ສສກ ຮ່ວມກັບ ສຕລ ແລະ ໂຄງການນ້ຳໃຈລາວ ຈັດຝຶກອົບຮົມຄູຝຶກບານເຕະ ລະດັບ D

      ໃນວັນທີ 19 ມີນານີ້ ຢູ່ໂຮງຮຽນເຕັກນິກ-ວິຊາຊີບແບບປະສົມ ແຂວງຊຽງຂວາງ ເມືອງແປກ ແຂວງຊຽງຂວາງ ໄດ້ມີພິທີເປີດຊຸດຝຶກອົບຮົມຄູຝຶກກິລາບານເຕະ ລະດັບ D ສະຫະພັນບານເຕະແຫ່ງຊາດລາວ (LFF “D” Certificate Coaching Course) ແລະ ການໃຫ້ຄວາມຮູ້ເລື່ອງລະເບີດບໍ່ທັນແຕກໂດຍຜ່ານກິລາບານເຕະ ອົງການນ້ຳໃຈລາວ (SPIRIT OF SOCCER) ເຊິ່ງຈັດຂຶ້ນໃນວັນທີ 18-22 ມີນານີ້ ໂດຍເຂົ້າຮ່ວມຂອງທ່ານ ສູນເດືອນ ສິນສະໄຫມ ຫົວຫນ້າຂະແຫນງພາລະ ແລະ ສິລະປະ ພະແນກສຶກສາທິການ ແລະ ກິລາແຂວງຊຽງຂວາງ, ທ່ານ Scotty Lee ປະທານອົງການນ້ຳໃຈລາວ (SPIRIT OF SOCCER), ທ່ານ ພຸດທະສັກ ຈູມລະມະນີ ຜູ້ປະສານງານອົງການນ້ຳໃຈລາວ (SPIRIT OF SOCCER) ປະຈຳລາວ, ທ່ານ ສົມສັກ ແກ້ວດາລາ ຮັກສາການຫົວຫນ້າພະແນກເຕັກນິກ-ວິທະຍາ ສຕລ ເປັນຜູ້ບັນຍາຍ ພ້ອມດ້ວຍພະນັກງານວິຊາການທີ່ກ່ຽວຂ້ອງ ແລະ ນັກສຳມະນາກອນມາຈາກ 7 ເມືອງທົ່ວແຂວງຊຽງຂວາງເຂົ້າຮ່ວມ.

      ຈຸດປະສົງໃນການຝຶກອົບຮົມໃນຄັ້ງນີ້ ກໍເພື່ອເສີມສ້າງພັດທະນາຄູຝຶກລຸ້ນສືບທອດກິລາບານເຕະໃຫ້ໄດ້ທົ່ວທຸກເຂດທີ່ຫ່າງໄກ ແລະ ດ້ອຍໂອກາດ ເພື່ອນຳໃຊ້ການຝຶກສອນທັກສະກິລາບານເຕະຂັ້ນພື້ນຖານໃຫ້ຖືກຕ້ອງຕາມຂັ້ນຕອນ ແລະ ມີຄວາມຄ່ອງແຄ້ວ ເພື່ອປັບປຸງ ແລະ ພັດທະນາຄູຝຶກໃຫ້ມີຄວາມຮູ້ຄວາມສາມາດໃນການເຂົ້າຮ່ວມການອົບຮົມຄູຝຶກລະດັບພາກພື້ນຂອງອາຊີຕາມລຳດັບອະນາຄົດ ເພື່ອໃຫ້ການຝຶກສອນນັບມື້ນັບນັບມີມາດຕະຖານ ຮັບປະກັນທາງດ້ານປະລິມານ ແລະ ຄຸນນະພາບ. ພ້ອມດຽວກັນນັ້ນ ນັກສຳມະນາກອນຈະໄດ້ຮຽນຮູ້ເລື່ອງລະເບີດບໍ່ທັນແຕກ ໂດຍຜ່ານກິລາບານເຕະ ອົງການນ້ຳໃຈລາວ (SPIRIT OF SOCCER).