ອິນເດຍປະສົບຜົນສຳເລັດທົດລອງ ຍິງລູກສອນໄຟທຳລາຍດາວທຽມ
ອິນເດຍປະສົບຜົນສຳເລັດໃນການທົດລອງຍິງລູກສອນໄຟທຳລາຍດາວທຽມ, ຂະນະທີ່ປາກິດສະຖານຮຽກຮ້ອງໃຫ້ທຸກປະເທດຫລີກເວັ້ນການກະທຳທີ່ຈະນຳໄປສູ່ການເກີດສົງຄາມ.
ນາຍົກລັດຖະມົນຕີ ນາເຣນທາ ໂມດີ ກ່າວວ່າ: ອິນເດຍປະສົບຜົນສຳເລັດໃນການທົດລອງຍິງລູກສອນໄຟທຳລາຍດາວທຽມເປັນຄັ້ງທຳອິດ ແລະ ຖືເປັນປະເທດທີ 4 ຂອງໂລກທີ່ປະສົບຜົນສຳເລັດໃນການຍິງລູກສອນໄຟທຳລາຍດາວທຽມຕໍ່ຈາກອາເມລິກາ, ສະຫະພາບໂຊວຽດ ແລະ ຈີນ. ຖືເປັນບາດກ້າວສຳຄັນທີ່ເຮັດໃຫ້ອິນເດຍກ້າວຂຶ້ນເປັນໜຶ່ງໃນປະເທດມະຫາອຳນາດດ້ານອະວະກາດຂອງໂລກ.
ທ່ານ ໂມດີ ກ່າວວ່າ: ທີມນັກວິທະຍາສາດໄດ້ຍິງລູກສອນໄຟທຳລາຍດາວທຽມຂອງອິນເດຍທີ່ໂຄຈອນຢູ່ໃນລະດັບຕໍ່າຫ່າງຈາກພື້ນໂລກ 300 ກິໂລແມັດ, ອາວຸດທຳລາຍດາວທຽມນີ້ມີຂີດຄວາມສາມາດໃນການໂຈມຕີດາວທຽມຂອງສັດຕູ, ຂັດຂວາງການສົ່ງສັນຍານໂທລະຄົມມະນາຄົມ ທັງຍັງເປັນຖານດ້ານເຕັກໂນໂລຊີໃນການຍິງສະກັດລູກສອນໄຟຂ້າມທະວີບ, ປະສິດທິພາບເຫລົ່ານີ້ສ້າງຄວາມກັງວົນວ່າຈະເຮັດໃຫ້ເກີດການແຂ່ງຂັນກັບປະເທດຄູ່ແຂ່ງ.
ສ່ວນກະຊວງການຕ່າງປະເທດຈີນ ສະແດງຄວາມຄາດຫວັງວ່າ: ທຸກປະເທດຈະຊ່ວຍກັນຢ່າງຈິງຈັງໃນການຮັກສາສັນຕິພາບ ແລະ ຄວາມສະຫງົບດ້ານອະວະກາດໃຫ້ຍືນຍາວ.
ຂະນະທີ່ປະເທດໃກ້ຄຽງຄືປາກິດສະຖານ ເຊິ່ງມີບັນຫາຂັດແຍ່ງເລື່ອງດິນແດນ ແລະ ຄວາມໝັ້ນຄົງລະບຸວ່າ: ຫ້ວງອະວະກາດເປັນສົມບັດສ່ວນລວມຂອງມວນມະນຸດ ແລະ ທຸກປະເທດຈະຕ້ອງຮ່ວມກັນຮັບຜິດຊອບໃນການຫລີກເວັ້ນການກະທຳໃດໆທີ່ຈະນຳໄປສູ່ການເກີດສົງຄາມໃນຫ້ວງອະວະກາດ.
