ລາວວາງ 7 ຄາດໝາຍໃຫຍ່ກະຕຸ້ນເສດຖະກິດມະຫາພາກໃຫ້ເຕີບໂຕ

ໃນໂອກາດກອງປະຊຸມແລກປ່ຽນບົດຮຽນກ່ຽວກັບການຄຸ້ມຄອງເສດຖະກິດມະຫາພາກລະຫວ່າງລາວ-ໄທເມື່ອບໍ່ດົນມານີ້ຢູ່ນະຄອນຫລວງວຽງຈັນ,ໂດຍການເປັນປະທານຂອງທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນສົມດີດວງດີພ້ອມທັງໄດ້ກ່າວວ່າ: ລັດຖະບານໄດ້ວາງຄາດໝາຍລວມໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII (2016-2020) ເພື່ອນໍາພາປະເທດຊາດຫລຸດພົ້ນອອກຈາກຄວາມດ້ອຍພັດທະນາແລະຮັບປະກັນໃຫ້ເສດຖະກິດມະຫາພາກມີສະຖຽນລະພາບແລະໝັ້ນທ່ຽງ, ລວມຍອດຜະລິດຕະພັນພາຍໃນ GDP ບໍ່ໃຫ້ຫລຸດ 7% ຕໍ່ປີຫລືສ້າງມູນຄ່າເພີ່ມ 738.183 ຕື້ກີບ, ລາຍໄດ້ສະເລ່ຍປະມານ 2.900 ໂດລາສະຫະລັດຕໍ່ຄົນແລະອັດຕາເງິນເຟີໃຫ້ຕໍ່າກວ່າໜຶ່ງຕົວເລກ.ສະນັ້ນເພື່ອຮັບປະກັນໃຫ້ບັນລຸຄາດໝາຍດັ່ງກ່າວລັດຖະບານໄດ້ມີມາດຕະການແລະວຽກງານຈຸດສຸມຄື: (1) ຄຸ້ມຄອງເສດຖະກິດມະຫາພາກໃຫ້ມີສະຖຽນລະພາບໝັ້ນທ່ຽງ. (2) ປັບປຸງລະບົບການຄຸ້ມຄອງການເງິນ-ງົບປະມານ. (3) ຄຸ້ມຄອງເງິນຕາໃຫ້ມີສະຖຽນລະພາບ, ປະຕິບັດນະໂຍບາຍດອກເບ້ຍທີ່ສົມເຫດສົມຜົນຕາມກົນໄກຕະຫລາດ, ກໍານົດອັດຕາດອກເບ້ຍເງິນຝາກ-ເງິນກູ້ຂອງທະນາຄານທຸລະກິດໃຫ້ເໝາະສົມ. (4) ປັບປຸງສະພາບແວດລ້ອມໃນການດໍາເນີນທຸລະກິດໂດຍແກ້ໄຂຂັ້ນຕອນແລະ ຂອດຕ່າງໆທີ່ບໍ່ສະດວກກົດໜ່ວງດ້ວຍການປະຕິບັດກົດໝາຍສົ່ງເສີມການລົງທຶນ. (5) ກວດຄືນດໍາລັດວ່າດ້ວຍການຄຸ້ມຄອງສີນຄ້າແລະບໍລິການແລະຄົ້ນຄວ້າອອກລະບຽບການເພີ່ມຕື່ມ. (6) ຊຸກຍູ້ສົ່ງເສີມການຜະລິດແລະການບໍລິການໂດຍສົ່ງເສີມການລົງທຶນໃສ່ຂະແໜງການຜະລິດແລະການບໍລິການທີ່ເປັນທ່າແຮງແລະ (7) ຊຸກຍູ້ການຈັດຕັ້ງປະຕິບັດໂຄງການໃຫຍ່ລະດັບຊາດທີ່ລັດຖະບານໄດ້ຕົກລົງແລະບັນຈຸໃນແຜນແລ້ວ.ພ້ອມດຽວກັນນັ້ນກໍສືບຕໍ່ປະຕິບັດນະໂຍບາຍປະຢັດແຫ່ງຊາດແລະຕ້ານການຟູມເຟືອຍໃຫ້ມີປະສິດທິຜົນ.