ເຟດ-ນາດາລ ຈັບມືກັນຜ່ານເຂົ້າຮອບ 3 ເທັນນິສ ບີເອັນພີ ປາຣິບາສ ໂອເພັນ
ການແຂ່ງຂັນເທັນນິສ ເອທີພີ ທົວ ມາສເຕີ 1000 ແລະ ດັບເບິ້ນຢູທີເອ ທົວ ລາຍການ ບີເອັນພີ ປາຣິບາສ ໂອເພັນ ທີ່ເມືອງອິນດຽນ ເວລ ສະຫະລັດອາເມລິກາ ໃນວັນທີ 10 ມີນາຜ່ານມາ ປະເພດຊາຍດ່ຽວຮອບ 2 ຣາຟາເອລ ນາດາລ ມື 2 ຂອງລາຍການຈາກສະເປນ ຜ່ານເຂົ້າຮອບ 3 ໄດ້ບໍ່ຍາກ ຫລັງເອົາຊະນະ ຈາເຣັດ ໂດນັລສັນ ຈາກສະຫະລັດອາເມລິກາ 2-0 ເຊັດ: 6-1, 6-1. ຂະນະທີ່ ໂຣເຈີ ເຟເດີເຣີ ມື 4 ຈາກສະວິດ ຜ່ານເຂົ້າຮອບເຊັ່ນກັນ ຫລັງເອົາຊະນະ ປີເຕີ ໂກຢອບຊີດ ຈາກເຢຍລະມັນ 2-0 ເຊັດ: 6-1, 7-5.
ຜົນຊາຍດ່ຽວຮອບ 2 ຄູ່ອື່ນທີ່ໜ້າສົນໃຈ ເຄອິ ນິຊິໂກຣິ (ຍີ່ປຸ່ນ, ມື 6) ຊະນະ ອາດຽນ ມອງນາຣິໂນ (ຝຣັ່ງ) 6-4, 4-6, 7-6 (7-4), ຈອນ ອິສເນີ (ອາເມລິກາ, ມື 8) ຊະນະ ອາເລັກເຊ ໂປປິຣິນ (ອົດສະຕຣາລີ) 6-0, 6-2, ມາຣິນ ຊິລິ (ໂຄຣເອເຊຍ, ມື 10) ຊະນະ ດູຊານ ລາໂຢວິດ (ເຊີເບຍ) 6-3, 6-4, ສະແຕນ ວາວຣິນກາ (ສະວິດ) ຊະນະ ມາຣຕັນ ຟຸດໂຊວິດ (ຮົງກາລີ, ມື 29) 6-4, 6-7 (5-7), 7-5).
ສ່ວນປະເພດຍິງດ່ຽວ ຮອບ 3 ເຊເຣນາ ວິວລຽມ ມື 10 ຂອງລາຍການຈາກອາເມລິກາ ຕົກຮອບຢ່າງໜ້າເສຍດາຍ ຫລັງມີອາການບາດເຈັບຕ້ອງຂໍຖອນຕົວໃນຂະນະຕາມຫລັງ ກາບິເຍ ມູກູຣູຊາ ມື 20 ຈາກສະເປນ 0-1 ເກມໃນເຊັດທີ 2 ຫລັງເສຍໄປກ່ອນ 3-6 ໃນເຊັດທຳອິດ, ສ່ວນຜົນຄູ່ອື່ນທີ່ໜ້າສົນໃຈ ຊິໂມນາ ຮາເລັບ (ໂຣມາເນຍ, ມື 2) ຊະນະ ຄາເທຣິນາ ຄອດໂລວາ (ຢູເຄຣນ) 7-6 (7-3), 7-5, ຫວັງ ສຽງ (ຈີນ, ມື 18) ຊະນະ ເອລິເຊ ເມີເທນ (ເບລຢ້ຽມ, ມື 16) 7-6 (7-4), 6-7 (4-7), 6-3, ມາເຄຕາ ວອນດຣູໂຊວາ (ເຊັກ) ຊະນະ ເຍເລນາ ອອສຕາເພນໂກ (ລັດເວຍ, ມື 22) 4-6, 6-3, 6-4, ກິກີ ເບີເທນ (ເນເທີແລນ, ມື 7) ຊະນະ ໂຍຮັນນາ ຄອນຕາ (ສະຫະລາຊະອານາຈັກ) 7-6 (12-10), 6-4.
