ແມນຊິຕີ້ ລຸ້ນ ! ເອັຟເອ ກຽມສອບສວນຄະດີດຶງ ຊານໂຊ່ ຜິດກົດ
ສະມາຄົມບານເຕະອັງກິດ ລະບຸວ່າ: ຈະສອບສວນເລື່ອງທີ່ມີການບອກວ່າ ແມນເຊັສເຕີ ຊິຕີ້ ເຮັດຜິດກົດໃນຕອນດຶງ ຈາດອນ ຊານໂຊ່ ໄປຮ່ວມທັບ ຫລັງຈາກທີ່ມີການບອກວ່າ ແມນຊິຕີ້ ລັກຈ່າຍຄ່ານາຍໜ້າເພື່ອໃຫ້ໄດ້ ຊານໂຊ່ ມາຮ່ວມທີມ ແລ້ວຕົວະວ່າເປັນເງິນສ່ວນອື່ນ.
ສະມາຄົມບານເຕະອັງກິດ (ເອັຟເອ) ເປີດເຜີຍວ່າ ພວກເຂົາກຽມຈະສອບສວນເຖິງຂໍ້ກ່າວຫາທີ່ບອກວ່າ ແມນເຊັສເຕີ ຊິຕີ້ ສະໂມສອນມະຫາເສດຖີແຫ່ງ ພຣີເມຍລີກ ອັງກິດ ລະເມີດກົດການເຊັນສັນຍາກັບນັກເຕະລະດັບເຍົາວະຊົນ ໃນຕອນທີ່ດຶງ ຈາດອນ ຊານໂຊ່ ປີກຊາວອັງກິດມາຮ່ວມທັບ.
ຊານໂຊ່ ກາຍເປັນໜຶ່ງໃນນັກເຕະທີ່ຄົນອັງກິດໃຫ້ຄວາມສົນໃຈຫລາຍ ຈາກການທີ່ຕອນນີ້ ລາວກຳລັງສ້າງຜົນງານໄດ້ໂດດເດັ່ນກັບ ໂບຣຸສເຊຍ ດອດມຸນ ໂດຍຄວາມຈິງແລ້ວ ນັກເຕະໄວ 18 ປີເຄີຍຢູ່ກັບອາຄາເດມີຂອງ ແມນເຊັສເຕີ ຊິຕີ້ ມາກ່ອນ ຫລັງຈາກທີ່ລາວບອກລາ ວັດຟອດ ແລ້ວມາເຂົ້າສູ່ສູນຝຶກເຍົາວະຊົນຂອງ ແມນຊິຕີ້ ດ້ວຍຄ່າຕົວ 66.000 ປອນ ໃນປີ 2015 ແຕ່ລາວຕັດສິນໃຈບອກລາຍອດທີມແຫ່ງຖິ່ນ ເອຕິຮັດ ສະເຕດ້ຽມ ໃນປີ 2017.
ເຖິງຢ່າງໃດກໍຕາມ ແດ ສະປີເກລ ລາຍງານຂ່າວໂດຍອ້າງອີງຈາກເອກະສານຂອງ ບານເຕະລີກ ສື່ແນວແສເລື່ອງລັບໃນວົງການບານເຕະວ່າ ຢ້ອນກັບໄປໃນປີ 2015 ແມນເຊັສເຕີ ຊິຕີ້ ລັກຈ່າຍເງິນລັບຫລັງເພີ່ມເປັນຈຳນວນ 200.000 ປອນ ໃຫ້ ເອເມກ້າ ໂອບາຊີ່ ນາຍໜ້າຄົນໜຶ່ງ ເພື່ອໃຫ້ອີກຝ່າຍຊ່ວຍໃຫ້ພວກເຂົາໄດ້ ຊານໂຊ່ ມາຮ່ວມທັບ ໂດຍຕົວະວ່າເປັນຄ່າຈ້າງໃຫ້ ໂອບາຊີ່ ໄປຊອກຫານັກເຕະຝີຕີນດີໃນທະວີບອາເມລິກາໃກ້ກັບອາເມລິກາກາງແທນ.
ທັງນີ້ ສະຫະພັນບານເຕະນາໆຊາດ (ຟີຟາ) ກຳນົດເອົາໄວ້ວ່າ ໃນການຍ້າຍທີມຂອງນັກເຕະລະດັບເຍົາວະຊົນນັ້ນ ຫ້າມມີການຈ່າຍຄ່ານາຍໜ້າທຸກປະການ ເຊິ່ງຂ່າວລືໃນເທື່ອນີ້ ເຮັດໃຫ້ ເອັຟເອ ຕັດສິນໃຈຈະສອບສວນດ້ວຍຕົນເອງ.
