ສານເຄມີ ມັດຈຸລາດຂ້າຄົນ
ໂດຍ: ທິດກ່ຳ
ປາກົດການໃໝ່ຮືຮາ ໂດດເດັ່ນທີ່ເຮົາເຫັນໃນສື່ສັງຄົມຕ່າງໆ, ໂດຍສະເພາະໃນສື່ອອນລາຍ ແມ່ນບັນຫາການ ນຳໃຊ້ສານເຄມີໃສໃນພືດຜັກ, ໝາກໄມ້, ເຄື່ອງດື່ມບາງຢ່າງ ແລະ ໃນອາຫານບາງ ປະເພດ, ເຊິ່ງມີອົງການມະຫາ ພາກທີ່ກ່ຽວຂ້ອງໃນຫລາຍທ້ອງຖິ່ນໄດ້ລົງກວດກາຢູ່ທ້ອງຕະຫລາດເຫັນວ່າມີ ຮອດນ້ຳຢາດອງສົບ ວ່າຊັ້ນ. ປັດຈຸບັນ, ປະເພດຊີ້ນໝູທີ່ ເຄີຍນຳເຂົ້າຈາກຈີນ ແລະ ຫວຽດນາມ ຫລ້າສຸດທາງການໄດ້ມີຄຳສັ່ງໃຫ້ງົດຊົ່ວຄາວເພາະຍັງບໍ່ທັນແນໃຈ ວ່າມັນມີບັນຫາເຊື້ອພະຍາດທີ່ພວມລະບາດຂຶ້ນຢູ່ແຖວອາຟຣິກກາ.
ຂ່າວກັນວ່າພະຍາດດັ່ງກ່າວ ແມ່ນບໍ່ທັນມີຢາຊະນິດໃດປິ່ນປົວໄດ້, ກໍໝາຍວ່າ ຕາຍລູກດຽວ ແຕ່ຈະຕາຍຊ້າ ຫລື ຕາຍໄວນັ້ນ ມັນກໍຂຶ້ນກັບກາລະເທສະປະມານນັ້ນ. ເລື່ອງຂ່າວຄາວນີ້ຈະເປັນຄວາມຈິງສ່ຳໃດນັ້ນພວກ ເຮົາກໍຕ້ອງໄດ້ຕິດຕາມນຳກັນຕໍ່ໄປ, ແຕ່ກໍອຸ່ນໃຈໄດ້ວ່າ ພະຍາດດັ່ງກ່າວບໍ່ສາມາດແພ່ຈາກສັດສູ່ຄົນໄດ້.
ເວົ້າເລື່ອງການນຳໃຊ້ ສານເຄມີເຂົ້າໃນການຜະລິດ, ໝາກໄມ້, ເຄື່ອງດື່ມ, ພືດຜັກ ແລະ ປະເພດອາຫານການ ກິນໃນສະໄໝນີ້ຍິ່ງເປັນຕາຢ້ານ ເພາະພວກພໍ່ຄ້າແມ່ຄ້າໜ້າເລືອດຈຳນວນບໍ່ໜ້ອຍຄຳນຶ່ງເຖິງແຕ່ຜົນປະໂຫຍດຂອງຕົນຝ່າຍດຽວ, ສ່ວນວ່າໃຜຊິຕາຍ ຫລື ຍັງໃນພາຍໜ້ານັ້ນເຂົ້າບໍ່ໄດ້ກ່ຽວຂໍແຕ່ວ່າ ມີຄົນກິນ, ມີຄົນຊື້ເທົ່ານັ້ນ.
ປະເພດຂອງກິນທີ່ ເປັນຕາຢ້ານອີກຊະນິດໜຶ່ງ ກໍຄືອາຫານທະເລເພາະບ້ານເຮົາບໍ່ມີທະເລຄືບ້ານເພິ່ນ, ເພາະສະນັ້ນ, ການບໍລິການ ຊື້ຂາຍ ແລະ ຈຳໜ່າຍອາຫານປະເພດນີ້ກວ່າຈະມາຮອດບ້ານເຮົາກໍຕ້ອງໃຊ້ ເວລາຫລາຍຊົ່ວໂມງ ຫລື ຍິ່ງໄປກວ່ານັ້ນ, ຖ້າບໍ່ມີອຸປະກອນທີ່ຮັບປະກັນຕໍ່ຄວາມປອດໄພແລ້ວ ກໍມີແຕ່ໃສ່ສານກັນບູດມັນຈຶ່ງຈະບໍ່ເໜົ່າ, ບໍ່ເປື່ອຍ, ໂດຍສະເພາະແມ່ນກຸ່ມແມ່ຄ້າຂາຍລາຍຍ່ອຍ.
ໃນໄລຍະສອງສາມປີ ຫລັງນັ້ນ, ພວກເຮົາວຸ້ນວາຍ ນຳການປູກກ້ວຍຍ້ອນວ່າ ຜູ້ ລົງທຶນຄົນຕ່າງປະເທດໃນ ຂະແໜງນີ້ໃຊ້ສານເຄມີຈົນ ມີຜົນກະທົບໃຫ້ຄົນເຈັບຄົນ ເປັນ ແລະ ຕາຍຍ້ອນ, ຕໍ່ມາ ກໍແມ່ນມີສັດສາວາສິ່ງປູປາ ນານ້ຳຕາຍໃນບາງທ້ອງຖິ່ນ ເຊັ່ນ: ຢູ່ນະຄອນຫລວງວຽງ ຈັນເຮົາກໍມີເຫດການປາຕາຍ ຢູ່ແຖວເມືອງເພຍລາດ.
ແນວໃດກໍຕາມ, ເວົ້າເຖິງການຜະລິດບໍ່ວ່າໃນຂົງເຂດອຸດສາຫະກຳ, ກະສິກຳ ຫລື ໃນບາງຂະແໜງການວິຊາ ສະເພາະກໍມີຄວາມຈຳເປັນໃນການນຳໃຊ້ສານເຄມີແຕ່ ສິ່ງສຳຄັນຄວນໄປຕາມຫລັກການຢ່າງເຂັ້ມງວດ ທັງບໍ່ໃຫ້ມີຜົນກະທົບຕໍ່ສິ່ງແວດລ້ອມອັນສຳຄັນກ່ອນອື່ນໝົດແມ່ນ ບໍ່ໃຫ້ມີຜົນກະທົບຕໍ່ຊີວິດຂອງຄົນ, ສັດສາວາສິ່ງ ແລະ ສະພາບແວດລ້ອມເພາະສານເຄມີຖ້າເຮົາໃຊ້ໄປໃນທາງບໍ່ຖືກຕ້ອງສອດຄ່ອງແລ້ວມັນກໍຈະມີຜົນກະທົບຢ່າງ ໃຫຍ່ຫລວງ ຫລື ບາງກໍລະນີອາດເປັນມັດຈຸລາດຂ້າຄົນໃນທາງກົງ ແລະ ທາງອ້ອມ.
ເຖິງຢ່າງໃດກໍດີ, ຕາມ ເຮົາວ່າເພື່ອບໍ່ໃຫ້ສານເຄມີ ເປັນອະສໍລະພິດຂ້າຄົນນັ້ນ ພວກເຮົາກໍຕ້ອງພ້ອມກັນເປັນເຈົ້າການໃນການກວດກາຕິດ ຕາມ ແລະ ອັນສຳຄັນທີ່ສຸດ ແມ່ນຕ້ານ ແລະ ສະກັດກັ້ນ ຢ່າງເດັດຂາດຕໍ່ການນຳໃຊ້ ເຂົ້າໃນປະເພດອາຫານການກິນຂອງຄົນເຮົາຍ້ອນວ່າມັນ ເປັນອັນຕະລາຍຕໍ່ສຸຂະພາບ ແລະ ເຖິງແກ່ຊີວິດ.
ຢາກເຮັດໄດ້ຕາມທີ່ວ່າ ນີ້ ພາກສ່ວນກ່ຽວຂ້ອງຕ້ອງ ລົງຕິດຕາມກວດກາ ແລະ ວາງມາດຕະການຢ່າງເດັດ ຂາດ, ຖ້າຜູ້ໃດຝ່າຝືນຕ້ອງ ປັບໄໝໃສ່ໂທດຕາມກົດ ໝາຍ. ນອກຈາກນັ້ນ, ຕົວເຮົາ ເອງກໍຕ້ອງມີສະຕິໃນການ ກິນການດື່ມ ຖ້າເຫັນວ່າອັນ ໃດຈະບໍ່ມີຜົນດີຕໍ່ສຸຂະພາບ ແລ້ວກໍບໍ່ຄວນໄປສົນຕາມ ທິດກ່ຳວ່າ.
