ກະຊວງຊັບພະຍາກອນ ແລະ ສິ່ງແວດລ້ອມ ແລະ ສາທາລະນະສຸກແນະນຳໃຫ້ສັງຄົມເອົາໃຈໃສ່ປ້ອງກັນຝຸ່ນລະອອງ PM 2,5
ເມື່ອຫລາຍວັນຜ່ານມານີ້, ຢູ່ ນະຄອນຫລວງວຽງຈັນ ແລະ ບັນດາແຂວງໃກ້ຄຽງ ໄດ້ມີສະພາບຝຸ່ນລະອອງ PM 2.5 ຊຶ່ງເລີ່ມແຜ່ຂະຫາຍ ແຕ່ວັນທີ 11 ມີນາ ນີ້ເປັນຕົ້ນມາ ເຫັນວ່າຄ່າຄວາມເຂັ້ມຂຸ້ນຂອງຝຸ່ນລະອອງ PM-2,5 ສູງເຖິງ 108,9 µg/m3 ໃນວັນທີ 12 ມີນາ ສູງຂຶ້ນເຖິງ 172,1 µg/m3 ເຊິ່ງສູງກວ່າຄ່າມາດຕະຖານສິ່ງ ແວດລ້ອມຂອງ ສປປ ລາວ ທີ່ກຳນົດໄວ້ 50 µg/m3 ຫຼື ສູງກວ່າມາດຕະຖານຄຸນ ນະພາບສິ່ງແວດລ້ອມແຫ່ງຊາດ ປະມານ 3,5 ເທົ່າຕົວ ເຊິ່ງຖືເປັນລະດັບອັນຕະລາຍ. ມາເຖິງວັນທີ 13 ມີນາ ຄ່າຝຸ່ນລະອອງ PM-2,5 ໄດ້ເລີ່ມຫຼຸດລົງມາ 140,6 µg/m3 ແລະ ປັດຈຸບັນ ເຖິງວ່າຈະບໍ່ມີຜູ້ປ່ວຍທີ່ເປັນພະຍາດທາງເດີນຫາຍໃຈເພີ່ມຂຶ້ນ, ແຕ່ຕໍ່ກັບສະພາບດັ່ງກ່າວກໍອາດ, ມີຄວາມສ່ຽງເຮັດໃຫ້ປະຊາຊົນເກີດເປັນພະຍາດໄດ້ ສະນັ້ນ ເພື່ອປ້ອງກັນພະຍາດທີ່ຈະເກີດຂຶ້ນ, ທ່ານ ພູທອນ ເມືອງປາກ ຮອງລັດຖະມົນຕີກະຊວງ ສາທາລະນະສຸກ ໄດ້ອອກມາເຕືອນໃຫ້ສັງຄົມເອົາໃຈໃສ່ໃນການເບິ່ງແຍງຮັກສາສຸຂະພາບ ແລະ ປ້ອງກັນພະຍາດທີ່ອາດຈະເກີດຂຶ້ນ ໂດຍສະເພາະພະຍາດທາງເດີນຫາຍໃຈວ່າ: ເພື່ອຫລຸດຜ່ອນຜົນກະທົບຕໍ່ສຸຂະພາບຈາກມົນລະພິດທາງອາກາດ ຫລື ໝອກຄວັນຈາກໄຟໄໝ້ປ່າຕ້ອງປະຕິບັດຄື: ອັດປະຕູ ແລະ ປ່ອງຢ້ຽມເພື່ອບໍ່ໃຫ້ໝອກຄວັນເຂົ້າມາສະສົມໃນເຮືອນ, ຜູ້ສູງອາຍຸທີ່ມີພະຍາດປະຈຳຕົວກ່ຽວກັບລະບົບຫົວໃຈເສັ້ນເລືອດ ແລະ ລະບົບຫາຍໃຈ, ພະຍາດຫອບຫືດ, ລວມທັງເດັກນ້ອຍທີ່ມີພູມຄຸ້ມກັນຮ່າງກາຍບໍ່ທັນແຂງແຮງບໍ່ຄວນອອກໄປເຄື່ອນໄຫວກິດຈະກຳຢູ່ນອກເຮືອນ, ຖ້າມີອາການຜິດປົກກະຕິໃຫ້ຮີບຮ້ອນໄປພົບທ່ານໝໍທັນທີ, ຖ້າອອກເຮືອນຄວນໃສ່ໜ້າກາກປະເພດ N95 ທີ່ສາມາດກັ່ນຕອງຝຸ່ນລະອອງຂະນາດນ້ອຍໄດ້, ຄວນໃຊ້ຜ້າຈຸ່ມນ້ຳອັດປາກ ແລະ ດັງເພື່ອຜ່ານກຸ່ມຄວັນອອກໄປຫາບ່ອນປອດໄພ, ໃສ່ແວ່ນຕາເພື່ອປ້ອງກັນດວງຕາຈາກລົມ ແລະ ໝອກຄວັນ, ຜູ້ຂີ່ລົດຈັກ, ລົດຖີບຄວນໃສ່ໝວກກັນກະທົບແບບມີໜ້າກາກ, ໃຊ້ນ້ຳເກືອບ້ວນປາກ ແລະ ຄໍ ເພື່ອປ້ອງກັນການເຈັບຄໍ, ຫລີກລ່ຽງການອອກກຳລັງກາຍໃນໄລຍະທີ່ມີໝອກຄວັນຫລາຍ ເພາະວ່າຈະເປັນອັນຕະລາຍຕໍ່ລະບົບຫາຍໃຈ ແລະ ລະບົບຫົວໃຈເສັ້ນເລືອດ, ຫລີກລ່ຽງການຈູດຂີ້ເຫຍື້ອຢູ່ບໍລິເວນທີ່ຢູ່ອາໃສ, ເພື່ອບໍ່ໃຫ້ເພີ່ມມົນລະພິດທາງອາກາດ.
