U23 ທີມຊາດລາວ ເດີນທາງເຂົ້າຮ່ວມການແຂ່ງຂັນ ຊີງແຊ້ມອາຊີ 2020 ຮອບຄັດເລືອກຢູ່ມາເລເຊຍ
ວັນທີ 19 ມີນາຜ່ານມາ, ຢູ່ສະໜາມບິນວັດໄຕ ຄະນະຄູຝຶກ ແລະ ນັກກິລາທີມຊາດລາວ ຮຸ້ນອາຍຸບໍ່ເກີນ 23 ປີ ອອກເດີນທາງໄປປະເທດມາເລເຊຍ ເພື່ອເຂົ້າຮ່ວມການແຂ່ງຂັນບານເຕະຊີງແຊ້ມອາຊີ ຮຸ້ນອາຍຸ 23 ປີ ປີ2020 ຮອບຄັດເລືອກທີ່ປະເທດມາເລເຊຍ ຢູ່ຮ່ວມກັບ J ມີ: ມາເລເຊຍ ເຈົ້າພາບ, ສປ ຈີນ ແລະ ຟີລິບປິນ. ຕາຕະລາງການແຂ່ງຂັນທີມຊາດລາວ: ວັນທີ 22 ມີນາ ເວລາ 15:30 ໂມງ ພົບກັບ ສປ ຈີນ, ວັນທີ 24 ມີນາ ເວລາ 17:45 ໂມງ ພົບ ມາເລເຊຍ ແລະ ວັນທີ 26 ມີນາ ເວລາ 15:30 ໂມງ ພົບ ຟີລິບປິນ ທັງ 3 ນັດຈະແຂ່ງຂັນທີ່ສະໜາມຊາອາລຳ.
ບານເຕະຊີງແຊ້ມອາຊີ ຮຸ້ນອາຍຸບໍ່ເກີນ 23 ປີ ປີ 2020 ທີ່ປະເທດໄທ ເປັນເຈົ້າພາບ ລະຫວ່າງວັນທີ 8-26 ມັງກອນ 2020 ຈະຄັດເອົາທີມອັນດັບ 1 ຈາກ 11 ກຸ່ມ A-K ເຂົ້າຮອບສຸດທ້າຍທີ່ປະເທດໄທ ແລະ ເອົາອັນດັບ 2 ດີທີ່ສຸດ 4 ຈາກ 11 ກຸ່ມ A-K. ຂະນະດຽວກັນ ເຈົ້າພາບໄທ ທີ່ເຂົ້າຮ່ວມແຂ່ງຂັນໃນຮອບຄັດເລືອກກຸ່ມ K ຮ່ວມກັບ ຫວຽດນາມ, ອິນໂດເນເຊຍ ແລະ ບູຣໄນ, ຖ້າວ່າ ໄທ ຫາກເປັນແຊ້ມກຸ່ມ K ຈະເອົາອັນດັບ 2 5 ທີມຈາກ 11 ກຸ່ມ A-K ເພາະວ່າ ໄທ ໄດ້ສິດເຂົ້າຮອບສຸດທ້າຍໃນຖານະເຈົ້າພາບ. ສຳລັບທີມແຊ້ມ, ຮອງແຊ້ມ ແລະ ອັນດັບ 3 ບານເຕະຊີງແຊ້ມອາຊີ ຮຸ້ນອາຍຸບໍ່ເກີນ 23 ປີ ຈະໄດ້ສິດເຂົ້າຮ່ວມການແຂ່ງຂັນມະຫາກຳໂອລິມປິກ 2020 ທີ່ປະເທດຍີ່ປຸ່ນ, ສ່ວນຍີ່ປຸ່ນແມ່ນໄດ້ສິດໃນຖານະເຈົ້າພາບ.
