ຫວຽດນາມ ເລັ່ງກຳນົດຕຳແໜ່ງງານ ແລະ ກວດຄືນຕຳແໜ່ງບໍລິຫານ

# ລູກເມືອງພວນ

      ລັດຖະມົນຕີກະຊວງພາຍໃນຂອງຫວຽດນາມໃຫ້ຮູ້ວ່າ, ເພື່ອກະກຽມໃຫ້ແກ່ການປະຕິບັດແຜນນະໂຍບາຍ ປະຕິຮູບຂັ້ນເງິນເດືອນໃໝ່ຂອງພະນັກງານ-ລັດຖະກອນຢູ່ຫວຽດນາມ, ກະຊວງພາຍໃນກຳລັງປະສານສົມທົບກັບບັນດາຂະແໜງການກ່ຽວຂ້ອງຕ່າງໆ ​ເພື່ອຮີບຮ້ອນສ້າງແຜນກຳນົດຕຳແໜ່ງງານ ແລະ ກວດກາຄືນຕຳແໜ່ງບໍລິຫານຂັ້ນຕ່າງໆ.

       ການກຳນົດຕຳແໜ່ງງານ ຈະຕິດພັນກັບການກຳນົດຕຳແໜ່ງບໍລິຫານຂອງແຕ່ລະອົງການ, ຫ້ອງການ ແລະ ການຈັດຕັ້ງຕ່າງໆທົ່ວປະເທດ. ທ່ານລັດຖະມົນຕີຍັງໃຫ້ຮູ້ອີກວ່າ: ການ​ເລັ່ງກຳນົດຕຳແໜ່ງງານຕິດພັນກັບການກຳນົດຕຳແໜ່ງການນຳພາຄືນໃໝ່ກໍຍ້ອນວ່າ, ດຽວນີ້ ມີຫຼາຍພາກສ່ວນຂອງອົງການຈັດຕັ້ງພັກ-ລັດ ໄດ້ກຳນົດຕຳແໜ່ງງານ ແລະ ຂັ້ນເງິນເດືອນສະເພາະຂອງໃຜລາວ.

      ຜ່ານມາການກຳນົດຊັ້ນ, ຂັ້ນເງິນເດືອນຕົ້ນຕໍແມ່ນປະຕິບັດຕາມອາຍຸການ, ຊັ້ນ, ຂັ້ນ ແລະ ໜ້າທີ່ວິຊາສະເພາະຂອງພະນັກງານ, ການປະຕິບັດນະໂຍບາຍເງິນອູດໜູນຕຳແໜ່ງເຫັນວ່າສູງຫຼາຍ. ຂະແໜງການໃດກໍຮຽກຮ້ອງໃຫ້ມີການປະຕິບັດນະໂຍບາຍເງິນອູດໜູນຕຳແໜ່ງໃຫ້ເໝາະສົມກັບຂະແໜງການຂອງໃຜລາວ. ການທີ່ປະຕິບັດນະໂຍບາຍເງິນອູດໜູນຕຳແໜ່ງສູງຄືປັດຈຸບັນນີ້ ເຫັນວ່າເງິນອູດໜູນຕຳແໜ່ງສູງກ່ວາເງິນເດືອນພື້ນຖານ, ອັນໄດ້ສ້າງຂໍ້ຂັດແຍ່ງລະຫ່ວາງຂະແໜງການດ້ວຍກັນ.

       ມີບາງຂະແໜງການ, ເງິນອູດໜູນຕ່າງໆ ຍັງສູງກ່ວາເງິນເດືອນ. ເຊັ່ນວ່າ: ຂະແໜງການສຶກສາ ໄດ້ຮັບເງິນອູດໜູນວິຊາຊີບ 70%, ອາຍຸການແຕ່ລະປີ 1%, ເງິນໜ້າທີ່ຕຳແໜ່ງ, ສິດສອນຢູ່ບ່ອນຫ່າງໄກສອກຫຼີກ  70%, ການສອນຫ້ອງຄວບ, ສອນພາສາຊົນເຜົ່າ…ລ້ວນແຕ່ໄດ້ຮັບເງິນອູດໜູນ.

ຍ້ອນເຫດຜົນດັ່ງກ່າວນັ້ນ, ຈື່ງເຫັນມີຄວາມຈຳເປັນວ່າ ຄວນໄດ້ກຳນົດຕຳແໜ່ງງານ ໝາຍຄວາມວ່າຕ້ອງໄດ້ກຳນົດສາລະບານໜ້າທີ່ຕຳແໜ່ງຄືນໃໝ່ໃຫ້ຢູ່ໃນລະບົບທີ່ເປັນເອກະພາບ.ສາມາດຊີ້ໃຫ້​ເຫັນແຈ້ງວ່າໃຜເຮັດຫຍັງ, ມີທີ່ຕັ້ງພາລະບົດບາດແນວໃດ, ມີຄວາມຮັບຜິດຊອບໃນໜ້າທີ່ວຽກງານຫຍັງ ​ແລະ ອື່ນໆ.

     ຖ້າຫາກວ່າການກຳນົດຕຳແໜ່ງງານ, ກຳນົດຄວາມສາມາດຂອງພະນັກງານໄດ້ ຈະເປັນພື້ນຖານອັນສຳຄັນໃຫ້ແກ່ການຂັດເລືອກ ແລະ ນຳໃຊ້ພະນັກງານໄດ້ດີຂຶ້ນ. ການກຳນົດຕຳແໜ່ງງານກໍແມ່ນພື້ນຖານໃຫ້ແກ່ການຄຸ້ມຄອງທີ່ດີ.

      ລັດຖະບານຫວຽດນາມໄດ້ກຳນົດວ່າ ອົງການໃດມີພະນັກງານແຕ່ 20 ຄົນລົງມາ ຈະບໍ່ໃຫ້ມີຮອງຫົວໜ້າ​ເກີນ​ກວ່າ 2 ຄົນ, ຖ້າອົງການໃດຫາກມີພະນັກງານແຕ່ 20 ຄົນຂຶ້ນເມືອ ແມ່ນຈະມີຜູ້ຮອງຫົວໜ້າ 3 ຄົນ(ບໍ່ນັບບັນດາອົງການທີ່ກຸ້ມຕົນເອງ)

      ການກວດກາຄືນໜ້າທີ່ຕຳແໜ່ງນັ້ນ ແມ່ນຈະໄດ້ປະຕິບັດ​ໄປ​ເປັນແຕ່ຂັ້ນນັບ​ແຕ່ເລຂາທິການໃຫ່ຍລົງຮອດພະນັກງານຂັ້ນຕາແສງ, ລວມທັງອົງການສະພາແຫ່ງຊາດ, ລັດຖະບານ, ສານ, ໄອຍະການ…ໃນນັ້ນ, ເນື້ອໃນທີ່ສຳຄັນກໍຄື ການສ້າງຕາຕະລາງຈັດແບ່ງປະເພດຕຳແໜ່ງທີ່ທຽບເທົ່າກັບລະບົບການເມືອງ​ໃຫ້​ລະອຽດ.

      ໃນປັດຈຸບັນ, ໜ້າທີ່ຕຳແໜ່ງໄດ້ກຳນົດໄວ້ໃນຕາຕະລາງເງິນເດືອນ ນັ້ນໄດ້ສົມທຽບວ່າ, ປະທານແນວລາວສ້າງຊາດຂັ້ນແຂວງ ແມ່ນທຽບເທົ່າກັບ ກຳມະການປະຈຳພັກແຂວງ ແລະ ຮອງເຈົ້າແຂວງ, ຫົວໜ້າພະແນກການຂັ້ນແຂວງທຽບເທົ່າກັບ ຫົວໜ້າຄະນະກຳມາທິການ ຂອງສະພາປະຊາຊົນແຂວງ.

     ຜ່ານມາຫວຽດນາມໄດ້ມີການປະຕິຮູບຂັ້ນເງິນເດືອນມາແລ້ວ 4 ຄັ້ງຄື: ປີ 1960, 1985, 1993, 2003 ແຕ່ກໍຍັງເຫັນວ່າ ນະໂຍບາຍດ້ານເງິນເດືອນຂອງພະນັກງານຍັງມີຫຼາຍບັນຫາທີ່ຈະຕ້ອງໄດ້ເບິ່ງຄືນໃໝ່. ຈະປັບເງິນເດືອນພະນັກງານໃຫ້ໄປຕາມຕຳແໜ່ງງານ, ໜ້າທີ່ຕຳແໜ່ງຄວາມຮັບຜິດຊອບ ເພື່ອໃຫ້ສອດຄ່ອງກັບກົດໝາຍລັດຖະກອນ.

       ຕາຕະລາງ ແລະ ຂັ້ນເງິນເດືອນໃໝ່ນີ້ ແມ່ນຈະປະຕິບັດເປັນຕົວເລກທີ່ແນ່ນອນ ບໍແມ່ນເອົາເງິນເດືອນຄູນໃຫ້ດັດສະນີພື້ນຖານທີ່ເຄີຍປະຕິບັດຜ່ານມາ.

ສຳລັບຂັ້ນເງິນເດືອນຂອງຖັນແຖວກຳລັງປະກອບອາວຸດຈະມີສະເພາະໂດຍອີງໃສ່ຊັ້ນ, ຂັ້ນຕຳແໜ່ງ  ຂອງພວກເພີ່ນ.