ຄາດວ່າມີຜູ້ເສຍຊີວິດຈາກນ້ຳຖ້ວມ ຢູ່ໂມຊຳບິກຫລາຍກວ່າພັນຄົນ
ເຈົ້າໜ້າທີ່ກ່າວວ່າ: ປະຊາຊົນຫລາຍກວ່າ 1 ພັນຄົນອາດເສຍຊີວິດໃນເຫດພາຍຸໄຊໂຄນພັດຖະຫລົ່ມໂມຊຳບິກໃນອາທິດຜ່ານມາ, ຂະນະທີ່ມີຜູ້ເສຍຊີວິດຈຳນວນຫລາຍ ແລະ ຍັງມີຜູ້ສູນຫາຍຫລາຍກວ່າ 200 ຄົນຢູ່ຊິມບຳເວປະເທດໃກ້ຄຽງ.
ເມືອງເບຍຣາທາງພາກກາງຂອງໂມຊຳບິກທີ່ຜະເຊີນພາຍຸໜັກທີ່ສຸດໃນວັນທີ 14 ມີນາ ກ່ອນເຄື່ອນທີ່ໄປຊິມບຳເວ ເຮັດໃຫ້ເກີດລົມພັດແຮງ ແລະ ນ້ຳຖ້ວມກະທັນຫັນ, ທຳລາຍຖະໜົນ ແລະ ເຮືອນເສຍຫາຍຫລາຍຫລັງ. ປະທານາທິບໍດີ ໂມຊຳບິກ ອອກຖະແຫລງຂ່າວທົ່ວປະເທດວ່າ: ມາຮອດປັດຈຸບັນມີລາຍງານຜູ້ເສຍຊີວິດຈາກທາງການ 84 ຄົນ, ແຕ່ຄາດວ່າຈຳນວນຜູ້ເສຍຊີວິດຈະເພີ່ມຂຶ້ນອີກ ເຊິ່ງຄາດວ່າອາດມີຜູ້ເສຍຊີວິດຫລາຍກວ່າ 1.000 ຄົນ. ກາແດງ IFRC ລາຍງານວ່າ: ເກືອບທົ່ວເມືອງໄດ້ຮັບຄວາມເສຍຫາຍ, ປະຊາຊົນໄດ້ຮັບຄວາມເດືອດຮ້ອນ 530.000 ຄົນ, ສະຖານະການໃນປັດຈຸບັນຮ້າຍແຮງ ແລະ ຄວາມເສຍຫາຍສົ່ງຜົນກະທົບເປັນບໍລິເວນກວ້າງ, ຖະໜົນຫລາຍສາຍຖືກຕັດຂາດ, ບາງທ້ອງຖິ່ນບໍ່ສາມາດເຂົ້າໄປໄດ້, ເຈົ້າແຂວງປະກາດເຕືອນວ່າ: ສະຖານະການພາຍຸພັດຖະຫລົ່ມຈະຮ້າຍແຮງອີກ ເນື່ອງຈາກນ້ຳຖ້ວມເພາະຝົນຕົກຕໍ່ເນື່ອງ.
