ສປ ຈີນ ຊ່ວຍເຫລືອຍົກລະດັບໂທລະ ພາບຊ່ອງ 3 ຈາກລະບົບອານາລ໊ອກເປັນດີຈີຕອນ
ໃນວັນທີ 28 ກຸມພານີ້, ຢູ່ສະຖານີໂທລະພາບແຫ່ງຊາດ ໄດ້ເປີດໂຄງການຊ່ວຍເຫລືອປັບປຸງຍົກລະດັບໂທລະພາບແຫ່ງຊາດຊ່ອງ 3 ຈາກລະບົບອານາລ໊ອກ (SD) ໃຫ້ເປັນລະບົບດີຈີຕອນ(HD) ໂດຍການສະຫນັບສະຫນູນຈາກລັດຖະບານ ສປ ຈີນ ໃນໄລຍະ 3 ເປັນເວລາ 3 ປີໃຫ້ສໍາເລັດລວມ ມີມູນຄ່າຫລາຍກວ່າ 45 ລ້ານຢວນຫລື ປະມານ 70 ຕື້ກີບ.
ທ່ານບຸນເຈົ້າ ພິຈິດ ອໍານວຍການໂທລະພາບແຫ່ງຊາດ ກ່າວວ່າ: ການຊ່ວຍເຫລືອຄັ້ງນີ້ ແມ່ນຈະໄດ້ປ່ຽນຖ່າຍອຸປກອນໃນການຜະລິດ, ການກະຈາຍ, ການຕັດຕໍ່, ລວມທັງຫ້ອງສະຕູດີໂອ, ພ້ອມທັງຈະມີລົດຖ່າຍທອດສົດທີ່ເປັນລະບົບ HD ສາມາດກະຈາຍຂ່າວໄດ້ທົ່ວໂລກ. ພາຍຫລັງສໍາເລັດຈະເຮັດໃຫ້ການກະຈາຍພາບ ແລະ ສຽງ ຫລືລະບົບເຕັກນິກມີຄຸນນະພາບມີຄວາມຄົມຊັດກວ່າເກົ່າ ເທົ່າ
ທຽມກັບໂທລະພາບບັນດາປະເທດອາຊຽນ ກໍຄືສາກົນເພື່ອປະກອບສ່ວນສໍາຄັນໃຫ້ແກ່ໂຄສະນາເຜີຍແຜ່ແນວທາງນະໂຍບາຍຂອງພັກ-ລັດ. ໂຄງການດັ່ງກ່າວ ຍັງໄດ້ປະກອບສ່ວນສໍາຄັນໃຫ້ແກ່ການພົວພັນຮ່ວມມືຍຸດທະສາດຮອບດ້ານລະຫວ່າງ ສປປ ລາວ ແລະ ສປ ຈີນ. ຜ່ານມາ ລັດຖະບານຈີນກໍໄດ້ໃຫ້ການຊ່ວຍເຫລືອໂທລະພາບແຫ່ງຊາດຊ່ອງ 3 ສໍາເລັດ ໃນປີ 2009 ມູນຄ່າ 10 ລ້ານໂດລາສະຫະລັດ, ທັງໃຫ້ການຊ່ວຍເຫລືອໃນໂຄງການສ້ອມແປງບໍາລຸງຮັກສາ ແລະ ໂຄງການຮ່ວມມືທາງດ້ານເຕັກນິກໄລຍະ2 ທີ່ສໍາເລັດໃນປີ 2017 ໃນມູນຄ່າ 12 ລ້ານຢວນ.
ທ່ານ ຫວັງ ສີ ຫຸຍ ປະທານທີ່ປຶກສາເສດຖະກິດ-ການຄ້າ ສະຖານທູດ ສປ ຈີນ ປະຈໍາລາວ ກ່າວວ່າ: ການຮ່ວມມືໃນຂົງເຂດເສດຖະກິດ-ການຄ້າ ລະຫວ່າງສອງຊາດລາວ-ຈີນ ໄດ້ມີການພັດທະນາຢ່າງວ່ອງໄວ. ສປ ຈີນ ໄດ້ຈັດຢູ່ໃນອັນດັບ 1 ຂອງຕ່າງປະເທດທີ່ມາລົງທຶນຢູ່ ສປປ ລາວເປັນອັນດັບ 1 ຂອງຕ່າງປະເທດໃນການຊ່ວຍເຫລືອລ້າແກ່ ສປປ ລາວ, ທັງເປັນຄູ່ຮ່ວມມືການຄ້າອັນດັບ 2 ຂອງ ສປປ ລາວ. ໃນໄລຍະຜ່ານມາ ລັດຖະບານ ສປ ຈີນ ໄດ້ຊ່ວຍເຫລືອລັດຖະບານລາວ ດໍາເນີນໂຄງການຮ່ວມມືຈໍານວນຫລວງຫລາຍເປັນຕົ້ນຂົວຂ້າມແມ່ນ້ໍາຂອງ, ຫໍປະຊຸມແຫ່ງຊາດ, ອາຄານສໍານັກງານຫ້ອງວ່າການສູນກາງພັກ ແລະ ບັນດາໂຄງການສໍາຄັນອື່ນໆ.
ສໍາລັບໂຄງການຊ່ວຍເຫລືອຄັ້ງນີ້ ກໍແມ່ນຫນຶ່ງໂຄງການທີ່ ສປ ຈີນ ໃຫ້ການຍົກລະດັບພື້ນຖານໂຄງລ່າງດ້ານສື່ມວນຊົນ ພາຍໃນປະເທດກໍຄືການພັດທະນາເສດຖະກິດ-ສັງຄົມຂອງ ສປປ ລາວ ໃຫ້ນັບມື້ຂະຫຍາຍເຕົມເຂັ້ມແຂງເທື່ອລະກ້າວ.
