ເຊລຊີ ເປີດສາກເຈລະຈາຕໍ່ສັນຍາ ອາຊາ
ເລີ 10 ສະປອດ ສື່ຂອງຝຣັ່ງ ລະບຸວ່າ: ເຊລຊີ ກຳລັງເຈລະຈາເລື່ອງຕໍ່ສັນຍາກັບ ເອແດັນ ອາຊາ ຢູ່ ໂດຍພວກເຂົາຫວັງທີ່ຈະໃຊ້ຊ່ວງເວລານີ້ໃນການຊັກຊວນ ອາຊາ ໃຫ້ໄດ້, ຫລັງຈາກ ຣີລ ມາດຣິດ ຍັງບໍ່ເຄີຍຍື່ນຂໍ້ສະເໜີເຂົ້າມາແບບເປັນທາງການ.
ອາຊາ ມີສັນຍາກັບ ເຊລຊີ ຈົນຮອດຊ່ວງພັກຮ້ອນປີ 2020 ເຊິ່ງລາວໃກ້ຈະໝົດສັນຍາແລ້ວ ເຮັດໃຫ້ມີກະແສຂ່າວລືຢ່າງໜັກວ່າ ລາວອາດຈະຍ້າຍໄປຢູ່ກັບ ຣີລ ມາດຣິດ ຫລັງຈາກ ຣີລ ມາດຣິດ ຕ້ອງການໃຫ້ລາວໄປເປັນກຳລັງຫລັກໃນແນວລຸກຂອງທີມ, ສ່ວນດາວເຕະຊາວເບລຢ້ຽມມັກຈະໃຫ້ສຳພາດເລື້ອຍໆວ່າ: ຢາກໄປຫລິ້ນໃຫ້ທີມດັງຂອງສະເປນຫລາຍກວ່າ.
ສື່ດັ່ງກ່າວລາຍງານອີກວ່າ: ມາຮອດປັດຈຸບັນ ຣີລ ມາດຣິດ ຍັງບໍ່ໄດ້ຍື່ນຂໍ້ສະເໜີຂໍຊື້ ອາຊາ ຢ່າງເປັນທາງການພຽງແຕ່ຄັ້ງດຽວ ເຊິ່ງເຮັດໃຫ້ ເຊລຊີ ຍັງພໍມີຄວາມຫວັງຢູ່ວ່າຈະສາມາດເກ້ຍກ່ອມໃຫ້ອະດີດນັກເຕະ ລີລ ຢູ່ກັບທີມຕໍ່ໄປໄດ້.
