຟໄໝ້ປ່າ ແລະ ການຈູດຂີ້ເຫຍື້ອຊະຊາຍຂອງຄົນຈຳນວນໜຶ່ງ ຍັງບໍ່ແມ່ນເກີດ ຈາກກິດຈະການກໍ່ສ້າງ ແລະ ອຸດສາຫະກຳຄືຢູ່ຫລາຍໆປະເທດ. ແນວໃດກໍດີທາງການລາວພວກເຮົານັ້ນສະດຸ້ງໄວຄືໄດ້ມີແຜນຮັບມືບັນຫາໄວ້ແຕ່ ເຍີ້ນໆ.
ໃນທ້າຍເດືອນມີນານີ້ກໍມີຂ່າວວ່າທາງການຈະມີມາດຕະການຈຳກັດຈຳນວນລົດໃນອະນາຄົດເພື່ອຫລຸດຜ່ອນຄວາມແອອັດຍັດບຽດຕາມຖະໜົນ ເຊິ່ງໃນຕົວມັນກໍເປັນການຈຳກັດອາຍພິດຈາກຄວັນລົດໂດຍກົງ.
ແຜນເພີ່ມເນື້ອທີ່ປົກຫຸ້ມ ດ້ວຍປ່າກໍຄືແຜນພັດທະນາເສດຖະກິດແບບຍືນຍົງນັ້ນ ກໍລ້ວນແຕ່ມີເປົ້າໝາຍຮັກສາຄວາມສົມດູນຂອງລະບົບນິເວດ ຢູ່ອິນເດຍໃນຊຸມປີຫລັງໆມານີ້ ມາດຕະການປົກປັກຮັກສາສິ່ງແວດລ້ອມນັ້ນເພິ່ນເນັ້ນການກຳຈັດມົນລະພິດທາງອາກາດທີ່ເກີດຈາກ ຈຳນວນຍານພາຫະນະລົ້ນຖະໜົນຄືເລີ່ມຈາກການຫ້າມລົດເກົ່າເກີນ 15 ປີ ແລ່ນເຂົ້າໃຈກາງນະຄອນຫລວງ.
ຖ້າເຮັດໄດ້ຕາມແຜນກໍ ຈະສາມາດຢຸດແລ່ນລົດ ຈຳນວນເກືອບ 3 ລ້ານຄັນ (ລວມທັງລົດໃຫຍ່, ລົດຈັກ, ລົດຕຸກໆ. ທີ່ມີເກືອບ 9 ລ້ານຄັນຢູ່ນະຄອນຫລວງນິວເດລີ). ນອກຈາກມາດຕະການນີ້ກໍຍັງມີຄຳຮຽກຮ້ອງໃຫ້ລົດໃຫຍ່ບັນທຸກ ຫລາຍຄົນ (ໝາຍຄວາມວ່າ ຂີ່ນຳກັນແທນທີ່ຈະນັ່ງລົດຜູ້ດຽວໂຕດໂປດ) ແຕ່ນີ້ເປັນພຽງຄຳຮຽກຮ້ອງບໍ່ແມ່ນຂໍ້ ບັງຄັບ.
ການແລ່ນລົດບາກັນ ຕາມເລກ(ທະບຽນ) ຄິກ-ຄູ່ ນັ້ນ ແມ່ນປະຕິບັດກັນເວລາ ເກີດສະພາບອາກາດເປັນພິດ. ນະໂຍບາຍກວມລວມອີກອັນ ໜຶ່ງຂອງອິນເດຍໃນການຈຳກັດອາກາດເປັນພິດກໍຄືທາງການໄດ້ສະໜອງແກັສ ຫຸງຕົ້ມ ຫລື ຄົວກິນໃຫ້ບັນດາ ຄົວເຮືອນທີ່ທຸກຍາກແທນທີ່ ຈະໃຊ້ເຊື້ອໄຟຈາກຂີ້ງົວຈາກການຈູດສານອິນຊີອື່ນໆ.
ມີຂ່າວເມື່ອ 5 ປີຜ່ານມາວ່າ ທັດສະມາຮານ ອະນຸສອນສະຖານແຫ່ງຄວາມຮັກອັນລືຊື່ຂອງອິນເດຍທີ່ ເຮັດດ້ວຍ ຫີນອ່ອນນັ້ນໄດ້ເລີ່ມປ່ຽນເປັນສີເຫລືອງຍ້ອນຄວັນໄຟຈູດ ຂີ້ງົວເພື່ອຫຸງຕົ້ມຂອງບັນດາ ຄົວເຮືອນຢູ່ອ້ອມແອ້ມ.
ເພື່ອປ້ອງກັນຄວາມເສຍຫາຍທີ່ຈະກະທົບໃສ່ທັດສະມາຮານ ເຊິ່ງເປັນ 1 ໃນ 7 ສິ່ງມະຫັດສະຈັນຂອງໂລກນີ້, ທາງການອິນເດຍໄດ້ຫ້າມໂຮງງານອຸດສາຫະກຳ ຢູ່ໃກ້ ອະນຸສອນສະຖານນີ້ ໃຊ້ພະລັງງານຈາກຖ່ານຫີນ.
ຢູ່ນະຄອນໂຮຈິມິງ, ຫວຽດນາມນັ້ນແຕ່ປີ 2015-2017 ທາງການໄດ້ ຍ້າຍທຸລະກິດປະກອບການ ຈຳນວນເກືອບ 700 ຫົວ ໜ່ວຍອອກຈາກຕົວເມືອງ ຍ້ອນເປັນຕົວການກໍ່ມົນລະພິດທາງອາກາດ.
ສິງກະໂປ ເປັນປະເທດ ພັດທະນາລະດັບຫົວແຖວ ຂອງໂລກແຕ່ສາມາດຮັກສາຄວາມສົມດູນດ້ານສິ່ງແວດລ້ອມໄດ້ດີຍິ່ງດ້ວຍມາດຕະການສ້າງໝົດປະເທດໃຫ້ ເປັນສີຂຽວຄືປູກຕົ້ນໄມ້ຕາມຕຶກອາຄານຂອງລັດ ແລະ ຄາດວ່າພາຍໃນປີ 2030 ຕຶກ ອາຄານຢູ່ສິງກະໂປທັງໝົດຕ້ອງປົກຫຸ້ມດ້ວຍສີຂຽວທຳມະຊາດຢ່າງໜ້ອຍ 80%.
ຢູ່ ສປ ຈີນ ໜຶ່ງໃນມາດຕະການປົກປັກຮັກສາສິງແວດລ້ອມໃນປັດຈຸບັນແມ່ນ ການຫັນໄປໃຊ້ ພາຫະນະສີ ຂຽວໝາຍຄວາມວ່າລົດທີ່ ໃຊ້ພະລັງງານສະອາດ (ໄຟຟ້າ) ພ້ອມກັບນະໂຍບາຍສົ່ງ ເສີມເບື້ອງຕົ້ນດ້ວຍການຍົກເວັ້ນພາສີລົດຊະນິດນີ້ເພີ່ມສະຖານທີ່ສາກໄຟ ແລະ ຂາຍໃນລາຄາຖືກໆ./.
