ລົດແກ້ວ ປ້ອງກັນແຊ້ມແລ່ນນາໆຊາດ ວຽງຈັນ ຮາຟ ມາຣາທອນ 2019
2 ຍອດນັກແລ່ນທົນຈາກ ສປປ ລາວ ນາງ ລົດແກ້ວ ອິນທະກຸມມານ ແລະ ສີສະຫວາດ ທຳມະວົງຈິດ ສາມາດປ້ອງກັນແຊ້ມການແຂ່ງຂັນແລ່ນວຽງຈັນ ຮາຟ ມາຣາທອນ ນາໆຊາດ ປະຈຳປີ 2019 ໃນວັນທີ 3 ມີນາຜ່ານມາ ທີ່ນະຄອນຫລວງວຽງຈັນ. ການແຂ່ງຂັນຄັ້ງນີ້ມີນັກກິລາ ແລະ ມວນຊົນເຂົ້າຮ່ວມເກືອບ 4.000 ຄົນ ຈາກຫລາຍປະເທດ ຊີງໄຊ 18 ລາຍການ.
ປະເພດທີ່ໜ້າສົນໃຈ ຄືຮຸ່ນທົ່ວໄປ ຍິງ-ຊາຍ 21 ກິໂລແມັດ ແລະ 10 ກິໂລແມັດ ໂດຍສະເພາະປະເພດຍິງຮຸ່ນທົ່ວໄປ 21 ກິໂລແມັດ ລົດແກ້ວ ອິນທະກຸມມານ ນັກແລ່ນທີມຊາດລາວ ໄວ 24 ປີ ສາມາດປ້ອງກັນແຊ້ມໄດ້ສຳເລັດ ເຊິ່ງເປັນການຄວ້າແຊ້ມ 3 ປີຕິດຕໍ່ກັນ ເຂົ້າເສັ້ນໄຊດ້ວຍເວລາ 1 ຊົ່ວໂມງ 23 ນາທີ 40,8 ວິນາທີ ເອົາຊະນະອັນດັບທີ 2 ນັກກິລາຈາກຍີ່ປຸ່ນ ເກືອບ 13 ນາທີ, ທີ 3 ແມ່ນນັກກິລາຈາກໄທ ຕາມຫລັງເກືອບ 15 ນາທີ. ລົດແກ້ວ ເຂົ້າຮ່ວມລາຍການນີ້ 4 ປີຊ້ອນ ປີທຳອິດ 2016 ໄດ້ທີ 2 ຈາກນັ້ນ 3 ປີຕໍ່ມາເປັນແຊ້ມ.
ຂະນະທີ່ປະເພດຊາຍ ຮຸ່ນທົ່ວໄປ 21 ກິໂລແມັດ ທີ 1 ເປັນນັກກິລາຈາກເຄນຢາ, ທີ 2 ຍີ່ປຸ່ນ ແລະ ທີ 3 ເຄນຢາ. ສ່ວນປະເພດຊາຍ ແລ່ນ 10 ກິໂລແມັດ ສີສະຫວາດ ທຳມະວົງຈິດ ອີກໜຶ່ງນັກແລ່ນທີມຊາດລາວ ສ້າງສະຖິຕິຄວ້າແຊ້ມລາຍການນີ້ 4 ປີຕິດຕໍ່ກັນ ເວລາ 34 ນາທີ 24,3 ວິນາທີ, ທີ 2 ແລະ ທີ 3 ເປັນນັກກິລາຈາກລາວເຮົາ ຮັກດີ ແພງພັນແສນຈິດ ແລະ ວຽງສະຫວັນ ແກ້ວວົງກົດ ຕາມຫລັງເກືອບ 5 ນາທີ.
