ຍອດຜູ້ເສຍຊີວິດຈາກເຫລົ້າເຖື່ອນ ຢູ່ອິນເດຍເພີ່ມເປັນ 133 ຄົນ
ຕຳຫລວດອິນເດຍລາຍງານໃນວັນທີ 24 ກຸມພານີ້ວ່າ: ກຳມະກອນອີກຢ່າງໜ້ອຍ 35 ຄົນເສຍຊີວິດຈາກການດື່ມເຫລົ້າເຖື່ອນ ເຮັດໃຫ້ຈຳນວນຜູ້ເສຍຊີວິດຈາກການດື່ມເຫລົ້າເຖື່ອນຫລ້າສຸດເກີນ 130 ຄົນແລ້ວ.
ລາຍງານຜູ້ເສຍຊີວິດຈາກເຫລົ້າເຖື່ອນຢູ່ລັດອຳສຳມີຂຶ້ນພາຍຫລັງບໍ່ຮອດ 2 ອາທິດກ່ອນມີລາຍງານຜູ້ເສຍຊີວິດ 100 ຄົນຈາກການດື່ມເຫລົ້າເຖື່ອນຢູ່ລັດອຸຕໍປະເທດ ແລະ ລັດອຸຕາຂັນ ທາງພາກເໜືອ. ສຳລັບຜູ້ເສຍຊີວິດຫລ້າສຸດທົ່ວລັດອຳສຳມີຢ່າງໜ້ອຍ 133 ຄົນ ແລະ ຍັງມີຜູ້ປ່ວຍຢ່າງໜ້ອຍ 200 ຄົນ. ເຈົ້າໜ້າທີ່ລາຍງານວ່າ: ຈັບກຸມຜູ້ມີສ່ວນກ່ຽວຂ້ອງປະມານ 10 ຄົນ ແລະ ໄດ້ນຳເອົາເຫລົ້າເຖື່ອນໄປກວດພິສູດເພີ່ມອີກ. ຕຳຫລວດກ່າວວ່າ: ຜູ້ເຄາະຮ້າຍທີ່ດື່ມເຫລົ້າເຖື່ອນບໍ່ສະບາຍຫລັງດື່ມເຫລົ້າທີ່ຜະລິດຂຶ້ນເອງຢ່າງຜິດກົດໝາຍໃນຄືນວັນທີ 21 ກຸມພາ, ຜູ້ເຄາະຮ້າຍລວມທັງຜູ້ຍິງຫລາຍຄົນທີ່ເຮັດວຽກຢູ່ສວນຊາທ້ອງຖິ່ນ. ແພດກ່າວວ່າ: ຜູ້ຖືກນຳສົ່ງໂຮງໝໍມີອາການໜັກເຊັ່ນ: ຮາກຮຸນແຮງ, ເຈັບໜ້າເອິກ ແລະ ຫາຍໃຈບໍ່ອອກ.
