ລັດຖະບານລາວ ປະດັບຫລຽນກາມິດຕະພາບ ໃຫ້ຮອງຜູ້ຕາງໜ້າອົງການ UNICEF ປະຈຳລາວ
ພິທີປະດັບຫລຽນກາມິດຕະພາບ ໃຫ້ແກ່ ທ່ານ ມິໂອ-ຊິນ ຢູນ (Myo-Zin Nyunt), ຮອງຜູ້ຕາງໜ້າອົງການອຸຍນິເຊບ (UNICEF) ປະຈໍາລາວ, ໄດ້ມີຂຶ້ນໃນວັນທີ 11 ມີນານີ້, ຢູ່ນະຄອນຫຼວງວຽງຈັນເພື່ອຍ້ອງຍໍຊົມເຊີຍຜົນງານຂອງທ່ານທີ່ໄດ້ຕັ້ງໜ້າປະກອບສ່ວນເຂົ້າໃນການຮັດແໜ້ນສາຍພົວພັນຮ່ວມມືລະຫວ່າງ ແລະ ອົງການດັ່ງກ່າວ ພ້ອມທັງອອກແຮງປະກອບສ່ວນຊ່ວຍເຫຼືອການພັດທະນາສ້າງສາ ສປປ ລາວ ນັບມື້ເຕີບໃຫຍ່ເຂັ້ມແຂງຕະຫຼອດມາ, ດັ່ງນັ້ນ ລັດຖະບານລາວຕາງໜ້າ ໂດຍແມ່ນທ່ານນາງ ຄຳເພົາ ເອີນທະວັນ ຮອງລັດຖະມົນຕີກະຊວງການຕ່າງປະເທດ ໄດ້ໃຫ້ກຽດປະດັບຫຼຽນໄຊອັນມີຄຸນຄ່າສູງສົ່ງດັ່ງກ່າວ.
ໃນໂອກາດດັ່ງກ່າວ, ທ່ານຮອງລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດໃນການປະຕິບັດໜ້າທີ່ວຽກງານຂອງທ່ານ ມິໂອ-ຊິນ ຢູນ ຕະຫຼອດໄລຍະມາປະຕິບັດໜ້າທີຢູ່ລາວ, ຊຶ່ງໄດ້ປະກອບສ່ວນສໍາຄັນເຂົ້າໃນການເສີມຂະຫຍາຍການພົວພັນຮ່ວມມື ແລະ ຊ່ວຍເຫລືອລາວດ້ານໃນຕ່າງໆຂອງອົງການອຸຍນິເຊບ ເປັນຕົ້ນແມ່ນ ວຽກງານຊ່ວຍເຫລືອແມ່ ແລະ ເດັກທາງດ້ານສາທາລະນະສຸກ ແລະ ໂພຊະນາການຢູ່ລາວຢ່າງມີປະສິດທິພາບ.
ພ້ອມດຽວກັນນີ້, ທ່ານ ມິໂອ-ຊີນ ຢູນ ກໍໄດ້ສະແດງຄວາມຂອບໃຈ ຕໍ່ການຮ່ວມມື ແລະ ສະໜັບສະໜູນຂອງລັດຖະບານລາວ ຕະຫລອດໄລຍະການປະຕິບັດໜ້າທີ່ຂອງຕົນຢູ່ລາວເປັນເວລາ 3 ປີ ຜ່ານມາ, ພ້ອມທັງຢືນຢັນຈະສືບຕໍ່ຊຸກຍູ້ໃຫ້ມີການຊ່ວຍເຫລືອ ແລະ ສະໜັບສະໜູນການພົວພັນຮ່ວມມືຂອງອົງການ UNICEF ແລະ ສປປ ລາວ ຕະຫຼອດໄປ.
