ທ່ານ ຮອງນາຍົກລັດຖະມົນຕີ ສອນໄຊ ສີພັນດອນ ລົງຕິດຕາມ-ຊຸກຍູ້ ການຟື້ນຟູໄພພິບັດ ຢູ່ເມືອງສະໜາມໄຊ

     ໃນວັນທີ 12 ມີນານີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະສະເພາະກິດແກ້ໄຂໄພພິບັດລະດັບຊາດ ພ້ອມດ້ວຍຄະນະ ໄດ້ລົງຕິດຕາມ,​ ຊຸກຍູ້ ແລະ ກວດກາ ການຈັດຕັ້ງປະຕິບັດວຽກງານໂຄງການຟື້ນຟູຕ່າງໆ ຫລັງໄຟພິບັດ ຢູ່ 4 ຈຸດບ້ານຕັ້ງໃໝ່ ແລະ 9 ເຂດ ຂອງເມືອງສະໜາມໄຊ ແຂວງອັດຕະປື ຊຶ່ງໄດ້ຮັບຟັງການລາຍງານສະພາບການຈັດຕັ້ງປະຕິ ບັດບັນດາໂຄງການດັ່ງກ່າວ ຈາກພາກສ່ວນກ່ຽວຂ້ອງ ແລະ ຄໍາສະເໜີຂອງປະຊາຊົນ ກ່ຽວກັບຂໍ້ສະດວກ, ຫຍຸ້ງຍາກໃນການດຳລົງຊີວິດທຳມາຫາກິນ, ການສຶກສາຂອງນ້ອງນັກຮຽນ, ລວມທັງການຮັກສາສຸຂະອະນາໄມ ແລະ ອື່ນໆ ແລະ ໄດ້ລົງຕິດຕາມວຽກບຸກເບີກເນື້ອທີ່ການຜະລິດຂອງປະ ຊາຊົນ, ວຽກງານຈັດສັນທີ່ພັກຊົ່ວຄາວ ແລະ ຖາວອນ, ວຽກງານການຄຸ້ມຄອງ-ບໍລິຫານສູນ, ວຽກງານປະເມີນຜົນກະທົບສິ່ງແວດລ້ອມ ແລະ ການຊົດເຊີຍຜົນເສຍຫາຍ, ວຽກຟື້ນຟູໄລຍະສັ້ນ, ໄລຍະກາງ ແລະ ໄລຍະຍາວ. ມາຮອດປັດຈຸບັນ ມີທ່າອ່ຽງດີຂຶ້ນຫລາຍ ໂດຍສະເພາະ ການບຸກເບີກເນື້ອທີ່ການຜະລິດສໍາເລັດແລ້ວ 60% ເພື່ອທ່ວງທັນກັບລະດູການຜະລິດໃນປີນີ້.

      ໃນໂອກາດທ່ານ ສອນໄຊ ສີພັນດອນ ຍັງໄດ້ຮຽກຮ້ອງໃຫ້ປະຊາຊົນ ຈົ່ງເພີ່ມທະວີຄວາມສາມັກຄີຮັກແພງຊ່ວຍເຫລືອ ເຊິ່ງກັນ ແລະ ກັນ, ພ້ອມກັນອອກແຮງເພີ່ມພູນຜະລິດຜົນ ສ້າງເສດຖະກິດຄອບຄົວໃຫ້ມີຢູ່ມີກິນ, ພ້ອມນັ້ນໃຫ້ມີສະຕິເຝົ້າລະວັງການແຜ່ລະບາດຂອງພະຍາດໄຊ້ຍຸງລາຍ ແລະ ເອົາໃຈ ໃສ່ປະຕິບັດ ຄໍາສັ່ງແນະນໍາຕ່າງໆຂອງຂັ້ນເທິງວາງອອກຢ່າງເຂັ້ມງວດ.