ບັນລຸເປົ້າໝາຍທາງການເງິນຕ້ອນຮັບປີໃໝ່ດ້ວຍ 5 ເຕັກນິກທີ່ຕ້ອງເຮັດດັ່ງນີ້
ເຮົາທຸກຄົນສາມາດບັນລຸເປົ້າໝາຍທາງການເງິນໄດ້ ໂດຍການສຳຫລວດຂໍ້ຜິດພາດຂອງໂຕເອງ, ຕັ້ງເປົ້າໝາຍ ແລະ ລົງມື ເຮັດທັນທີ, ລວບລວມຊັບສິນແລະ ໜີ້ສິນທັງໝົດ, ສຶກສາຮູບແບບການລົງທຶນໃໝ່ໆ ແລະ ຕິດຕາມເປົ້າໝາຍຢ່າງສະໝໍ່າສະເໝີ.
1. ສຳຫລວດຂໍ້ຜິດພາດຂອງຕົນເອງໃນຮອບປີທີ່ຜ່ານມາ : ຫລາຍຄົນມັກຕັ້ງເປົ້າໝາຍໃນໄລຍະປີໃໝ່ວ່າຈະເຮັດຫຍັງແດ່, ແຕ່ເມື່ອຮູ້ສຶກໂຕອີກເທື່ອກໍພົບວ່າບໍ່ສາມາດເຮັດໄດ້ຕາມເປົ້າໝາຍທີ່ຕັ້ງໄວ້ ເຊັ່ນ : ຕັ້ງໃຈຈະລົງທຶນຕັ້ງແຕ່ຕົ້ນປີ ແຕ່ພັດມີແຕ່ກັງວົນ ລໍຖ້າຈັງຫວະການລົງທຶນທີ່ດີຢູ່ ປະກົດວ່າທ້າຍປີແລ້ວຍັງຫາຈັງຫວະໃນການລົງທຶນທີ່ດີບໍ່ໄດ້ ເຮັດໃຫ້ເສຍໂອກາດໃນການລົງທຶນໄປ ແລະ ບໍ່ສາມາດບັນລຸເປົ້າໝາຍການລົງທຶນຢ່າງທີ່ຕ້ອງການໄດ້.
2. ຕັ້ງເປົ້າໝາຍປີ 2019 ແລະ ລົງມືເຮັດທັນທີໂດຍບໍ່ລັງເລ: ເປົ້າໝາຍທີ່ດີຕ້ອງທ້າທາຍເປັນຈິງໄດ້ ແລະ ມີກຳນົດເວລານຳ ເຊັ່ນ : ຕັ້ງເປົ້າໝາຍທ້ອນເງິນໄປທ່ຽວຕ່າງປະເທດໂດຍງົບປະມານ 25 ລ້ານກີບ ພາຍໃນໄລຍະເວລາ 1 ປີ ຫລື ທ້ອນເງິນປຸກເຮືອນດ້ວຍ ເງິນ 750 ລ້ານກີບ ພາຍໃນໄລຍະເວລາ 4 ປີ. ສິ່ງສຳຄັນຢ່າລືມທ້ອນເງິນເພື່ອເປົ້າໝາຍກະສຽນຂອງໂຕເອງນຳ ແລະ ບໍ່ວ່າເປົ້າໝາຍຂອງແຕ່ລະຄົນຈະເປັນແນວໃດ ເພື່ອໃຫ້ບັນລຸເປົ້າໝາຍທີ່ຕ້ອງການ ຈະຕ້ອງລົງມືເຮັດທັນທີ ຢ່າເລື່ອນມື້ນັ້ນມື້ນີ້ ເພາະຍິ່ງເລື່ອນໄປຫລາຍເທົ່າໃດ ກໍໝາຍຄວາມວ່າທ່ານໄດ້ເລື່ອນໂຕຫ່າງໄກອອກຈາກເປົ້າໝາຍທີ່ຕັ້ງໄວ້ຫລາຍເທົ່ານັ້ນ.
3. ລວບລວມຊັບສິນ ແລະ ໜີ້ສິນທີ່ມີທັງໝົດ : ເລີ່ມຈາກການລວບລວມ ແລະ ຈົດບັນທຶກຊັບສິນ, ໜີ້ສິນທີ່ມີທັງໝົດ ເພື່ອໃຫ້ຮູ້ວ່າເຮົາມີຄວາມຮັ່ງມີໃນປະຈຸບັນເປັນແນວໃດແດ່ ເຊິ່ງຄວາມຮັ່ງມີເກີດຈາາກຊັບສິນລົບໜີ້ສິນ ໂດຍການຈົດບັນທຶກນີ້ຈະຊ່ວຍໃຫ້ເຫັນເຖິງຊັບສິນຕ່າງໆທີ່ມີໃນປະຈຸບັນ ບໍ່ວ່າຈະເປັນເງິນຝາກ ຫລື ເງິນທຶນ ແລະ ລາຍລະອຽດໜີ້ສິນຕ່າງໆທີ່ມີ ບໍ່ວ່າຈະເປັນໜີ້ບັດເຄຣດິດ, ໜີ້ເຮືອນ, ໜີ້ລົດ ເພື່ອເບິ່ງວ່າເຮົາຈະເພີ່ມຄວາມຮັ່ງມີໃຫ້ໂຕເຮົາໄດ້ແນວໃດແດ່ ເຊັ່ນ : ທ້ອນເງິນແຕ່ລະເດືອນຫລາຍຂຶ້ນ, ລົງທຶນສ້າງຜົນຕອບແທນໃຫ້ເງິນງອກງາມ ຫລື ປັບຫລຸດໜີ້ສິນທີ່ມີດ້ວຍການເອົາເງິນໄປໂປະຊຳລະໜີ້ສິນຕ່າງໆ. ສິ່ງສຳຄັນ ຢ່າລືມເບິ່ງຂໍ້ມູນການເຮັດປະກັນໄພນຳວ່າມີການເຮັດປະກັນຊີວິດ, ປະກັນສຸຂະພາບ ຫລື ປະກັນອຸປະຕິເຫດໄວ້ຫລາຍໜ້ອຍປານໃດ ພຽງພໍແລ້ວຫລືຍັງ ເຊິ່ງການເຮັດປະກັນຈະຊ່ວຍປົກປ້ອງຄວາມຮັ່ງມີຂອງທ່ານໄດ້ ທັງນີ້ ການຈົດບັນທຶກຄວາມຮັ່ງມີລົງໃນປື້ມສາມາດຈົດຕາມຄວາມເຂົ້າໃຈຂອງທ່ານເອງ ຫລື ໃຊ້ແອັບພລິເຊິນໂຫລດມາໃຊ້ກໍສະດວກຫລາຍຂຶ້ນຄືກັນ.
4. ສຶກສາຮູບແບບການລົງທຶນໃໝ່ໆ : ນອກຈາກການຝາກເງິນໃນບັນຊີເງິນຝາກແບບປະຢັດຫລື ບັນຊີເງິນຝາກປະຈຳແລ້ວ ການລົງທຶນເພື່ອສ້າງຜົນຕອບແທນໃຫ້ເງິນງອກງາມຍັງມີອີກຫລາຍໆທາງເລືອກ ພຽງແຕ່ມີເວລາໃນການສຶກສາຂໍ້ມູນ ບໍ່ວ່າຈະເປັນການລົງທຶນໃນພັນທະບັດ, ຫຸ້ນກູ້ບໍລິສັດເອກະຊົນ ຫລື ກອງທຶນລວມ ເຊິ່ງກອງທຶນລວມຈະມີນະໂຍບາຍຫລາກຫລາຍໃຫ້ເລືອກລົງທຶນ ທັງຫຸ້ນປະສົມອະສັງຫາລິມະຊັບ, ຄຳ ແລະ ນຳ້ມັນ ຫລື ຈະເລືອກລົງທຶນໃນຕະຫລາດຫລັກຊັບດ້ວຍຕົນເອງ ເມື່ອສຶກສາຂໍ້ມູນຈົນເຂົ້າໃຈ ແລະ ຕັດສິນໃຈລົງທຶນແລ້ວ ບໍ່ຄວນລະເລີຍເງິນລົງທຶນໂດຍຄວນຕິດຕາມຂ່າວສານສະຖານະການການລົງທຶນ ແລະ ຜົນຂອງການລົງທຶນຢ່າງສະໝໍ່າສະເໝີ.
5. ຕິດຕາມເປົ້າໝາຍຂອງຕົນເອງຢ່າງສະໝໍ່າສະເໝີ : ຫາກລົງທຶນແລ້ວບໍ່ເປັນໄປຕາມເປົ້າໝາຍທີ່ຕ້ອງການ ຄວນປັບປ່ຽນການລົງທຶນໃຫ້ເໝາະສົມຍິ່ງຂຶ້ນ ທັງນີ້ ຄວນພິຈາລະນາວ່າການລົງທຶນຜິດຈາກເປົ້າໝາຍທີ່ຕັ້ງໄວ້ນັ້ນມັນເກີດຈາກຫຍັງ ຫລາຍເທື່ອເກີດຈາກຄວາມບໍ່ມີວິໄນໃນການທ້ອນ ແລະ ລົງທຶນ. ດັ່ງນັ້ນ ເຮົາຕ້ອງສ້າງວິໄນໃຫ້ກັບໂຕເອງຫລາຍຂຶ້ນ ໂດຍການເຮັດ Saving Plan ເຊິ່ງເປັນໂຕຊ່ວຍຫັກບັນຊີເງິນຝາກມາລົງທຶນໃນກອງທຶນລວມຢ່າງສະໝໍ່າສະເໝີເທົ່າກັນທຸກໆເດືອນ ເພື່ອເປົ້າໝາຍໃນອະນາຄົດ ແຕ່ຫາກພາດເປົ້ນໝາຍດ້ວຍການລົງທຶນທີ່ຜິດພາດ ເຊັ່ນ : ຄາດວ່າຈະໄດ້ຮັບຜົນຕອບແທນ 100% ຕໍ່ປີ, ແຕ່ເມື່ອລົງທຶນແລ້ວຊຳ້ພັດຂາດທຶນ 20% ຕໍ່ປີ ເມື່ອເປັນແບບນີ້ ຄວນທົບທວນການລົງທຶນໃໝ່ເພື່ອໃຫ້ສອດຄ່ອງກັບເປົ້າໝາຍທີ່ ຕ້ອງການ, ໄລຍະເວລາການລົງທຶນ ລວມເຖິງຄວາມສ່ຽງທີ່ສາມາດຍອມຮັບໄດ້.
ຫວັງວ່າສິ່ງທີ່ແນະນຳໄປຈະສາມາດໃຊ້ເປັນແນວທາງໃນການປະຕິບັດເພື່ອຊ່ວຍໃຫ້ບັນລຸເປົ້າໝາຍທາງການເງິນທີ່ຕັ້ງໃຈໄວ້ ໄດ້ ທັງນີ້ ຢາກໃຫ້ເລີ່ມເຮັດ 5 ສິ່ງທີ່ແນະນຳຂ້າງເທິງຕັ້ງແຕ່ຕົ້ນປີ ແລະ ຕັ້ງໃຈລົງມືເຮັດຢ່າງເຕັມທີ່ພວກເຮົາເຊື່ອວ່າປີນີ້ຈະເປັນປີທີ່ດີ ແລະ ໄດ້ຜົນດັ່ງທີ່ທ່ານຕັ້ງໃຈໄວ້.
