ສປປ ເກົາຫລີ ຂໍ UN ຊ່ວຍວິກິດຂາດເຂີນອາຫານ
ໂຄສົກສະຫະປະຊາຊາດ ຖະແຫລງວ່າ: ສປປ ເກົາຫລີ ຮ້ອງຂໍໃຫ້ໜ່ວຍງານບັນເທົາທຸກ UN ຊ່ວຍເຫລືອໃນວິກິດຂາດເຂີນອາຫານ ພາຍຫລັງຜົນຜະລິດຫລຸດລົງໃນປີນີ້.
ທາງການ ສປປ ເກົາຫລີ ແຈ້ງຕໍ່ສະຫະປະຊາຊາດວ່າ: ຜະເຊີນສະພາບຂາດເຂີນອາຫານເຖິງ 1,4 ລ້ານໂຕນ ຈາກຜົນຜະລິດອາຫານໃນປີນີ້ ເຊິ່ງລວມທັງເຂົ້າ, ສາລີ, ມັນຝຣັ່ງ ແລະ ຖົ່ວເຫລືອງ. ໂຄສົກ UN ຖະແຫລງວ່າ: ລັດຖະບານ ສປປ ເກົາຫລີ ຮ້ອງຂໍອົງການສາກົນດ້ານມະນຸດສະທຳໃຫ້ຊ່ວຍເຫລືອທາງອາຫານແກ່ ສປປ ເກົາຫລີ ເຊິ່ງໜ່ວຍງານໃນ UN ກຳລັງຫາລືກັບທາງການ ສປປ ເກົາຫລີ ເພື່ອດຳເນີນມາດຕະການໃນເບື້ອງຕົ້ນສຳລັບຈັດສັນການຊ່ວຍເຫລືອດ້ານມະນຸດສະທຳຕາມຄວາມຈຳເປັນ. ຂໍ້ມູນ UN ລະບຸວ່າ: ຊາວ ສປປ ເກົາຫລີ ປະມານ 10,5 ລ້ານຄົນ ຫລື ຄິດເປັນ 41% ຂອງປະຊາກອນທົ່ວປະເທດ ຕ້ອງການການຊ່ວຍເຫລືອດ້ານອາຫານ, ການຂໍຄວາມຊ່ວຍເຫລືອດ້ານອາຫານມີຂຶ້ນກ່ອນໜ້າກອງປະຊຸມສຸດຍອດລະຫວ່າງ ປະທານາທິບໍດີ ໂດນັລ ທຣຳ ຂອງອາເມລິກາ ກັບທ່ານ ກິມ ຈ໋ອງອຸນ ຜູ້ນຳ ສປປ ເກົາຫລີ ເພື່ອຢຸດຕິໂຄງການນິວເຄຼຍ ແລະ ລູກສອນໄຟ ສປປ ເກົາຫລີ.
