ຣັດເຊຍຖອນຕົວຈາກຂໍ້ຕົກລົງ ຄວບຄຸມອາວຸດນິວເຄຼຍ
ຣັດເຊຍ ປະກາດຢຸດການມີສ່ວນຮ່ວມໃນຂໍ້ຕົກລົງຄວບຄຸມອາວຸດນິວເຄຼຍຢ່າງເປັນທາງການ, ຫລັງອາເມລິກາຖອນຕົວຈາກສົນທິສັນຍານິວເຄຼຍໄລຍະກາງ (INF) ໃນທ້າຍປີຜ່ານມາ.
ປະທານາທິບໍດີ ວະລາດິເມຍ ປູຕິນ ຂອງຣັດເຊຍ ລົງນາມໂຈະການມີສ່ວນຮ່ວມຂອງຣັດເຊຍໃນສົນທິສັນຍາຂຸມກຳລັງນິວເຄຼຍໄລຍະກາງ ທີ່ເຮັດຮ່ວມກັບອາເມລິກາໃນຍຸກສົງຄາມເຢັນຢ່າງເປັນທາງການ ໂດຍສົນທິສັນຍານີ້ຈະໝົດອາຍຸໃນອີກ 6 ເດືອນຕໍ່ໜ້າ, ແຕ່ທັງສອງປະເທດຕ່າງກ່າວອ້າງວ່າອີກຝ່າຍເມີນເສີຍຕໍ່ສົນທິສັນຍາ ແລະ ຕ່າງຜະລິດອາວຸດທີ່ເປັນການລະເມີດສັນຍາສົນທິທັງສອງ.
ສົນທິສັນຍານິວເຄຼຍໄລຍະກາງ ເລີ່ມມີຜົນບັງຄັບໃຊ້ນັບແຕ່ປີ 1988 ໂດຍຫ້າມສະຫະພາບໂຊວຽດກັບອາເມລິກາພັດທະນາ ແລະ ປະຈຳການລູກສອນໄຟກັບຈະຫລວດແບບຍິງຈາກພື້ນດິນໄລຍະລະຫວ່າງ 500-5.500 ກິໂລແມັດ ເພື່ອຫລຸດຄວາມເຄັ່ງຕຶງພາຍໃນເອີຣົບ ເນື່ອງຈາກໄລຍະສົງຄາມເຢັນທັງ 2 ປະເທດປະຈຳການລູກສອນໄຟແບບນີ້ເປັນຈຳນວນຫລາຍ.
