ຂະແໜງສາທາລະນະສຸກ ມີຫລາຍຕົວຊີ້ວັດອາດບໍ່ບັນລຸໄດ້ໄວ

ແຫຼ່ງຂ່າວຈາກ ຂປລ ໃຫ້ຮູ້ວ່າ: ການຈັດຕັ້ງປະຕິບັດ 10 ຕົວຊີ້ວັດ ໃນຂະແໜງສາທາ ລະນະສຸກໄດ້ມີຄວາມຄືບໜ້າດີ ເປັນຕົ້ນການແກ້ໄຂ ອັດຕາເດັກນ້ອຍລຸ່ມ 5 ປີ ທີ່ມີລວງສູງບໍ່ໄດ້ມາດຕະຖານ, ອັດຕາການຕາຍຂອງເດັກລຸ່ມ 5 ປີ, ອັດຕາການຕາຍຂອງແມ່, ອັດຕາການປົກຄຸມປະກັນສຸຂະພາບ. ຂະນະດຽວກັນ, ກໍຍັງເຫັນວ່າມີຫລາຍຕົວຊີ້ວັດອາດຈະບໍ່ບັນລຸໄດ້ ເປັນຕົ້ນອັດຕາເດັກນ້ອຍລຸ່ມ 5 ປີ ທີ່ມີນ້ຳໜັກຕ່ຳກວ່າມາດຕະຖານ, ອັດຕາການຕາຍຂອງເດັກນ້ອຍລຸ່ມ 1 ປີ, ອັດຕາການເກີດມີແພດຊ່ວຍ ແລະ ອັດຕາການໃຫ້ວັກຊີນກັນພະຍາດ.

ຂໍ້ມູນດັ່ງກ່າວໄດ້ລາຍງານໃນກອງປະຊຸມ ສະຫລຸບການຈັດຕັ້ງປະຕິບັດວຽກງານ ສາທາ ລະນະສຸກທົ່ວປະເທດປະຈຳ ປີ 2018 ທີ່ຈັດຂຶ້ນໃນວັນທີ 26 ກຸມພາ ນີ້ ໂດຍການເປັນປະທານຂອງ ທ່ານ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ໄດ້ຍົກໃຫ້ເຫັນວ່າ: ລັດຖະບານໄດ້ ຖືເອົາວຽກງານສາທາລະນະສຸກ ເປັນບູລິມະສິດສໍາຄັນ ແລະ ໄດ້ຮັບຮອງເອົາ 10 ຕົວຊີ້ວັດ ໃຫ້ຂະ ແໜງສາທາລະນະສຸກ ສູ້ຊົນຈັດຕັ້ງປະຕິບັດໃຫ້ບັນລຸໄດ້ໃນປີ 2020, ພ້ອມທັງຖືເອົາວຽກງານກັນພະຍາດ ແລະ ສົ່ງເສີມສຸຂະພາບ ແລະ ບໍລິການປິ່ນປົວທີ່ມີຄຸນນະພາບ, ທົ່ວເຖິງ ແລະ ເປັນທຳ.

ທ່ານ ບຸນກອງ ສີຫາວົງ ກ່າວຕື່ມວ່າ: ເພື່ອໃຫ້ສາມາດບັນລຸໄດ້ຕາມຄາດໝາຍທີ່ວາງໄວ້ ແລະ ຮັບປະກັນໃຫ້ປະຊາຊົນບັນດາເຜົ່າ ໄດ້ເຂົ້າເຖິງການບໍລິການ ທີ່ມີຄຸນນະພາບທີ່ດີ, ມີຮ່າງກາຍທີ່ແຂງແຮງ, ມີຈິດໃຈດີ, ມີອາຍຸຍືນຍາວຢ່າງມີຄຸນນະພາບ. ຂະແໜງການສາທາລະນະສຸກ, ຈົ່ງເພີ່ມທະວີປະຕິບັດນະໂຍບາຍ 5 ດີ 1 ພໍໃຈ ຄື: ຕ້ອນຮັບດີດ້ວຍອັດທະຍາ ໄສດີ, ມີຄວາມສະດວກດີວ່ອງໄວ, ມີຄວາມສະອາດງາມຕາ-ສິ່ງແວດລ້ອມທີ່ດີ, ການບົ່ງມະຕິຊັດເຈນດີ ແລະ ການປິ່ນປົວດີມີຈັນຍາບັນ ແລະ 1 ພໍໃຈຄື: ຄົນເຈັບ ແລະ ຍາດຕິພີ່ນ້ອງຂອງຄົນເຈັບ ມີຄວາມພໍໃຈລາຄາຍຸຕິທຳ.