ປາກິດສະຖານເປີດນ່ານຟ້າຕາມປົກກະຕິແລ້ວ
ສຳນັກງານການບິນພົນລະເຮືອນປາກິດສະຖານແຈ້ງວ່າ: ສະໜາມບິນທຸກແຫ່ງທົ່ວປາກິດສະຖານ ແລະ ນ່ານຟ້າທົ່ວປະເທດເປີດຕາມປົກກະຕິແລ້ວໃນວັນທີ 4 ມີນານີ້, ຫລັງຈາກປິດທັງໝົດໃນວັນທີ 27 ກຸມພາຜ່ານມາ ເພາະສະຖານະການກັບອິນເດຍເຄັ່ງຕຶງ ສົ່ງຜົນໃຫ້ຜູ້ເດີນທາງລະຫວ່າງປະເທດຕົກຄ້າງຢູ່ຕາມສະໜາມບິນຕ່າງໆ.
ໂຄສົກສຳນັກງານການບິນພົນລະເຮືອນປາກິດສະຖານຖະແຫລງວ່າ: ການເປີດສະໜາມບິນ ແລະ ນ່ານຟ້າທັງໝົດສຳເລັດແຕ່ເວລາ 13:00 ໂມງ ວັນທີ 4 ມີນາຕາມເວລາທ້ອງຖິ່ນ ກົງກັບເວລາ 15:00 ໂມງ ວັນທີ 4 ຕາມເວລາຢູ່ລາວ ໂດຍໄດ້ທະຍອຍເປີດມາແຕ່ວັນທີ 1 ມີນາ. ປາກິດສະຖານປະກາດປິດນ່ານຟ້າທັງໝົດຫລັງມີການໂຈມຕີທາງອາກາດກັບອິນເດຍ ເພາະຂໍ້ຂັດແຍ່ງໃນກາສເມຍ ຕ່າງຝ່າຍຕ່າງອ້າງວ່າຍິງເຮືອບິນຂອງອີກຝ່າຍຕົກ, ຜູ້ນຳຫລາຍປະເທດຕ້ອງຂໍໃຫ້ໃຊ້ຄວາມອົດກັ້ນ ເພາະຢ້ານວ່າຈະແຜ່ລາມກາຍເປັນສົງຄາມ.
ການປິດນ່ານຟ້າຂອງປາກິດສະຖານກະທົບຖ້ຽວບິນລະຫວ່າງອາຊີກັບເອີຣົບທີ່ຕ້ອງບິນຜ່ານປາກິດສະຖານ, ຫລາຍຖ້ຽວບິນຍົກເລີກ ຫລາຍຖ້ຽວບິນປ່ຽນເສັ້ນທາງ, ຜູ້ໂດຍສານສາກົນຕົກຄ້າງຕາມສະໜາມບິນຕ່າງໆຈຳນວນຫລາຍ. ນອກຈາກນີ້ ຍັງກະທົບຕໍ່ການຄົ້ນຫານັກປີນເຂົາຊາວອັງກິດ ແລະ ອີຕາລີທີ່ຫາຍໄປນັບແຕ່ວັນທີ 24 ກຸມພາຜ່ານມາ ຂະນະປີນຍອດເຂົານັງກາປາບັດ ເຊິ່ງເປັນຍອດເຂົາສູງອັນດັບ 9 ຂອງໂລກໃນປາກິດສະຖານ, ຄະນະຄົ້ນຫາຕ້ອງລໍຖ້າໃຫ້ທາງການປາກິດສະຖານອະນຸຍາດໃຫ້ໃຊ້ເຮລິກົບແຕ ແລະ ຫລັງຈາກໄດ້ຮັບອະນຸຍາດແລ້ວ ກໍຍັງຜະເຊີນອຸປະສັກຈາກສະພາບອາກາດປ່ຽນແປງຈົນຕ້ອງຍົກເລີກການຄົ້ນຫາ ທ່າມກາງຄວາມກັງວົນວ່າໂອກາດລອດຊີວິດຂອງນັກປີນເຂົາທັງສອງຈະເຫລືອໜ້ອຍລົງ.
