ຕຳຫລວດມຽນມາຢຶດຢາບ້າ ໄດ້ຫລາຍກວ່າ 10 ລ້ານເມັດ
ຕຳຫລວດມຽນມາຖະແຫລງວັນທີ 4 ມີນາວ່າ: ເຈົ້າໜ້າທີ່ຢຶດຢາບ້າໄດ້ຫລາຍກວ່າ 10 ລ້ານເມັດ ມູນຄ່າ 13,3 ລ້ານໂດລາສະຫະລັດ ໃນທ້າຍອາທິດຜ່ານມາ. ຖືເປັນການຢຶດຢາເສບຕິດໄດ້ຄັ້ງໃຫຍ່ໃນປະເທດ ເຊິ່ງຄາດວ່າເປັນແຫລ່ງຜະລິດຢາບ້າລາຍໃຫຍ່ທີ່ສຸດໃນໂລກ.
ເຈົ້າໜ້າທີ່ກ່າວວ່າ: ຢາໄອສ໌ທີ່ມີຄຸນນະພາບດີກວ່າ ຈະຖືກລັກລອບຂົນສົ່ງອອກຈາກມຽນມາຜ່ານເຄືອຂ່າຍ ເພື່ອມາຕະຫລາດທີ່ສ້າງກຳໄລໄດ້ຫລາຍກວ່າ ເຊິ່ງອາດສົ່ງໄປໄກເຖິງຍີ່ປຸ່ນ, ສ.ເກົາຫລີ ແລະ ອົດສະຕຣາລີ. ສ່ວນຢາບ້າຄຸນນະພາບຕໍ່າກວ່າຈະນຳມາຂາຍຮອງຮັບຄວາມຕ້ອງການຂອງຕະຫລາດພາຍໃນປະເທດ ລວມທັງກຸ່ມຜູ້ຕິດຢາເສບຕິດຢູ່ໄທ ແລະ ບັງກະລາເທດ. ສື່ທາງການລາຍງານໃນວັນທີ 4 ມີນາວ່າ: ການຢຶດຢາເສບຕິດສອງຄັ້ງໃຫຍ່ມີຂຶ້ນທາງຕາເວັນຕົກຂອງປະເທດໃນທ້າຍອາທິດຜ່ານມາ ຢູ່ເຂດມະກາເວ ແລະ ມອງດໍໃນລັດຍະໄຂ່. ຕຳຫລວດກ່າວວ່າ: ຖືເປັນການຢຶດຢາເສບຕິດໄດ້ຄັ້ງໃຫຍ່ທີ່ສຸດໃນປີນີ້ຂອງມຽນມາ ແລະ ເປັນຄັ້ງໃຫຍ່ທີ່ສຸດໃນເຂດມອງດໍໃນລັດຍະໄຂ່ ຄາດວ່າມີທ່າອ່ຽງສົ່ງໄປບັງກະລາເທດ ເຊິ່ງເປັນແຫລ່ງສ້າງລາຍຮັບໃຫ້ຜູ້ອົບພະຍົບຊາວໂຣຮິງຢາ ເຊິ່ງຫລັ່ງໄຫລຂ້າມຊາຍແດນນັບແຕ່ປີ 2017. ຂະນະທີ່ການຜະລິດຢາເສບຕິດສ່ວນຫລາຍມີຂຶ້ນທາງຝັ່ງກົງຂ້າມໃນລັດສານທາງຕາເວັນອອກ ເຊິ່ງເປັນພື້ນທີ່ຂັດແຍ່ງທາງທະຫານ ແລະ ມີເຄືອຂ່າຍຄ້າຢາເສບຕິດ.
