ເຟເດີເຣີ ຜ່ານເຂົ້າຮອບ 16 ຄົນສຸດທ້າຍ ເທັນນິສ ດູໄບ ດິວຕີ້ ຟຣີ
ການແຂ່ງຂັນເທັນນິສເອທີພີ ເວິລ ທົວ ລາຍການ ດູໄບ ດິວຕີ້ ຟຣີ ເທັນນິສ ແຊມປ້ຽນຊິບ ທີ່ນະຄອນດູໄບ ປະເທດສະຫະລັດ ອາຣັບ ເອມິເຣດ ໃນວັນທີ 25 ກຸມພາຜ່ານມາ ໃນປະເພດຊາຍດ່ຽວ ຮອບ 32 ຄົນສຸດທ້າຍ ໂຣເຈີ ເຟເດີເຣີ ມື 2 ຂອງລາຍການ ທີ່ກຳລັງໄລ່ລ່າແຊ້ມລາຍການທີ 100 ໃນອາຊີບ ຕ້ອງລຸ້ນເຖິງ 3 ເຊັດກ່ອນເອົາຊະນະ ຟິລິບ ໂຄໄຣເບີ ຈາກເຢຍລະມັນ ລົງໄດ້ 2-1 ເຊັດ: 6-4, 3-6, 6-1 ຜ່ານເຂົ້າຮອບ 16 ຄົນສຸດທ້າຍໄປພົບກັບ ເຟນານໂດ ເບດາສໂກ ຈາກສະເປນ ທີ່ເອົາຊະນະ ໂທມັດ ແຟບເບຍໂນ ຈາກອີຕາລີ ມາໄດ້ 2-1 ເຊັດ: 3-6, 6-3, 6-2.
ສ່ວນຜົນຄູ່ອື່ນ ນິໂຄລອບ ບາຊິລາວິລີ (ຈໍເຈຍ) ຊະນະ ຄາເຣນ ຄາຊານອບ (ຣັດເຊຍ, ມື 4) 6-4, 6-1, ຍານ-ເລນນາດ ສະຕຣຸບ (ເຢຍລະມັນ) ຊະນະ ມິລອສ ເຣົານິ (ການາດາ, ມື 7) 6-4, 5-7, 6-4, ມາຣຕັນ ຟຸກໂຊວິດ (ຮົງກາຣີ) ຊະນະ ດາມີ ຊຸມເຮີ (ບອສເນຍ) 6-1, 7-6 (7-5).
