ຫວຽດນາມຈະຊ່ວຍກໍ່ສ້າງນັກຮົບໃຫ້ແກ່ລາວ
# ລູກເມືອງພວນ
ແຫລ່ງຂ່າວກອງທັບຫວຽດນາມ ໃຫ້ຮູ້ວ່າ: ຕອນເຊົ້າວັນທີ 19 ມີນານີ້, ຢູ່ຫ້ອງການປ້ອງກັນຊາດຂອງຫວຽດນາມ, ທ່ານ ພົນເອກ ເລືອງເກື່ອງ ຫົວໜ້າການເມືອງກອງທັບປະຊາຊົນຫວຽດນາມ ໄດ້ຕ້ອນຮັບທ່ານ ພົນໂທ ທອງລອຍ ສີລິວົງ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າການເມືອງກອງທັບປະຊາຊົນລາວ.
ຢູ່ໃນກອງປະຊຸມພົບປະກັນລະຫວ່າງສອງຝ່າຍ, ທ່ານ ພົນເອກ ເລືອງເກື່ອງ ແລະ ທ່ານ ພົນໂທ ທອງລອຍ ສີລິວົງ ໄດ້ເປັນເອກະພາບກັນວ່າ: ໃນຕໍ່ໜ້ານີ້, ກອງທັບຂອງສອງປະເທດຈະເພີ່ມທະວີຫລາຍກວ່າເກົ່າໃນການກໍ່ສ້າງພະນັກງານນັກຮົບໃຫ້ແກ່ລາວຢູ່ຕາມບັນດາໂຮງຮຽນທີ່ຂຶ້ນກັບກອງທັບປະຊາຊົນຫວຽດນາມ.
ທັງສອງຝ່າຍເປັນເອກະພາບກັນວ່າ: ຈະເພີ່ມທະວີການໂຄສະນາເຜີຍແຜ່ກ່ຽວກັບສາຍພົວພັນມິດຕະພາບ, ມູນເຊື້ອສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ກອງທັບສອງປະເທດ, ຍູ້ແຮງການຊອກຄົ້ນ ແລະ ເກັບກູ້ອັດຖິຂອງນັກຮົບອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫລະຊີວິດໃນປາງສົງຄາມຢູ່ລາວເພື່ອກັບຄືນປະເທດ.
ກອງທັບປະຊາຊົນຫວຽດນາມ ແລະ ກອງທັບປະຊາຊົນລາວ ຈະສືບຕໍ່ແລກປ່ຽນຄະນະຜູ້ແທນ, ແລກປ່ຽນສິລະປະວັນນະຄະດີ, ກິລາ, ນັກຮົບໜຸ່ມນ້ອຍ ແລະ ຈັດຕັ້ງແຮກສ່ຽວລະຫວ່າງກົມກອງນຳກັນຕື່ມອີກ.
ກະຊວງປ້ອງກັນປະເທດຫວຽດນາມເນັ້ນວ່າ: ການມາຢ້ຽມຢາມຂອງຄະນະຜູ້ແທນກອງທັບປະຊາຊົນລາວໃນຄັ້ງນີ້ ໄດ້ປະກອບສ່ວນຜັນຂະຫຍາຍການຕົກລົງກັນຂອງການນຳຂັ້ນສູງຂອງສອງປະເທດ, ພາຍຫລັງມີການໄປຢ້ຽມຢາມສັນທະວະໄມຕີ ສປປ ລາວ ຢ່າງເປັນທາງການຂອງເລຂາທິການໃຫຍ່, ປະທານປະເທດ ຫງວຽນ ຟູຈ້ອງ ເມື່ອທ້າຍເດືອນກຸມພາຜ່ານມານີ້.
