ລິເວີພູລ ຍັງສົນໃຈ ແວຣເນີ ຫວັງຕັດໜ້າ ບາເຢິນ
ບິລ ລາຍງານວ່າ ລິເວີພູລ ສົ່ງສັນຍານໄປຫາ ໄລຊິກ ເພື່ອບົ່ງບອກວ່າພວກເຂົາຍັງຄົງສົນໃຈຢາກໄດ້ ຕິໂມ ແວເນີ ຫົວຫອກຄົນເກັ່ງເລືອດດ໊ອຍ ເຖິງວ່າໄລຍະຜ່ານມາກະແສຂ່າວລະບຸວ່າ ລາວຈະຍ້າຍໄປຫລິ້ນກັບ ບາເຢິນ ມິວນິກ ກໍຕາມ.
ບິລ ສື່ດັງໃນເຢຍລະມັນ ລາຍງານວ່າ ລິເວີພູລ ຍັງຄົງຕິດຕໍ່ ແອເບ ໄລຊິກ ສະໂມສອນໃນ ບຸນເດສລີກາ ເພື່ອແຈ້ງໃຫ້ຮູ້ວ່າ ລິເວີພູລ ຍັງຄົງໃຫ້ຄວາມສົນໃຈ ຕິໂມ ແວເນີ ກອງໜ້າເນື້ອຫອມ ເຖິງວ່າສະຖານະຂອງນັກເຕະໃນເວລານີ້ເບິ່ງຄືວ່າຈະຍ້າຍໄປຫລິ້ນໃຫ້ ບາເຢິນ ມິວນິກ ໃນຊ່ວງຊຳເມີ້.
ຫົວຫອກໄວ 23 ປີ ເຊິ່ງສ້າງຄວາມບໍ່ພໍໃຈໃຫ້ແກ່ຕົ້ນສັງກັດຢ່າງໜັກ ຫລັງກຽມຕົກລົງເງື່ອນໄຂຍ້າຍໄປຫລິ້ນກັບ ບາເຢິນ ທັງທີ່ ໄລຊິກ ກັບ ບາເຢິນ ຍັງບໍ່ໄດ້ມີການເຈລະຈາຫຍັງກັນ ໂດຍຈາກລາຍງານລະບຸວ່າ ເລື່ອງທັງໝົດເກີດຂຶ້ນຈາກການທີ່ ຄາລໄຮ ຟໍສະເຕີ ນາຍໜ້າຂອງ ແວເນີ ໄດ້ເຈລະຈາເງື່ອນໄຂກັບແຊ້ມລີກເຢຍລະມັນ ແລະ ນັ້ນເປັນເຫດຜົນໃຫ້ນັກເຕະກຳລັງຈະຕັດສິນໃຈຝາກອະນາຄົດເອົາໄວ້ໃນຖິ່ນອັລລິອັນ ອາຣີນາ.
ທັງນີ້ ສັນຍາປັດຈຸບັນຂອງ ແວເນີ ເຊິ່ງຍິງໄປແລ້ວ 13 ປະຕູຈາກການຫລິ້ນ 25 ນັດໃຫ້ ໄລຊິກ ໃນລະດູການນີ້ ຈະໝົດລົງໃນປີ 2020 ໂດຍສະໂມສອນພະຍາຍາມຈະເຈລະຈາຂະຫຍາຍສັນຍາໃໝ່ກັບນັກເຕະ ແຕ່ເບິ່ງຄືວ່າລາວບໍ່ສົນໃຈ ດ້ວຍເຫດຜົນນີ້ ໄລຊິກ ຈຳເປັນຕ້ອງຂາຍລາວອອກໄປເມື່ອຈົບລະດູການນີ້ ເພື່ອຈະໄດ້ຄ່າຕົວສູງທີ່ສຸດ.
