ຣີລ ມາດຣິດ ຕິດຕໍ່ ເຊລຊີ ຂໍຊື້ ອາຊາ ແລ້ວ
ເດລີ ເທເລກຣາບ ສື່ຂອງອັງກິດ ລາຍງານວ່າ ຣີລ ມາດຣິດ ຕິດຕໍ່ ໄປຫາ ເຊລຊີ ເພື່ອຂໍຊື້ ເອແດ໊ນ ອາຊາ ປີກຊາວເບລຢ້ຽມແລ້ວ ແລະ ຕອນນີ້ ຣີລ ມາດຣິດ ມີລຸ້ນໄດ້ລາວໄປຮ່ວມທັບຫລາຍກວ່າເກົ່າ ຫລັງຈາກຫາກໍເອົາ ຊີເນດິນ ຊີດານ ຂວັນໃຈຂອງ ອາຊາ ກັບມາເປັນຜູ້ຈັດການຂອງທີມ.
ກ່ອນໜ້ານີ້ ຣີລ ມາດຣິດ ຕົກເປັນຂ່າວກັບ ອາຊາ ມາດົນ ກ່ອນຕົ້ນລະດູການນີ້ຈະມີລາຍງານກ່ຽວກັບພວກເຂົາ ແລະ ດາວເຕະຊາວເບລຢ້ຽມຫລາຍຂຶ້ນ ຫລັງຈາກ ຣີລ ມາດຣິດ ຕັດສິນໃຈປ່ອຍ ຄຣິສເຕຍໂນ ໂຣນັລໂດ້ ນັກເຕະຊຸບເປີສະຕາໄປຢູ່ກັບ ຢູເວນຕຸສ ໃນຊ່ວງໜ້າຮ້ອນຜ່ານມາ.
ເຖິງວ່າ ຣີລ ມາດຣິດ ຈະບໍ່ສາມາດຄວ້າ ອາຊາ ໄປຮ່ວມທີມກ່ອນເປີດລະດູການ 2018-19 ໄດ້ ແຕ່ພວກເຂົາຍັງບໍ່ຍົກເລີກແຜນຈະດຶງອະດີດດາວເຕະ ລີລ ໄປຮ່ວມທີມ ເຊິ່ງນັກເຕະໄວ 28 ປີມັກຈະໃຫ້ສຳພາດເລື້ອຍໆວ່າ: ມັກ ຣີລ ມາດຣິດ ມາແຕ່ນ້ອຍໆ ແລະ ຢາກໄປຫລິ້ນໃຫ້ຍອດທີມແຫ່ງຖິ່ນ ຊານຕິອາໂກ້ ເບນາເບວ ພ້ອມບອກວ່າ ຈະຕັດສິນໃຈອະນາຄົດຂອງຕົນເອງຫລັງຈົບລະດູການນີ້ ຫລັງຈາກລາວຈະໝົດສັນຍາກັບ ເຊລຊີ ໃນຊ່ວງໜ້າຮ້ອນ ປີ 2020.
ຫລ້າສຸດ ເທເລກຣາບ ລະບຸວ່າ ຣີລ ມາດຣິດ ໄດ້ຕິດຕໍ່ໄປຫາ ເຊລຊີ ເພື່ອເຈລະຈາເລື່ອງຂໍຊື້ ອາຊາ ແບບເປັນທາງການແລ້ວ ເຊິ່ງເຊື່ອກັນວ່າ ເຊລຊີ ຕ້ອງການເງິນ 100 ລ້ານປອນ ເພື່ອເປັນຄ່າຕົວຂອງ ອາຊາ. ທັງນີ້ ການທີ່ ຣີລ ມາດຣິດ ຕັດສິນໃຈດຶງ ຊີດານ ກັບມາເປັນຄູຝຶກຂອງທີມ ອາດຈະເຮັດໃຫ້ພວກເຂົາມີໂອກາດໄດ້ ອາຊາ ໄປຮ່ວມທີມຫລາຍກວ່າເກົ່າ ເນື່ອງຈາກ ອາຊາ ຊື່ນຊົມ ຊີດານ.
