ກະຊວງສຶກສາກຽມຫຼຸດຜ່ອນການຮັບນັກຮຽນຄູ ຫັນໄປສູ່ການຍົກລະດັບຄູປະຈໍາການ
ຕາມມະຕິກອງປະຊຸມຜູ້ບໍລິຫານການສຶກສາ ແລະ ກິລາທົ່ວປະເທດ ປະຈໍາປີ 2018 ທີ່ໄດ້ຈັດຂຶ້ນເມື່ອບໍ່ດົນມານີ້, ໄດ້ເຫັນດີເປັນເອກະພາບຕົກລົງ ແລະ ຮັບຮອງເອົາວິທີການ ແລະ ມາດຕະການການແກ້ໄຂບັນຫາສໍາລັບແຕ່ລະຂະແໜງການຍ່ອຍ ເປັນຕົ້ນແມ່ນວຽກງານການສຶກສາຄູ ໂດຍໃຫ້ຫຼຸດຜ່ອນການຮັບນັກຮຽນຄູ ຫັນໄປສູ່ການຍົກລະດັບຄູປະຈໍາການ ເປັນຕົ້ນແມ່ນ ຄູທີ່ສອນບໍ່ຖືກວິຊາ ແລະ ຄູທີ່ຍັງບໍ່ໄດ້ມາດຕະຖານ; ກົມສ້າງຄູສົມທົບກັບສະຖາບັນພັດທະນາບໍລິຫານການສຶກສາ ແລະ ສະຖາບັນສ້າງຄູ ດໍາເນີນການຝຶກອົບຮົມໃຫ້ແກ່ຄູປະຈໍາການ ໂດຍສະເພາະໄລຍະພັກປີຮຽນ ລວມທັງຜູ້ບໍລິຫານການສຶກສາ; ເກັບກໍາຂໍ້ມູນຄວາມຕ້ອງການຝຶກອົບຮົມໄລຍະສັ້ນ ຫຼືໄລຍະຍາວ ໃຫ້ແກ່ຄູອາສາສະໝັກ; ປັບປຸງ/ສັງລວມນະໂຍບາຍການພັດທະນາຄູ ແລະ ສ້າງແຜນປະຕິບັດງານຂະແໜງການຍ່ອຍການສຶກສາ 2019-2020 ແລະ 2020-2025 ແລະ ຊຸກຍູ້ໃຫ້ມີຫົວຂໍ້ການຄົ້ນຄວ້າ ເພື່ອຂໍທຶນນໍາສະພາວິທະຍາສາດ ແລະ ພາກສ່ວນອື່ນໆ.
ເນື່ອງຈາກວ່າແຕ່ລະປີ ມີນັກຮຽນຄູທີ່ຈົບອອກໄປບໍ່ໄດ້ຮັບການບັນຈຸຍັງມີຫຼາຍ, ດັ່ງນັ້ນ, ກະຊວງສຶກສາທິການ ແລະ ກິລາ ຈຶ່ງຈະຫຼຸດຜ່ອນການສ້າງນັກຮຽນຄູລົງທຽບໃສ່ປີຜ່ານໆມາ ແຕ່ໄດ້ເນັ້ນໃນການຍົກສູງຄຸນນະພາບການກໍ່ສ້າງຄູລວມ ທັງເອົາໃຈໃສ່ການຝຶກອົບຮົມຄູໄລຍະປະຈໍາການ ເຊັ່ນ: ຈັດຕັ້ງບໍາລຸງຍົກລະດັບວຸດທິການສຶກສາໃຫ້ແກ່ຄູອານຸບານ, ຄູປະຖົມສຶກສາ ແລະ ຄູມັດທະຍົມສຶກສາ ດ້ວຍຫຼາຍຮູບການ, ມີທັງລະບົບຕໍ່ເນື່ອງໃນໄລຍະພັກປີຮຽນ ແລະ ລະບົບຕໍ່ເນື່ອງປົກກະຕິ. ພິເສດ ກະຊວງສຶກສາທິການ ແລະ ກິລາ ໄດ້ສໍາເລັດຮ່າງມາດຕະຖານສະມັດຖະພາບການສອນຂອງຄູ ເພື່ອເປັນເຄື່ອງມືທີ່ສໍາຄັນໃນການຈັດອັນດັບມາດຕະຖານ ສະມັດທະພາບການສອນຂອງຄູຂັ້ນຕໍ່ໄປ. ສໍາລັບວຽກງານການກໍ່ສ້າງຄູ ນອກຈາກຈະຫຼຸດຜ່ອນການຮັບນັກຮຽນຄູແລ້ວ ຍັງໄດ້ເນັ້ນໃສ່ການປັບປຸງຄຸນນະພາບການຄັດເລືອກນັກຮຽນເຂົ້າຮຽນ ແລະ ຄຸນນະພາບການສິດສອນ ເປັນຕົ້ນແມ່ນ ປັບປຸງຫຼັກສູດການສ້າງຄູອານຸບານ ແລະ ຫຼັກສູດສ້າງຄູປະຖົມທຸກລະດັບໃຫ້ສອດຄ່ອງກັບຫຼັກສູດປະຖົມສຶກສາສະບັບປັບປຸງໃໝ່ ໂດຍສະເພາະການຫຼຸດຜ່ອນຊົ່ວໂມງສອນດ້ານທິດສະດີ, ເພີ່ມພາກປະຕິບັດໃຫ້ຫຼາຍ, ຫຼຸດຜ່ອນວິຊາຮຽນ ແລະ ຂະຫຍາຍເວລາຝຶກຫັດວິຊາຊີບຄູ ຈາກ 10 ອາທິດ ເປັນ 12 ອາທິດ; ປັບປຸງຫຼັກສູດສ້າງຄູພະລະສຶກສາລະດັບຊັ້ນສູງ (ລະບົບ 12+2) ແລະ ຫຼັກສູດປະລິນຍາຕີຕໍ່ເນື່ອງ ພັກປີຮຽນ ມາເປັນລະບົບປົກກະຕິ; ຝຶກອົບຮົມການນໍາໃຊ້ອຸປະກອນການສອນ, ເຄື່ອງທົດລອງສໍາລັບວິຊາຟີຊິກສາດ, ຊີວະສາດ, ເຄມີສາດ ແລະ ຫ້ອງຟັງສຽງ ໃນວິທະຍາໄລຄູ 8 ແຫ່ງ; ໄດ້ສົ່ງຄູສອນຈາກສະຖາບັນສ້າງຄູ ໄປຍົກລະດັບຢູ່ພາຍໃນ ແລະ ຕ່າງປະເທດ; ສ້າງຕັ້ງໂຮງຮຽນສາທິດ ລວມທັງພັດທະນາຄູ່ມືເຮັດວຽກການສອນຂອງຄູ ແລະ ນັກສຶກສາຄູ. ນອກນີ້, ຍັງຝຶກອົບຮົມຄູຝຶກຂັ້ນແຂວງ, ຂັ້ນເມືອງ ແລະ ວິທະຍາໄລຄູ ໃນຂອບເຂດທົ່ວປະເທດ ກ່ຽວກັບການນໍາໃຊ້ປື້ມແບບຮຽນ ແລະ ຄູ່ມືຄູ ວິຊາຄະນິດສາດຊັ້ນປະຖົມສຶກສາ ປີທີ 1; ຖອດຖອນບົດຮຽນກ່ຽວກັບການຈັດຕັ້ງປະຕິບັດການບໍາລຸງຄູປະຈໍາການ ແລະ ການສ້າງເຄືອຂ່າຍພັດທະນາວິຊາຊີບຄູແບບຕໍ່ເນື່ອງ; ໄດ້ປະເມີນຄວາມພ້ອມຂອງແຕ່ລະວິທະຍາໄລຄູ ໃນການເປີດສອນຫຼັກສູດສ້າງຄູລະດັບປະລິນຍາຕີແຫ່ງລະ 2 ສາຍ (ສອນແຕ່ ມ.1-ມ.7) ຈາກຄະນະປະເມີນພາຍນອກ; ການສ້າງຄູໃນສະຖາບັນສ້າງຄູ ແມ່ນອີງໃສ່ແຜນຄວາມຕ້ອງການຄູ ໄດ້ສ້າງແຜນຮັບນັກຮຽນເຂົ້າຮຽນ ແລະ ຈັດແບ່ງຄວາມຮັບຜິດຊອບກ່ຽວກັບການເປີດສອນຫຼັກສູດສ້າງຄູສາຍຕ່າງໆຢູ່ວິທະຍາໄລຄູແຕ່ລະແຫ່ງ ຕາມແຜນການສ້າງຄູ ແລະ ຄວາມພ້ອມຂອງແຕ່ລະວິທະຍາໄລຄູ ເພື່ອກ້າວໄປສູ່ການສ້າງສູນແຫ່ງການພັດທະນາ ແລະ ສູນແຫ່ງຄວາມເປັນເລີດສໍາລັບສາຍສ້າງຄູ.
