ປີໃໝ່ລາວນະຄອນຫລວງຈະໄດ້ກຳນົດເຂດຫລິ້ນນ້ຳຫົດສົງກັນໃຫ້ເໝາະສົມ
ນັບວ່າເປັນແນວຄວາມຄິດທີ່ດີ, ພາຍຫລັງນະຄອນຫລວງວຽງຈັນ ໄດ້ຈັດສຳມະນາຖອດຖອນບົດຮຽນໃນການສະເຫລີມສະຫລອງສົງການປີໃໝ່ລາວໃນຫລາຍປີຜ່ານມາຂຶ້ນ ໃນວັນທີ 18 ມີນາຜ່ານມານີ້ ພາຍໃຕ້ການເປັນປະທານຂອງທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫລວງ ໂດຍມີພາກສ່ວນຕ່າງໆໃນຂົງເຂດວັດທະນະທຳ, ອົງການຈັດຕັ້ງມະຫາຊົນ ແລະ ຕົວແທນຂອງບັນດາເມືອງຕ່າງໆເຂົ້າຮ່ວມນຳດ້ວຍ.
ໃນກອງປະຊຸມໄດ້ຍົກໃຫ້ເຫັນຈຸດດີທີ່ຄວນຈະຕ້ອງໄດ້ສົ່ງເສີມ ພ້ອມຈຸດອ່ອນຄົງຄ້າງທີ່ຈະຕ້ອງໄດ້ປັບປຸງແກ້ໄຂ ເຊິ່ງໜຶ່ງໃນນັ້ນແມ່ນການມົ້ວສຸມຫລິ້ນກິນຟຸມເຟືອຍ ແລະ ການຫົດສົງກັນຢູ່ຕາມສາຍທາງຫລັກຕ່າງໆໃນຕົວເມືອງຢ່າງຂາດຄວາມເປັນລະບຽບຮຽບຮ້ອຍ ແລະ ຄວາມສະອາດຈົບງາມຂອງຕົວເມືອງຫລວງ ແລະ ມີຊາວໜຸ່ມໄວໜຸ່ມບາງຜ່ອງມືນເມົາເກີນເຫດ ກໍ່ໃຫ້ມີການປະພຶດນຸ່ງນ້ອຍນຸ່ງໜ້ອຍ, ເຕັ້ນເຢາະເຕັ້ນຢ່ອງໄປຕາມຫ້າງຮ້ານແຄມທາງຫລວງ ເບິ່ງແລ້ວບໍ່ຄ່ອຍງົດງາມ ແລະ ຖືກຕ້ອງຕາມຮີດຄອງປະເພນີອັນງົດງາມຂອງຊາດລາວເຮົາ, ຍິ່ງໄປກວ່ານັ້ນ ກໍມັກເກີດມີສະພາບຜິດຖຽງອາລະວາດຕີກັນ, ການກໍ່ຄວາມບໍ່ສະຫງົບ ຂີ້ລັກງັດແງະ, ບັນຫາອຸປະຕິເຫດ ແລະ ອື່ນໆຕາມມາ ສົ່ງຜົນໃຫ້ງານບຸນປະເພນີດັ່ງກ່າວຍັງບໍ່ທັນເປັນສິ່ງດຶງດູດໃຈໃຫ້ແກ່ຜູ້ມາທ່ຽວຊົມໄດ້ຢ່າງແທ້ຈິງ.
ດັ່ງນັ້ນ, ໃນກອງປະຊຸມດັ່ງກ່າວຈຶ່ງເຫັນສົມຄວນວ່າ: ຢູ່ແຕ່ລະເມືອງຈະຕ້ອງໄດ້ກຳນົດ ແລະ ຈັດສັນເຂດຫົດສົງ ແລະ ສະຫລອງປີໃໝ່ລາວປີນີ້ໃຫ້ມີຄວາມເປັນລະບຽບຮຽບຮ້ອຍ, ຮັບປະກັນຄວາມສະອາດຈົບງາມ ແລະ ເປັນການສົ່ງເສີມການທ່ອງທ່ຽວ ແລະ ວັດທະນະທຳອັນດີງາມຂອງຊາດຢ່າງແທ້ຈິງ ເຊິ່ງໃນເຂດດັ່ງກ່າວກໍຈະໄດ້ຈັດຕັ້ງໃຫ້ມີຈຸດສະເພາະການຈັດພິທີບາສີສູ່ຂວັນ, ງານລ້ຍງສ້າງສັນຂອງອົງການຈັດຕັ້ງຕ່າງໆຢ່າງມີຄວາມເປັນເອກະພາບປະຕິບັດມາດຕະການປະຢັດມັດທະຍັດ ແລະ ຕ້ານການຟຸມເຟືອຍ, ພ້ອມນັ້ນ ກໍຈະຕ້ອງໄດ້ມີມາດຕະການຫລຸດຜ່ອນການບໍລິໂພກເຄື່ອງດື່ມທີ່ມີທາດເຫລົ້າ ແລະ ເອົາໃຈໃສ່ປະຕິບັດຄຳຂວັນເມົາແລ້ວບໍ່ຂັບຂີ່ໃຫ້ໄດ້ຢ່າງເດັດຂາດ ແລະ ເພີ່ມທະວີສະກັດກັ້ນສິ່ງຫຍໍ້ທໍ້ຕ່າງໆໃນໂອກາດສະຫລອງສົງການປີໃໝ່ລາວໃຫ້ມີບັນຍາກາດເບີກບານມ່ວນຊື່ນລື່ນເລີງຢ່າງແທ້ຈິງ.
