ລາວເອົາໃຈໃສ່ແກ້ໄຂບັນຫາລະເບີດບໍ່ທັນແຕກໃຫ້ສຳເລັດ
ໃນໂອກາດທີ່ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ປະທານ ຄຊກລ ເຂົ້າຮ່ວມກອງປະຊຸມສະຫຼຸບວຽກງານແກ້ໄຂບັນຫາລະເບີດບໍ່ທັນແຕກ ໃນວັນທີ 19 ມີນານີ້ ທີ່ສູນຮ່ວມມືສາກົນ ແລະ ເຝິກອົບຮົມ ຫຼັກ 5 ນະຄອນຫຼວງວຽງຈັນ, ທ່ານໄດ້ມີຄຳເຫັນແນະນຳໃຫ້ ຄຊກລ ໄດ້ສືບຕໍ່ປັບປຸງ, ແກ້ໄຂບັນຫາຕ່າງຄື: 1. ໃຫ້ສືບຕໍ່ຂະຫຍາຍການສໍາຫຼວດ ແລະ ກວດກູ້ລະເບີດບໍ່ທັນແຕກ (ລບຕ) ໃຫ້ກວມທົ່ວປະເທດ, 2. ເຫັນດີໃຫ້ລະດົມທຶນນໍາປະເທດຜູ້ໃຫ້ທຶນ ໂດຍສະເພາະແມ່ນ ສ.ອາເມລິກາ ເພື່ອປະກອບໃຫ້ບັນດາອົງການປະຕິບັດງານຂອງລາວ ແລະ ຕ່າງປະເທດໃຫ້ເຂົ້າໄປເຮັດການສໍາຫຼວດໃຫ້ທົ່ວປະເທດ. ຖ້າບໍ່ດັ່ງນັ້ນ ພວກເຮົາຈະບໍ່ສາມາດສໍາເລັດແຜນການສໍາຫຼວດ ລບຕ ແຫ່ງຊາດໄດ້, 3. ສໍາລັບການກວດກູ້ ລບຕ ຮັບໃຊ້ໂຄງການພັດທະນາຂອງສູນກາງ ແລະ ທ້ອງຖິ່ນ ລວມທັງດິນປຸກສ້າງທີ່ຢູ່ອາໄສ ແລະ ດິນທໍາມາຫາກິນຂອງປະຊາຊົນລາວບັນດາເຜົ່ານັ້ນ ແມ່ນເຫັນວ່າມີຄວາມຈໍາເປັນຕ້ອງໄດ້ກວດກູ້ ເຖິງແມ່ນວ່າພື້ນທີ່ດັ່ງກ່າວບໍ່ເຄີຍໄດ້ຮັບການຢືນຢັນວ່າມີ ລບຕ ຕົກຄ້າງມາກ່ອນກໍຕາມ, ແຕ່ເພື່ອເປັນການປະຢັດງົບປະມານນັ້ນ ກ່ອນຈະກວດກູ້ ບັນດາອົງການປະຕິບັດງານຕ້ອງໄດ້ດໍາເນີນການສໍາຫຼວດຊອກຫາ ລບຕ ກ່ອນ, 4. ເຫັນດີວ່າຕ້ອງມີຄວາມລະອຽດ ມີຈໍານວນທໍ່ໃດ ແລະ ຈັກເຮັກຕາ ແລະ ມີແຜນທີ່ຮອງຮັບຄັກແນ່ ທັງນີ້ກໍເພື່ອຮັບປະກັນການວາງແຜນໃນການກວດກູ້ ລບຕ ທີ່ຊັດເຈນ. ບັນຫານີ້, ມອບໃຫ້ບັນດາທ່ານຮອງເຈົ້າແຂວງ, ປະທານຄະນະກໍາມະການຄຸ້ມຄອງວຽກງານແກ້ໄຂບັນຫາ ລບຕ ຂັ້ນແຂວງຊີ້ນໍາພາກສ່ວນກ່ຽວຂ້ອງຂອງແຂວງເອົາຂໍ້ມູນດັ່ງກ່າວມາໃຫ້ໄດ້. 5. ເພື່ອສ້າງຄວາມເຊື່ອໝັ້ນໃຫ້ສາກົນປະກອບທຶນເຂົ້າໃສ່ວຽກງານແກ້ໄຂບັນຫາ ລບຕ ໃຫ້ຫຼາຍຂຶ້ນກວ່າເກົ່າ. ສະນັ້ນ, ເຫັນດີໃຫ້ປັບປຸງລະ ບອບແບບແຜນວິທີເຮັດວຽກຂອງ ຄຊກລ ແນໃສ່ໃຫ້ມີລະບອບປະຊຸມ, ລາຍງານ, ແກ້ໄຂວຽກປະຈໍາວັນໃຫ້ໜັກແໝ້ນ; ເອົາໃຈໃສ່ປັບປຸງແບບແຜນວິທີເຮັດວຽກຂອງ ຄກລ ໃຫ້ຂຶ້ນກັບຫ້ອງການ ຄຊກລ ຕາມຂໍ້ຕົກລົງຂອງທ່ານລັດຖະມົນຕີກະຊວງ ຮສສ, ປະທານ ຄຊກລ ສະບັບເລກທີ 3639/ຄຊກລ, ລົງວັນທີ 21 ກັນຍາ 2019 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຫ້ອງການ ຄຊກລ; ປັບປຸງລະບົບການກວດກາພາຍໃນ, ລະບົບການຄຸ້ມຄອງວັດຖຸພາຫະນະ, ການຄຸ້ມຄອງຂໍ້ມູນຂ່າວສານ, ການສະໜອງຈັດຊື້, ການສະ ຫຼຸບລາຍງານ ແລະ ອື່ນໆ ແນໃສ່ໃຫ້ ຄກລ ມີຄວາມເຂັ້ມແຂງເປັນທີ່ເຊື່ອໝັ້ນຂອງປະເທດຜູ້ໃຫ້ທຶນ ແລະ ສືບຕໍ່ປັບປຸງການຈັດຕັ້ງຄຸ້ມຄອງແກ້ໄຂບັນຫາ ລບຕ ຢູ່ບັນດາແຂວງທີ່ມີ ລບຕ ແລະ ຫ້ອງການ ຄກລຂ ໃຫ້ຈະແຈ້ງ, ມີລະບອບແບບແຜນວິທີເຮັດວຽກ ແລະ ມີງົບປະມານເຄື່ອນໄຫວ. 6. ມອບໃຫ້ຫ້ອງ ການ ຄຊກລ ຈັດກອງປະຊຸມສໍາມະນາປຶກສາຫາລືກັບທ້ອງຖິ່ນ ແລະ ບັນດາອົງການປະຕິບັດງານ ເພື່ອແກ້ໄຂຂະບວນການອະນຸມັດບົດບັນທຶກຄວາມເຂົ້າ ໃຈ ເພື່ອຮັບປະກັນວ່າເງິນຊ່ວຍເຫຼືອຂອງສາກົນໄດ້ຖືກຈັດຕັ້ງປະຕິບັດຢ່າງມີປະສິດທິພາບ ແລະ ສາມາດກວດສອບໄດ້, 7. ມອບໃຫ້ຫ້ອງການ ຄຊກລ ຈັດກອງປະຊຸມສໍາມະນາປຶກສາຫາລືກັບກະຊວງກ່ຽວຂ້ອງ ເພື່ອແກ້ໄຂຂະບວນການນໍາເຂົ້າພາຫະນະ ແລະ ອຸປະກອນຮັບໃຊ້ໂຄງການແກ້ໄຂບັນຫາ ລບຕ. ພ້ອມນັ້ນ, ສະເໜີພາກສ່ວນກ່ຽວຂ້ອງຂອງກະຊວງການເງິນ ພິຈາລະນາອະນຸມັດພາຫະນະ ແລະ ວັດຖຸຮັບໃຊ້ໂຄງການແກ້ໄຂ ລບຕ ໃຫ້ໄວ, 8. ເພື່ອຮັບປະກັນມາດຕະຖານການຈັດຕັ້ງປະຕິບັດງານ, ຊ່ຽວຊານ ແລະ ນະໂຍບາຍອື່ນໆ ໃຫ້ສອດຄ່ອງກັບມາດຕະຖານແຫ່ງຊາດການແກ້ໄຂບັນຫາ ລບຕ ຢູ່ ສປປ ລາວ ແລະ ລະບຽບກົດໝາຍຂອງ ສປປ ລາວ.
