ອາເມລິກາ ແລະ ສ.ເກົາຫລີ ຈະຢຸດຕິ ການຊ້ອມຮົບຮ່ວມຂະໜາດໃຫຍ່
ໃນວັນທີ 3 ມີນາ, ກະຊວງປ້ອງກັນປະເທດ ສ.ເກົາຫລີ ຢືນຢັນວ່າ: ປະເທດນີ້ ແລະ ອາເມລິກາ ຈະຢຸດຕິບັນດາການຊ້ອມຮົບຮ່ວມທີ່ມີຂອບຂະໜາດໃຫຍ່ປະຈຳປີ. ກະຊວງປ້ອງກັນປະເທດ ສ.ເກົາຫລີ ຊີ້ແຈງວ່າ: ທ່ານ Jeong Kyeong-doo ລັດຖະມົນຕີກະຊວງປ້ອງກັນປະເທດ ສ.ເກົາຫລີ ແລະ ຄູ່ຕຳແໜ່ງອາເມລິກາ Pattrick Shanahan ໄດ້ມີການໂອ້ລົມຜ່ານທາງໂທລະສັບໃນວັນທີ 2 ມີນາ, ໃນນັ້ນ ໄດ້ປຶກສາຫາລື ແລະ ເຫັນດີນຳກັນຕໍ່ແຜນການທີ່ກ່ຽວຂ້ອງເຖິງການຊ້ອມຮົບ Key Resolve ເຊິ່ງແມ່ນການຊ້ອມຮົບບັນຊາການສົມມຸດຖານທາງຄອມພິວເຕີ ແລະ Foal Eagle ແມ່ນການຊ້ອມຮົບຮ່ວມທີ່ມີຂອບຂະໜາດໃຫຍ່ທີ່ສຸດລະຫວ່າງ ອາເມລິກາ ແລະ ສ.ເກົາຫລີ ເຊິ່ງ ສປປ ເກົາຫລີ ໄດ້ກ່າວປະນາມວ່າ: ແມ່ນການກະທຳເພື່ອກະກຽມຮຸກຮານຕ້ານຄືນພຽງຢາງ. ເພື່ອປ່ຽນແທນໃຫ້ການຊ້ອມຮົບນີ້, ສອງປະເທດຈະດຳເນີນບັນດາການຝຶກແອບເຄື່ອນທີ່ນອກຕົວເມືອງ ເພື່ອດັດປັບ ແລະ ຝຶກແອບການບັນຊາການ ເພື່ອແນໃສ່ຮັກສາກຳລັງຄວາມສາມາດກຽມພ້ອມສູ້ຮົບ.
ຄຳຕັດສິນດັ່ງກ່າວໄດ້ຍົກອອກມາພາຍຫລັງ 2-3 ວັນ ເມື່ອປະທານາທິບໍດີອາເມລິກາ ໂດນັລ ທຣຳ ແລະ ການນຳ ສປປ ເກົາຫລີ ກິມ ຈ໋ອງອຸນ ດຳເນີນກອງປະຊຸມສຸດຍອດຄັ້ງທີສອງ ຢູ່ຮ່າໂນ້ຍ ສສ ຫວຽດນາມ.
