ກາຣູດ້າຍົກເລີກຄຳສັ່ງຊື້ 737 ແມັກ 8 ເປັນລາຍທຳອິດແລ້ວ
ກາຣູດ້າ ສາຍການບິນແຫ່ງຊາດອິນໂດເນເຊຍ ຈະຍົກເລີກຄຳສັ່ງຊື້ເຮືອບິນໂບອິ້ງ 737 ແມັກ 8 ຈຳນວນ 49 ລຳ, ຫລັງຈາກເຮືອບິນຮຸ້ນນີ້ຕົກໃນລັກສະນະດຽວກັນພາຍໃນເວລາຫ່າງກັນບໍ່ຮອດ 5 ເດືອນ, ຄາດວ່າເປັນສາຍການບິນແຫ່ງທຳອິດທີ່ຍົກເລີກຄຳສັ່ງຊື້.
ໂຄສົກກາຣູດ້າ ເປີດເຜີຍວ່າ: ໄດ້ເຮັດໜັງສືຍົກເລີກຄຳສັ່ງຊື້ທັງໝົດ 49 ລຳໄປຫາໂບອິ້ງ ເນື່ອງຈາກຜູ້ໂດຍສານກາຣູດ້າໃນອິນໂດເນເຊຍບໍ່ເຊື່ອໃຈ ແລະ ໝົດຄວາມເຊື່ອໝັ້ນໃນເຮືອບິນຮຸ້ນນີ້ແລ້ວ. ປັດຈຸບັນ ກຳລັງລໍຖ້າການຕອບຮັບຈາກໂບອິ້ງຢູ່ ແລະ ໄດ້ສອບຖາມໂບອິ້ງອີກວ່າ: ຈະສາມາດຄືນ 737 ແມັກ 8 ທີ່ກາຣູດ້າມີຢູ່ໄດ້ ຫລື ບໍ່ ເພາະໄດ້ຮັບພຽງລຳດຽວຈາກການສັ່ງຊື້ທັງໝົດ 50 ລຳ ໃນປີ 2014 ລາຄາລວມ 4.900 ລ້ານໂດລາສະຫະລັດ ແລະ ໄດ້ຈ່າຍເງິນໃຫ້ໂບອິ້ງແລ້ວ 26 ລ້ານໂດລາສະຫະລັດ. ຜູ້ບໍລິຫານກາຣູດ້າເປີດເຜີຍກັບສື່ມວນຊົນຢູ່ອິນໂດເນເຊຍວ່າ: ໃນຫລັກການແລ້ວຈະບໍ່ແມ່ນການໃຊ້ເຮືອບິນອື່ນແທນໂບອິ້ງ, ແຕ່ອາດເປັນການປ່ຽນໄປໃຊ້ຮຸ້ນອື່ນແທນ.
ດ້ານສາຍການບິນໄລອ້ອນແອຂອງອິນໂດເນເຊຍ ເປີດເຜີຍກ່ອນໜ້ານີ້ວ່າ: ກຳລັງເລື່ອນການມອບຮັບໂບອິ້ງ 737 ແມັກ 8 ຈຳນວນ 4 ລຳ ຫລັງຈາກເຮືອບິນຮຸ້ນດຽວກັນຂອງສາຍການບິນເອທິໂອປີແອລາຍຕົກໃນວັນທີ 10 ມີນາ ຫລັງບິນຂຶ້ນຈາກສະໜາມບິນໃນນະຄອນຫລວງແອດດິສອາບາໄດ້ພຽງ 6 ນາທີ, ສ່ວນເຮືອບິນຂອງໄລອ້ອນແອຕົກໃນວັນທີ 29 ຕຸລາ ຫລັງບິນຂຶ້ນຈາກສະໜາມບິນໃນນະຄອນຫລວງຈາກາຕາໄດ້ພຽງ 13 ນາທີ.
