ລາວ-ຍີ່ປຸ່ນ ເພີ່ມທະວີຮ່ວມມືວຽກງານດ້ານນິຕິບັນຍັດ

   ຕອບສະໜອງຕາມການເຊື້ອເຊີນຂອງທ່ານ ທາດາໂມລິ ໂອຊີມາ ປະທານສະພາຜູ້ແທນລາດຊະດອນແຫ່ງຍີ່ປຸ່ນ, ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດແຫ່ງ ສປປ ລາວ ພ້ອມຄະນະ ໄດ້ຢ້ຽມຢາມສັນຖະວະໄມຕີຍີປຸ່ນຢ່າງເປັນທາງການໃນວັນທີ 18-22 ມີນານີ້.

  ໃນໂອກາດຢ້ຽມຢາມຄັ້ງນີ້, ທ່ານນາງ ປານີ ຢາທໍ່ຕູ້ ໄດ້ພົບປະສອງຝ່າຍກັບທ່ານ ຕາດາໂມຣິ ໂອຊິມະ (Tadamori Oshima) ປະທານສະພາຜູ້ແທນລາຊະດອນຍີ່ປຸ່ນ, ພົບປະກັບທ່ານ ດາເທະ ຈຸອີຈິ ປະທານສະພາສູງຍີ່່ປຸ່ນ, ເຂົ້າຢ້ຽມຂໍ່ານັບອົງມົງກຸດລາຊະກຸມມານ ນາຣຸຮີໂຕ ແລະ ພົບປະກັບທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ. ໃນໂອກາດພົບປະກັບບັນດາການນຳຂອງຍີ່່ປຸ່ນນັ້ນ, ຄະນະຜູ້ແທນລາວໄດ້ຕີລາຄາສູງຕໍ່ການພົວພັນສອງຝ່າຍລາວ ແລະ ຍີ່ປຸ່ນ ທີ່ເປັນມູນເຊື້ອມາແຕ່ດົນນານ ແລະ ມີມິດຕະພາບທີ່ດີນໍາກັນເລື້ອຍໆມາ, ໂດຍສະເພາະພາຍຫລັງໄດ້ສ້າງຕັ້ງສາຍພົວພັນການທູດນໍາກັນແຕ່ປີ 1955 ເປັນຕົ້ນມາເຫັນວ່າໄດ້ຮັບການເສີມຂະຫຍາຍກ້າວຂຶ້ນກາຍເປັນການພົວພັນແບບຄູ່ຮ່ວມຍຸດທະສາດນຳກັນໃນປີ 2015. ຍີ່່ປຸ່ນເປັນປະເທດໜຶ່ງທີ່ໃຫ້ການຊ່ວຍເຫລືອ ສປປ ລາວ ມາຫລາຍທົດສະວັດ ເປັນຕົ້ນແມ່ນການກໍ່ສ້າງພື້ນຖານໂຄງລ່າງ, ການສ້າງຊັບພະຍາກອນມະນຸດ, ຊ່ວຍຍົກລະດັບການບໍລິການດ້ານການສຶກສາ, ສາທາລະນະສຸກ ແລະ ວຽກງານອື່ນໆ ສະເລ່ຍປະມານ 90-100 ລ້ານໂດລາສະຫະລັດຕໍ່ປີ ເພື່ອແນໃສ່ຊ່ວຍໃຫ້ ສປປ ລາວ ບັນລຸເປົ້າໝາຍການພັດທະນາແບບຍືນຍົງ (SDGs) ຕາມກໍານົດໄວ້.

   ສໍາລັບການຮ່ວມມືລະຫວ່າງສອງອົງການນິຕິບັນຍັດຂອງລາວ ແລະ ຍີ່ປຸ່ນ ເຫັນວ່າໄດ້ມີການແລກປ່ຽນບົດຮຽນ ແລະ ຊ່ວຍເຫລືອເຊິ່ງກັນ ແລະ ກັນຕະຫລອດມາ, ໂດຍສະເພາະແລກປ່ຽນການຢ້ຽມຢາມກັນລະຫວ່າງສະພາແຫ່ງຊາດລາວ ແລະ ລັດຖະສະພາຍີ່ປຸ່ນ. ໃນໂອກາດນີ້, ທ່ານນາງ ປານີ ຢາທໍ່ຕູ້ ໄດ້ສະແດງຄວາມຂອບໃຈ ແລະ ຮູ້ບຸນຄຸນຕໍ່ການສະໜັບສະໜູນອັນລໍ້າຄ່າຈາກປະເທດຍີ່ປຸ່ນຕໍ່ການພັດທະນາ ສປປ ລາວ ໃນໄລຍະຫລາຍທົດສະວັດຜ່ານມາ, ອັນໄດ້ປະກອບສ່ວນສຳຄັນເຂົ້າໃນຜົນສຳເລັດຂອງການພັດທະນາເສດຖະກິດ-ສັງຄົມຂອງ ສປປ ລາວ ກໍຄືການຍົກລະດັບຊີວິດການເປັນຢູ່ຂອງປະຊາຊົນລາວໃຫ້ນັບມື້ດີຂຶ້ນ, ພ້ອມທັງສະແດງຄວາມຂອບໃຈຕໍ່ລັດຖະບານ, ລັດຖະສະພາ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫລືອອັນໃຫຍ່ຫລວງແກ່ ສປປ ລາວ ໃນການຊ່ວຍເຫລືອຢ່າງທັນການຕໍ່ເຫດການໄພພິບັດນໍ້າຖ້ວມໃນປີຜ່ານມາ, ເຊິ່ງໄດ້ຊ່ວຍໃຫ້ການຟື້ນຟູຊີວິດການເປັນຢູ່ຂອງປະຊາຊົນຜູ້ປະສົບໄພໄດ້ກັບສູ່ສະພາບປົກກະຕິໂດຍໄວ, ພ້ອມນີ້, ທ່ານນາງ ປານີ ຢາທໍ່ຕູ້ ຍັງໄດ້ສະເໜີທິດທາງການຮ່ວມມືຂອງສອງອົງການນິຕິບັນຍັດລາວ ແລະ ຍີປຸ່ນ ໃຫ້ສືບຕໍ່ການແລກປ່ຽນຢ້ຽມຢາມລະຫວ່າງສະພາແຫ່ງຊາດລາວ ແລະ ລັດຖະສະພາຍີ່ປຸ່ນຫລາຍຂຶ້ນ, ເພື່ອແລກປ່ຽນບົດຮຽນ ຫລື ຈັດສໍາມະນາໃນຫົວຂໍ້ຕ່າງໆທີ່ສະພາແຫ່ງຊາດສອງຝ່າຍມີຄວາມສົນໃຈເຊັ່ນ: ບັນຫາການບໍລິຫານ-ຄຸ້ມຄອງເສດຖະກິດ, ການວາງແຜນພັດທະນາຕົວເມືອງ, ບັນຫານະໂຍບາຍການຊຸກຍູ້ສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ. ນອກນີ້, ຍັງໄດ້ສະເໜີໃຫ້ລັດຖະສະພາຍີ່ປຸ່ນຊຸກຍູ້ໃຫ້ລັດຖະບານຍີ່ປຸ່ນສືບຕໍ່ໃຫ້ການສະໜັບສະໜູນບັນດາໂຄງການພັດທະນາທີ່ລັດຖະບານລາວໄດ້ສະເໜີຕໍ່ລັດຖະບານຍີ່ປຸ່ນ ເພື່ອພິຈາລະນາຊ່ວຍເຫລືອ, ໂດຍສະເພາະໂຄງການສຶກສາຄວາມເປັນໄປໄດ້ໃນການສ້າງເສັ້ນທາງດ່ວນວຽງຈັນ-ຮ່າໂນ້ຍ, ພ້ອມທັງສືບຕໍ່ຊຸກຍູ້ສົ່ງເສີມການຮັດແໜ້ນສາຍພົວພັນມິດຕະພາບ ແລະ ການຮ່ວມມື ດ້ວຍການສ້າງເງື່ອນໄຂ ແລະ ອຳນວຍຄວາມສະດວກໃຫ້ແກ່ການໄປມາຫາສູ່ກັນລະຫວ່າງປະຊາຊົນສອງຊາດລາວ-ຍີ່ປຸ່ນ ສະດວກດີຂຶ້ນ.