ທ່ານຮອງນາຍົກລັດຖະມົນຕີ ແນະນໍາໃຫ້ເອົາໃຈໃສ່ຈັດຕັ້ງປະຕິບັດວຽກງານແມ່ ແລະ ເດັກ ໃຫ້ມີປະສິດທິຜົນ
ໃນວັນທີ 19 ມີນານີ້, ຄະນະກຳມາທິການແຫ່ງຊາດ ເພື່ອຄວາມກ້າວຫນ້າຂອງແມ່ຍິງ ແລະ ແມ່-ເດັກ (ຄຊກມດ), ໄດ້ຈັດກອງປະຊຸມປຶກສາຫາລືການຈັດຕັ້ງຜັນຂະຫຍາຍບັນດາຂໍ້ສະເຫນີແນະຂອງສະຫະປະຊາຊາດ (ສປຊ) ຕໍ່ບົດລາຍງານແຫ່ງຊາດປະຈໍາໄລຍະທີ 3-6 ກ່ຽວກັບການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ ແລະ ບົດລາຍງານແຫ່ງຊາດປະຈໍາໄລຍະທີ 8-9 ກ່ຽວກັບການຈັດຕັ້ງປະຕິບັດສົນທິສັນຍາ ຊີດໍ ກັບບັນດາຄູ່ຮ່ວມພັດທະນາ, ຂຶ້ນຢູ່ຢູ່ນະຄອນຫຼວງວຽງຈັນ, ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ທັງເປັນປະທານຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ, ມີທ່ານທູດປະເທດຕ່າງໆ ປະຈໍາລາວ ແລະ ຄູ່ຮ່ວມພັດທະນາເຂົ້າຮ່ວມນໍາດ້ວຍ.
ໃນກອງປະຊຸມທ່ານ ສອນໄຊ ສີພັນດອນ ໄດ້ເນັ້ນໃຫ້ຄຊກມດ, ບັນດາທ່ານຄະນະກຳມາທິການກະຊວງ-ອົງການ, ແຂວງ ແລະ ນະຄອນຫຼວງວຽງຈັນ ເປັນເຈົ້າການຈັດຕັ້ງ ຜັນຂະຫຍາຍບັນດາຂໍ້ສະເໜີແນະ ສປຊ ໃນການຈັດຕັ້ງປະຕິບັດສົນທິສັນຍາ ວ່າດ້ວຍສິດທິເດັກ ລວມທັງສອງອານຸສັນຍາ ຕາມໜ້າວຽກຂອງຂະແໜງການ ແລະ ທ້ອງຖິ່ນ ໃຫ້ເປັນແຜນວຽກ, ແຜນຄົນ ແລະ ແຜນເງິນ ເພື່ອຈັດຕັ້ງປະຕິບັດຕົວຈິງ, ໂຄສະນາເຜີຍແຜ່ທາງກວ້າງ ແລະ ທາງເລິກກ່ຽວກັບການລຶບລ້າງການໃຊ້ ຄວາມຮຸນແຮງຕໍ່ແມ່ຍິງ ແລະ ເດັກ, ສົ່ງເສີມໃຫ້ລູກທັງຍິງ-ຊາຍ ໄດ້ເຂົ້າໂຮງຮຽນ ແລະ ຮຽນຈົບການສຶກສາພາກບັງຄັບ, ຄົ້ນຄວ້າປັບປຸງບັນດາກົດ ໝາຍ ແລະ ນິຕິກຳຕ່າງໆ, ຄົ້ນຄວ້າປັບປຸງລະບົບ ແລະ ກົນໄກການປົກປ້ອງເດັກ ທີ່ມີຢູ່ໃຫ້ເຊື່ອມຈອດກັນ ສາມາດປະສານງານກັນຢ່າງກົມກຽວ ແລະ ມີປະສິດທິຜົນ, ການຢຸດຕິການໃຊ້ຄວາມຮຸນແຮງຕໍ່ເດັກໃນໂຮງຮຽນ ໂດຍສະເພາະ ແມ່ນການລົງໂທດດ້ວຍການຂ້ຽນຕີ, ການນຳໃຊ້ສືື່ອອນລາຍ ທີ່ປອດໄພສຳລັບເດັກ ແລະ ສຸຂະພາບໄວຈະເລີນພັນ, ເອົາໃຈໃສ່ໂຄສະນາໃຫ້ຜູ້ນຳຊຸມຊົນເຈົ້າກົກເຈົ້າເຫລົ່າ ເພື່ອປ່ຽນແປງທັດສະນະຄະຕິແບບຄອງເດີມ ແລະ ຮີດຄອງປະເພນີເກົ່າແກ່ຫລ້າຫລັງທ່ີເປັນອຸປະສັກ ກີດຂວາງການພັດທະນາເດັກ, ພ້ອມທັງຈັດຕັ້ງໂຄສະນາເຜີຍແຜ່ໃຫ້ສັງຄົມຮັບຮູ້ຢ່າງກວ້າງຂວາງ ກ່ຽວກັບການປົກປ້ອງສິດ ແລະ ຜົນປະໂຫຍດຂອງເດັກ ກຳນົດມາດຕະຖານໃນການຊ່ວຍເຫຼືອເດັກ ທີ່ຖືກເຄາະຮ້າຍຈາກການຄ້າຂາຍເດັກຄ້າປະເວນີເດັກການໃຊ້ແຮງງານເດັກຄວາມຮຸນແຮງຕໍ່ແມ່ຍິງ ແລະ ເດັກ ແລະ ອື່ນໆ.
ໃນກອງປະຊຸມ ຍັງໄດ້ຮັບຟັງການລາຍງານຜົນສຳເລັດໃນການເຂົ້າຮ່ວມປ້ອງກັນບົດລາຍງານແຫ່ງຊາດ 2 ສະບັບ ພາຍໃຕ້ສົນທິສັນຍາທີ່ລາວເຮົາເປັນພາຄີຄື: ບົດລາຍງານແຫ່ງຊາດສະບັບທີ 3-6 ກ່ຽວກັບການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ ແລະ ບົດລາຍງານແຫ່ງຊາດປະຈຳໄລຍະທີ 8 ແລະ 9 ໃນການຈັດຕັ້ງປະຕິບັດສົນທິສັນຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ (ຊີດໍ) ລວມທັງບັນດາຂໍ້ສະເໜີແນະ ຂອງສະຫະປະຊາຊາດຕໍ່ການຈັດຕັ້ງປະຕິບັດວຽກງານຄວາມສະເໝີພາບຍິງ-ຊາຍແລະວຽກແມ່-ເດັກ ແລະ ທິດທາງແຜນວຽກຈຸດສຸມການຈັດຕັ້ງຜັນຂະຫຍາຍ ບັນດາຂໍ້ສະເໜີແນະ ຂອງສະຫະປະຊາຊາດ ທັງໃນວຽກສິດທິເດັກ ແລະ ວຽກຊີດໍ ໄລຍະປີ 2019-2023.
