ມອບເຂົ້າສານ 2 ພັນກວ່າໂຕນໃຫ້ຜູ້ປະສົບໄພພິບັດຢູ່ເມືອງສະໜາມໄຊ
ກະຊວງການເງິນໄດ້ມອບເຂົ້າສານຈ້າວຄັງແຮເຂົ້າອາຊຽນ+3 ຕາມພັນທະຂອງລັດຖະບານ ສປປ ລາວ ຈໍານວນຫລາຍກວ່າ 2.200 ໂຕນ ລວມມີມູນຄ່າທັງໝົດ 16,6 ຕື້ກວ່າກີບໃຫ້ກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກໄພພິບັດຢູ່ເມືອງສະໜາມໄຊແຂວງອັດຕະປືເມື່ອປີຜ່ານມາ.
ພິທີມອບ-ຮັບ ໄດ້ມີຂຶ້ນໃນວັນທີ 7 ມີນານີ້ ລະຫວ່າງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແລະ ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ທັງເປັນປະທານຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ.
ເຂົ້າສານຈ້າວຄັງແຮເຂົ້າອາຊຽນ+3 ແມ່ນພັນທະໜຶ່ງຂອງລັດຖະບານ ສປປ ລາວ ໃນໂຄງການສໍາຮອງເຂົ້າສຸກເສີນອາຊຽນ+3, ຊຶ່ງແມ່ນການຮ່ວມມືໃນພາກພື້ນ ແລະ ແມ່ນສ່ວນໜຶ່ງຂອງເຂົ້າສະສົມແຫ່ງລັດ, ຊຶ່ງກົມສະສົມແຫ່ງລັດ ກະຊວງການເງິນເປັນຜູ້ຄຸ້ມຄອງ ຕາມການມອບໝາຍຂອງລັດຖະບານ ເພື່ອຕອບສະໜອງຄວາມຮຽກຮ້ອງຕ້ອງການອັນຈຳເປັນໃນເວລາປະສົບບັນຫາສຸກເສີນດ້ານສະບຽງອາຫານ ຫລື ເກີດໄພພິບັດທຳມະຊາດ ແລະ ມີເປົ້າໝາຍເພື່ອຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກໄພພິບັດ, ປະກອບສ່ວນໃນການປົວແປງຈິດໃຈ ແລະ ແກ້ໄຂຊີວິດການເປັນຢູ່ຂອງເຂົາເຈົ້າໃຫ້ກັບຄືນສູ່ສະພາບປົກກະຕິຕາມເວລາອັນເໝາະສົມ. ລັດຖະບານລາວ ເລີ່ມສະສົມເຂົ້າຄັງແຮອາຊຽນ+3 ໃນປີ 2015 ຈຳນວນ 3 ພັນໂຕນ ໄດ້ກໍານົດເປັນປະເພດເຂົ້າຈ້າວ ເກັບຮັກສາຢູ່ນະຄອນຫລວງວຽງຈັນ ຍ້ອນບໍ່ທັນມີຄວາມພ້ອມດ້ານພື້ນຖານໂຄງລ່າງການສະສົມຈຶ່ງໄດ້ກໍານົດເງື່ອນໄຂເຊົ່າສາງນຳຜູ້ປະກອບການ ທີ່ຊະນະການປະມູນແບບເປີດກວ້າງ, ຊຶ່ງຜູ້ປະກອບການດັ່ງກ່າວຕ້ອງມີເງື່ອນໄຂໃນການຕອບສະໜອງເຂົ້າ, ມີສາງເພື່ອເກັບຮັກສາ, ມີການປະກັນໄພເຂົ້າ ແລະ ສາງ, ຮັບຜິດຊອບການປ່ຽນຖ່າຍ ພາຍໃນກຳນົດເວລາ 6 ເດືອນ ແລະ ຮັບຜິດຊອບຕະຫລາດຮອງຮັບ ໃນເວລາເຂົ້າໃກ້ຈະໝົດອາຍຸຊົມໃຊ້. ເຂົ້າສານຈ້າວຈຳນວນ 3 ພັນໂຕນນີ້ ໄດ້ເບີກຈ່າຍອອກຊ່ວຍເຫລືອປະຊາຊົນ ທີ່ໄດ້ຮັບຜົນກະທົບຈາກນໍ້າຖ້ວມ ໃນປີ 2017 ຈຳນວນ 600 ກວ່າໂຕນໃຫ້ແກ່ແຂວງອຸດົມໄຊ, ຫົວພັນ, ຊຽງຂວາງ, ໄຊຍະບູລີ, ວຽງຈັນ ແລະ ແຂວງບໍລິຄຳໄຊ ແລະ ໃນປີ 2018 ໄດ້ເບີກຈ່າຍອອກຈຳນວນຫລາຍກວ່າ 114 ໂຕນ ເພື່ອຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກນໍ້າຖ້ວມຢູ່ 3 ເມືອງ ຄື: ເມືອງເຟືອງ, ເມືອງກາສີ ແລະ ເມືອງໝື່ນແຂວງວຽງຈັນ.
ການເບີກຈ່າຍເຂົ້າສະສົມແຫ່ງລັດ ອອກຊ່ວຍເຫລືອຜູ້ປະສົບໄພພິບັດໃນຄັ້ງນີ້, ເປັນຄັ້ງທີ 4 ຊຶ່ງເປັນບົດບາດສໍາຄັນຂອງວຽກງານສະສົມແຫ່ງລັດ ແລະ ສອດຄ່ອງກັບແນວທາງນະໂຍບາຍຂອງພັກ-ລັດ ທັງເປັນການສະແດງໃຫ້ເຫັນເຖິງຄວາມເປັນຫ່ວງເປັນໃຍຂອງພັກ ແລະ ລັດຖະບານ ໃນການແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າ.
