ຜູ້ນຳ ສປປ ເກົາຫລີ ເປີດທາງໃຫ້ອາເມລິກາ ຕັ້ງສຳນັກງານການທູດໃນພຽງຢາງ
ທ່ານ ກິມ ຈ໋ອງອຸນ ຜູ້ນຳ ສປປ ເກົາຫລີ ກ່າວສະແດງຄວາມຍິນດີ ຖ້າອາເມລິກາຈະຈັດຕັ້ງສຳນັກງານຜູ້ແທນທາງການທູດໃນນະຄອນຫລວງພຽງຢາງ. ຂະນະທີ່ ປະທານາທິບໍດີ ໂດນັລ ທຣຳ ຂອງອາເມລິກາ ກ່າວວ່າ: ທ່ານຍັງບໍ່ຮີບຮ້ອນໃນການເຮັດຂໍ້ຕົກລົງຢຸດຕິໂຄງການນິວເຄຼຍ ສປປ ເກົາຫລີ.
ທ່ານ ກິມ ຈ໋ອງອຸນ ກ່າວຕໍ່ນັກຂ່າວວ່າ: ຖືເປັນບາດກ້າວທຳອິດຂອງການປູທາງໄປສູ່ການສະຖາປະນາການພົວພັນທາງການທູດລະດັບປົກກະຕິລະຫວ່າງ ອາເມລິກາ ກັບ ສປປ ເກົາຫລີ ເຊິ່ງຢູ່ກັນຄົນລະຝ່າຍໃນສົງຄາມເກົາຫລີ ແລະ ຍັງບໍ່ໄດ້ເຮັດຂໍ້ຕົກລົງຢຸດຕິສົງຄາມຢ່າງເປັນທາງການ. ຜູ້ນຳ ສປປ ເກົາຫລີ ກ່າວໃນວັນທີ 2 ຂອງກອງປະຊຸມສຸດຍອດໃນນະຄອນຫລວງຮ່າໂນ້ຍ ສສ ຫວຽດນາມ ວ່າ: ຍິນດີຖ້າອາເມລິກາຈະຕັ້ງສຳນັກງານຜູ້ແທນທາງການທູດໃນນະຄອນຫລວງພຽງຢາງ, ສ່ວນທ່ານ ທຣຳ ກ່າວວ່າ: ເປັນຄວາມຄິດທີ່ດີ ຫລັງຈາກຜູ້ນຳທັງສອງຮ່ວມປະຊຸມສຸດຍອດຄັ້ງທຳອິດຢູ່ສິງກະໂປເມື່ອ 8 ເດືອນກ່ອນ. ບັນຍາກາດໃນການເຈລະຈາຄັ້ງນີ້ເປັນໄປຢ່າງອົບອຸ່ນ ແລະ ສະບາຍ ໂດຍທ່ານ ກິມ ຈ໋ອງອຸນ ໃຫ້ຄຳໝັ້ນວ່າຈະເດີນໜ້າປົດອາວຸດນິວເຄຼຍຢ່າງສົມບູນຢູ່ແຫລມເກົາຫລີ, ສ່ວນທ່ານ ທຣຳ ກ່າວໃນການຫາລືຢ່າງເປັນທາງການວ່າ: ທ່ານຍັງບໍ່ຮີບຮ້ອນໃນການເຮັດຂໍ້ຕົກລົງ ເພາະບໍ່ແມ່ນເລື່ອງສຳຄັນເທົ່າກັບການທີ່ ສປປ ເກົາຫລີ ຍັງໂຈະການທົດລອງລູກສອນໄຟ ແລະ ອາວຸດນິວເຄຼຍຢູ່ໃນປັດຈຸບັນ. ທຳນຽບຂາວອາເມລິກາ ຖະແຫລງວ່າ: ກອງປະຊຸມສຸດຍອດຜູ້ນຳ ອາເມລິກາ ແລະ ສປປ ເກົາຫລີ ຄັ້ງນີ້ສຳເລັດລົງໂດຍຍັງບໍ່ມີຂໍ້ຕົກລົງເປັນຮູບປະທຳ ແລະ ຈະມີການຫາລືກັນອີກໃນອະນາຄົດ.
