ແອັບເປິ້ນຈະເລີກຈ້າງແຮງງານໃນ ໂຄງການລົດໄຮ້ຄົນຂັບເກືອບ 200 ຄົນ
ແອັບເປິ້ນອິງ ເປີດເຜີຍວ່າ: ຈະເລີກຈ້າງພະນັກງານ 190 ຄົນໃນໂຄງການໄຕຕັນ (Project Titan) ໂຄງການລົດຂັບເຄື່ອນໄດ້ເອງ. ສະທ້ອນໃຫ້ເຫັນວ່າເຕັກໂນໂລຊີລົດທີ່ແອັບເປິ້ນກຳລັງພັດທະນາຢູ່ຈະດຳເນີນຕໍ່ໄປໃນທິດທາງໃດ.
ແອັບເປິ້ນມີໜັງສືແຈ້ງໄປຫາສຳນັກງານເບິ່ງແຍງການຈ້າງວຽກລັດກາລິຟໍເນຍໃນຕົ້ນເດືອນກຸມພາວ່າ: ຈະເລີກຈ້າງພະນັກງານ 8 ບໍລິສັດ ຈຳນວນ 190 ຄົນ ໃນເມືອງຊານຕາຄລາຣາ ໃກ້ສຳນັກງານໃຫຍ່ໃນເມືອງຄູເປີຕິໂນ ພາຍໃນວັນທີ 16 ເມສາ ໃນຈຳນວນນີ້ມີວິສະວະກອນຊັອບແວ 20 ກວ່າຄົນ, ວິສະວະກອນດ້ານການຮຽນຮູ້ຂອງເຄື່ອງຈັກ ແລະ ວິສະວະກອນຮາດແວ 40 ຄົນລວມຢູ່ນຳ. ໂຄສົກແອັບເປິ້ນແຈ້ງຢືນຢັນໃນເວລາຕໍ່ມາວ່າ: ພະນັກງານທີ່ຖືກເລີກຈ້າງຢູ່ໃນໂຄງການລົດໄຮ້ຄົນຂັບ.
ແອັບເປິ້ນຍອມຮັບວ່າສົນໃຈເລື່ອງລົດຂັບເຄື່ອນໄດ້ເອງ, ແຕ່ບໍ່ເຄີຍເປີດເຜີຍລາຍລະອຽດວ່າໃຊ້ເຕັກໂນໂລຊີປະເພດໃດ, ຈະສ້າງເອງໝົດຄັນ ຫລື ຈະພັດທະນາພຽງເຊັນເຊີ, ລະບົບຄອມພິວເຕີ ແລະ ຊັອບແວຄວບຄຸມລົດ. ການເລີກຈ້າງຄັ້ງນີ້ຖືເປັນການປ່ຽນແປງໂຄງການໄຕຕັນຄັ້ງໃຫຍ່ພາຍໃນການເບິ່ງແຍງຂອງທ່ານ ດັກລາສ ຟິລ ອະດີດຫົວໜ້າວິສະວະກອນລົດເທສລາ ທີ່ຍ້າຍມາເປັນຮອງປະທານໂຄງການພິເສດຂອງແອັບເປິ້ນ.
ຂໍ້ມູນຕາມຄຳຟ້ອງຮ້ອງອະດີດພະນັກງານແອັບເປິ້ນຄົນໜຶ່ງຂໍ້ຫາລັກເອົາຄວາມລັບທາງການຄ້າລະບຸວ່າ: ແອັບເປິ້ນດຳເນີນໂຄງການລົດໄຮ້ຄົນຂັບຕາມຫລັກຄວາມຈຳເປັນໃນການຮູ້ຂໍ້ມູນ (need to know basis) ໂດຍຈ້າງພຽງ 5.000 ຄົນ ຈາກຈຳນວນພະນັກງານທັງໝົດ 140.000 ຄົນ ໃນຈຳນວນນີ້ 1.200 ຄົນຖືເປັນພະນັກງານຫລັກທີ່ເຮັດວຽກດ້ານການພັດທະນາໂຄງການໂດຍກົງ.
